marsid Dushku

Dushku: Të luajmë si ndaj Turbinës, mbijetojmë në të Parën

Sport Ekspres — Wed, 22 May 2019 11:36:41 +0000

Elbasani do kërkojë të shpëtojë nga rënia në Kategorinë e Dytë dhe për këtë duhet të mundë skuadrën e Luzi 2008 të premten në Ballsh. Verdheblutë kaluan një sezon me plot probleme, por po mundohen të mbijetojnë dhe pas zgjidhjes së problemit të administrimit të klubit, mundë të ketë zhvillime madhore.

Gjithsesi momentalisht mendohet për sfidën me skuadrën kavajase dhe trajneri Marsid Dushku për SportEkspres.com ka deklaruar: “Në ndeshjen e fundit me Turbinën skuadra bëri një lojë shumë të mirë dhe tregoi se ka mundësi të japë më shumë. Këtë duhet ta tregojë edhe të premten ndaj Luzit 2008. Luhet vetëm një ndeshje, që merr vlerat e një finale të sezonit për ne. Shpresoj që skuadra të bëjë më të mirën dhe nga Ballshi të dalim ne fitues”.

Kjo situatë e Elbasanit nuk e bën të ndjehet mirë Dushkun, sikurse edhe lojtarët e sportdashësit verdheblu. “Kur kujtoj historinë e Elbasanit protagonist e kampion në elitë, si trajner nuk ndjehem mirë që sot luajmë për mbijetesë. Ky është futbolli dhe sot ne kemi vetëm një alternativë, të mbijetojmë në Kategorinë e Parë. Besoj se do t’ia dalim”, përfundon trajneri Dushku.

AGRON KAJA

Dushku: Elbasani për fitore në Berat, keqardhje që jemi në këto pozita!

Sport Ekspres — Fri, 03 May 2019 09:20:52 +0000

Elbasani ka bërë hapa të mëdhenj në fazën e tretë, ku vetëm në dy ndeshjet e fundit ka mundur të grumbullojë 6 pikë, dhe ka lënë fundin e zonës së mbijetesës në Grupin B.

Me 15 pikë dhe +5 pikë nga Tomori, elbasanllinjtë shkojnë në Berat në ndeshjen e javës së 26-të me synimin për fitore, dhe këtë trajneri Marsid Dushku e quan të mundshëm si objektiv, edhe pse kjo është një ndeshje transfertë dhe me një rival direkt për mbijetesë.

Për SportEkspres.com, Dushku deklaron se ndjen keqardhje që këto dy skuadra ndeshen në këto pozicione të vështira në renditje. Duke e pranuar këtë realitet, tekniku i Elbasanit e quan transfertë të vështirë.

“Të dyja skuadrat janë në pozicione të vështira për mbijetesë, ndaj edhe përballja jonë me Tomorin e kësaj shkalle është. Më vjen keq që këto dy skuadra janë në këto realitete, por ne do të bëjmë punën tonë pë të marrë makismumin”.

“Ne shkojmë në Berat për fitore, dhe këtë unë e mbështes te gjendja e mirë e skuadrës pas fitores së fundit me Apoloninë, por edhe në diferencën e pikëve që kemi me Tomorin. Ne edhe një barazim na bën punë, ndaj them se çdo rezultat pozitiv është në favorin tonë”, përfundoi trajneri i Elbasanit.

AGRON KAJA

Dushku: Derbi është i paparashikueshëm, por fiton Elbasani

Sport Ekspres — Wed, 10 Apr 2019 10:39:16 +0000

Situata e Elbasanit është shumë e vështirë, pasi diskutohet mbijetesa në Kategorinë e Parë. Të kushtëzuar nga financat e dobëta dhe gjyqet pa mbarim me kompaninë angleze, tashmë verdhebluve u duhet të shtrëngohen fort të mos rikthehen në Kategorinë e Dytë.

Këtë nuk e pranon edhe trajneri Marsid Dushku, i cili për SportEkspres.com deklaron se në Cërrik do jetë një derbi mbijetese. “Ndeshje të tilla “derbi” janë të paparashikueshme, por ne shkojmë në këtë sfidë vetëm për të marrë tri pikët. E kemi të qartë vështirësinë që ka kjo përballje, por kjo është sfidë mbijetese dhe vetëm tri pikët do të jenë synimi final. E fitojmë ne, nuk është e pamundur”, theksoi Dushku.

Në Cërrik te skuadra e Elbasanit do të mungojnë kapiteni Duka, i cili është i dëmtuar. Të vështirë për t’u rikuperua e ka edhe Jaupi, por tekniku Dushku ka besimin e plotë te lojtarët e tjerë dhe beson se do ia dalin me sukses. “Elbasani nuk del pa tri pikë nga Cërriku, pavarësisht mungesave që kemi”.

AGRON KAJA

Elbasani, Dushku: Me Tomorin luhet ndeshja e sezonit!

Sport Ekspres — Tue, 19 Mar 2019 11:25:02 +0000

Kategoria e Parë nuk do të luajë këtë javë ndeshjet e javës së 21-të të saj, por formula e fazës së tretë i ka futur në rivalitet të plotë, kryesisht skuadrat që kërkojnë mbijetesën. Në këtë situatë ndodhet edhe skuadra e Elbasanit, që renditet në vendin e 4-t në zonën Play-out të Grupit B.

Tomori është kundërshtari i radhës dhe për SportEkspres.com, trajneri i skuadrës së Elbasanit, Marsid Dushku, deklaroi se kjo është sfida e sezonit për skuadrën e tij dhe duhet fituar me çdo kusht. “Jemi në pozicion delikat në renditje. Kjo na detyron që të gjitha ndeshjet t’i vlerësojmë seriozisht dhe prej tyre të marrim maksimumin. Edhe ndeshjen e radhës me Tomorin kështu e kemi vlerësuar, sepse aty varet shumë sezoni për Elbasanin”.

Në këtë takim delikat edhe për skuadrën e Tomorit, te Elbasani është në dyshim kapiteni Duka, i cili ka dy javë i dëmtuar. Por tekniku Dushku thekson se formacioni titullar i Elbasanit ndaj Tomorit do ta arrijë suksesin. “Mungesa e Dukës është e ndjeshme, edhe pse kemi dy javë kohë dhe e presim rikuperimin e tij. Të gjithë futbollistët e tjerë që do të luajnë ndaj Tomorit do të bëjnë maksimumin, me qëllim që nga ajo ndeshje të marrim vetëm tri pikët”.

AGRON KAJA