Markizio

Zyrtare/ Markizio zyrtarizohet te klubi i ri, por falë ndërhyrjes nga “lart”

Sport Ekspres — Mon, 03 Sep 2018 18:55:07 +0000

Klaudio Markizio i ka dhënë fund pritjes disa javore. Ish-mesfushori i Juventusit pati shumë oferta në tavolinë, por ajo më bindësja siç duket ka qenë ajo nga toka ruse, ku ka firmosur me ekipin e Zenitit.

Por, për të arritur në firmën e italianit, nuk ka qenë aspak e lehtë, sepse është dashur që klubi nga qyteti i Shën Petersburgut të marrë leje speciale nga federata ruse për regjistrimin e 32-vjeçarit, pasi periudha zyrtare e regjistrimeve në Rusi u mbyll me datë 31 gusht, por në një vend si Rusia këto “ndere” të federatës nuk janë të pazakonta.

Benvenuto, Claudio ???

Claudio Marchisio is officially a Zenit-player!#MarchisioIsZenit pic.twitter.com/fAOBSEtyWZ

— FC Zenit in English? (@fczenit_en) September 3, 2018

Markizio në mëdyshje, joshet nga oferta ruse

Sport Ekspres — Sun, 26 Aug 2018 17:37:39 +0000

Klaudio Markizios i duhet të marrë një vendim për të ardhmen e karrierës së tij. Mesfushori italian është tashmë një lojtar i ri pas prishjes me mirëkuptim të kontratës me Juventusin. Ofertat nuk i kanë munguar, dhe tani pritet vendimi final.

Në fillim u përfol për një interesim të Monakos dhe PSG-së. Por, së fundmi sipas “Gazetta Dello Sport”, për Markizion është futur në garë dhe skuadra e Zenit. Klubi nga Shën Petersburgut ka bërë një ofertë të majme për të siguruar shërbimet e 32-vjeçarit.

Oferta ruse pëlqehet shumë nga italiani, pasi në Rusi do të ketë të garantuar një vend në formacionin titullar, ndërsa te PSG dhe Monako konkurrenca do ta lërë me javë të tëra duke ngrohur stolin. “Princit” duhet ta ndajë mendjen.

Markizio qëndron në Europë, pranë firmës me klubin e sheikëve

Sport Ekspres — Sat, 18 Aug 2018 08:26:56 +0000

Klaudio Markizio mbylli një kapitull 25-vjeçar me skuadrën e Juventusit. Mesfushori 32-vjeçar tanimë është një lojtar i ri dhe së shpejti do të vendosë se ku do të vazhdojë vitet që i kanë mbetur si futbollist profesionist. Gjatë orëve të fundit janë përmendur skuadra të shumta, por lajmi më interesant vjen nga “Gazzeta Dello Sport”.

Sipas së përditshmes italiane, Markizio, është pranë firmës me skuadrën e PSG-së në Francë. Dorëheqja nga futbolli e Tiago Motës, ka bërë që në mesfushën e parisienëve të ketë boshllëk të madh, pasi vetëm Lasana Diarra është opsioni i vetëm në rolin e mbajtur më parë nga italo-braziliani. Ish-juventini shikohet si një lojtar interesant që mund t’i hyjë në punë trajnerit Tuhel dhe mbi të gjitha ai ka kosto 0.

Mbetet për t’u parë se si do të shkojë kjo histori. Pista të tjera për lojtarin vijnë nga kampionati kinez dhe ai amerikan “MLS”. Por, një aventurë në Europë do t’i pëlqente më shumë italianit, i cili beson se mund të luajë të paktën edhe një sezon në një skuadër të nivele të larta.

“Princi” thuajse i ikur, e duan në Principatë

Sport Ekspres — Fri, 13 Jul 2018 09:12:25 +0000

Klubi i Monakos ka qenë shumë aktiv në merkato me afrimin e një sërë talentesh nga kampionati francez. Por, në planet e skuadrës nga principata mbeten dhe lojtarët me eksperiencë.

Sipas “Sky Sports” nënkampionët e Francës janë shumë pranë firmës me mesfushorin e Juventusit Klaudio Markizio. “Princi” ka dhe një ofertë nga Emiratet e Bashkuara Arabe.

Me ardhjen e Emre Xhanit te ekipit torinez, hapsirat për Markizion janë reduktuar ndjeshëm dhe shanset për një lamtumirë midis tij dhe klubit të zemrës janë më të larta se kurrë.