Së fundmi ka zhvillime për të ardhmen e shtatlartit, i cili ndodhet në Poloni dhe po testohet te skuadra e Ruh Horzuf, që sivjet ra nga Ekstraklasa, niveli më i lartë i futbollit në shtetin lindor. Vitin e shkuar ata kanë pasur probleme financiare dhe merkato u është bllokuar deri në 15 gusht. Shitja e Bargiel te Milani, mesfushorit të talentuar 17-vjeçar, ka bërë që situata financiare të ndryshojë për klubin. 600 mijë eurot e marra kanë bërë që drejtuesit të nisin merkaton dhe gjatë kësaj kohe kanë shkuar aty disa lojtarë, mes tyre edhe Bojan Markoviç. Ai është testuar në një miqësore dhe trajneri Ruh ka mbetur i kënaqur nga cilësitë e boshnjakut dhe tashmë mbetet për t’u gjetur akordi financiar dhe për t’u nënshkruar kontrata. Duhet thënë se Markoviç mund të luajë vetëm pas 15 gushtit me Ruh Horzuf, pasi nga ai moment do të zhbllokohet merkato.

LAÇI

Markoviç në Superiore bëri shumë mirë, çka ka bërë që të bjerë në sy me paraqitjet e tij dhe normalisht të kishte interesim për të. Mësohet se pas largimit nga Teuta, drejtuesit e Laçit, me pëlqimin e trajnerit Stavri Nica, kanë pasur një komunikim me menaxherin e qendërmbrojtësit për të diskutuar mbi një bashkëpunim të mundshëm. Kurbinasit pasi kanë marrë informacionin e duhur nuk kanë shkuar më tej, duke mos hyrë në bisedime konkrete, çka bëri që gjithçka të mbetej në kuadrin e një interesimi.

MARKOVIÇ – Bojan Markoviç, qendërmbrojtësi 31-vjeçar që u afrua në janar te Teuta, bëri një paraqitje të mirë me Teutën në pjesën e dytë të këtij sezoni, çka bën që drejtuesit e klubit dhe stafi teknik ta kenë në planet e tyre edhe për sezonin e ardhshëm. Shtatlarti është i kënaqur me eksperiencën e tij në Shqipëri dhe gjasat janë që ai të vijojë të qëndrojë me skuadrën edhe për sezonin e ardhshëm. Kjo normalisht që e gëzon trajneri Magani, pasi kemi të bëjmë me një lojtar me cilësi dhe me eksperiencën e tij mund ta ndihmojë shumë Teutën në arritjen e objektivave për sezonin e ardhshëm.