Masato Fukui

Fitorja me Laçin detyrim, Kamza pa shënuesin më të mirë

Sport Ekspres — Wed, 27 Feb 2019 10:08:29 +0000

Kamza përballet me Laçin ditën e diel, ndërkohë që trajneri Gentian Stojku do t duhet të bëjë pa shënuesin më të mirë të skuadrës së tij. Japonezi Masato Fukui, autor i pesë golave në Superiore këtë sezon, u ndëshkua me karton të verdhë kundër Kukësit.

Për të ishte i verdhi i katërt dhe humbet sfidën me kurbinasit. Por një sinjal të mirë për stafin teknik dhe Nestor Martinena, i cili shënoi golin e parë në kampionat me fanellën e Kamzën. Argjentinasi është çliruar disi dhe këtë herë pret të jetë titullar kundër Laçit.

Kamza renditet në vendin e fundit në klasifikim dhe fitorja me kurbinasit të dielën është detyrim. Duke parë që Kastrioti luan në transfertë me Flamurtarin, si dhe Luftëtari me Kukësin, është momenti për të marrë pikë të rëndësishme për mbijetesën, sigurisht duke shpresuar edhe në humbjen e rivalëve.

Fukui: Na duhen përforcime, keqardhje për pozicionin

Sport Ekspres — Thu, 17 Jan 2019 15:35:30 +0000

Masato Fukui ka qenë vendimtar me golat e tij për Kamzën. Japonezi ndërkohë ka një mesazh për drejtuesit dhe lidhet me afrimet në ekip, që sipas tij janë të domosdoshme. Mesfushori anësor flet edhe për përgatitjet e skuadrës së tij gjatë kësaj periudhe.

“Mendoj se po punojmë shumë mirë në aspektin fizik. Kanë ardhur disa lojtarë të vlefshëm për skuadrën, megjithatë kemi nevojë edhe për përforcime të tjera. Nuk jam unë ai që mund të përcaktoj pozicionet, por shpresoj të kemi edhe më shumë prurje”, thotë Fukui për Supersport.

Në aspektin personal Fukui ka bërë mirë: “Kur analizoj rezultatet në planin personal, jam i kënaqur me paraqitjet e mia në dy fazat e para. Kam gjetur disa herë golin dhe për këtë më vjen mirë, por jam akoma më i lumtur që golat e mi kanë sjell pikë për skuadrën. Megjithatë kam një ndjenjë zhgënjimi në lidhje me rezultatet dhe pozicionin aktual të ekipit në renditje.”

Mbijetesa është objektivi kryesor për Kamzën dhe kjo e kënaq Fukuin, ndërkohë që kur pyetet nëse do të largohet po t’i shkojë ndonjë ofertë, japonezi thotë: “Nuk di çfarë të them, varet nga oferta që mund të vijë”.

FOTO | Fukui dedikim special, Trashi e Telushi surpriza

Sport Ekspres — Sun, 09 Dec 2018 13:15:24 +0000

Masato Fukui shënoi golin e parë për Kamzën ndaj Luftëtarit, ndërkohë që ka shpalosur një bluzë ku ishte shkruar emri i Bahtir Avdylit, i ndarë nga jeta disa ditë më parë. japonezi e ka ngritur fanellën në drejtim të portierit, i cili po mundohet të përballojë ndarjen nga jeta të vëllait.

E veçanta tjetër qëvjen nga Kamza lidhet me Bruno Telushin dhe Lorenc Trashin. Dy lojtarët ePartizanit po ndjekin nga tribuna sfidën mes Kamzës e Luftëtarit. Nuk është sepo bëjnë “spiunin”, pasi ndeshjen e radhës e luajnë kundër Kukësit. Veç tyre, edhe Jasir Asani është në tribunë gjithashtu.

Trashi e Telushi duke ndjekur Kamza-Luftëtari

Fukui në Federatë për borxhet e pashlyera: E mbylla me Shqipërinë!

Sport Ekspres — Fri, 31 Aug 2018 10:01:38 +0000

Masato Fukui u bë i njohur në futbollin tonë kur ishte pjesë e Tiranës në sezonin 2015-2016. 29-vjeçari kaloi vitin tjetër te Skënderbeu, por në Korçë nuk la gjurmë. Sezonin e kaluar, ai ishte pjesë e Kamzës, por japonezi nuk u nda mirë me drejtuesit.

Shkaku? Pagat e prapambetura. Lojtari ofensiv ka qenë sot në ambientet e FSHF-së për të paditur klubin e Kamzës për rrogat e pashlyera. Ai është i lodhur dhe e ka mbyllur me kampionatin tonë. Kamza tenton ta afrojë përsëri në ekip, por japonezi është i prerë.

“Dua të mbyll problemet e mia dhe do të largohem drejt vendit tim për momentin. Do të shikoj të gjej ndonjë ekip në Europë, por në Shqipëri nuk kthehem më”, konfirmoi Fukui për SportEkspres.com.