“Përplasen” Junajtid dhe Arsenali, synohet ish-i i Juves

Sport Ekspres — Wed, 10 Jul 2019 14:10:54 +0000

Juventusi e shiti në verën e vitit 2017 te Sauthemptoni për shumën e 15 milionë sterlinave. Flasim për Mario Lemina, mesfushorin nga Gaboni. 25-vjeçari është pranë largimit nga “shenjtorët”, ndërsa ofertat në drejtim të tij janë tunduese.

Mançester Junajtid ka nisur kontaktet me agjentin e tij sipas “Times”, ndërkohë që Lemina nuk është grumbulluar për fazën përgatitore me ekipin e tij. Sauthempton kërkon 18 milionë euro, pothuajse të njëjtën shumë që pagoi te “Zonja e vjetër”.

Lojtari pati probleme fizike sezonin e fundit dhe luajti vetëm 21 ndeshje në Premier, duke shënuar vetëm një gol. Për të interesohet edhe Arsenali. Lemina aktivizohet në rolin e qendërmesfushorit, por bën mirë edhe mbrojtësin e krahut të djathtë.

Opsion “low cost”, Arsenal dhe Junajtid kërkojnë “ish”-in e Juventus

Sport Ekspres — Tue, 09 Jul 2019 09:29:18 +0000

Mario Lemina është objektiv i Mançester Junajtid dhe Arsenal. Mesfushori aktivizohet me Sauthempton, ku erdhi në vitin 2017 nga Juventusi nëpërmjet një operacioni prej 17 milionë eurosh. Në Angli ai është përshtatur mjaft mirë, por dëmtimet janë armiku më i madh.
Me Sauthempton ai ka pasur disa momente mjaft të mira, por kanë qenë problemet fizike, që e kanë ndaluar hovin e tij. Mançester Junajtid dhe Arsenal janë në kërkim të shërbimeve të afrikanit. Djajve të kuq u iku nga duart Juri Tielemans dhe tani duket se do hidhen në sulm për të marrë mesfushorin nga Gaboni.

Edhe Arsenal është në kërkim të tij. Topçinjtë kanë zhvilluar kontaktet e para rreth mundësisë së afrimit të ish-juventinit. Sipas medieve angleze, gjithashtu Atalanta dhe Leister kanë treguar interes më parë për të. Duhet të themi se italianët janë skuadra e vetme që i jep mundësinë Leminës të shijojë emocionet e Champions League.

Trajneri i Sauthempton, Ralf Hazenhutl nuk e ka në planet e tij dhe e ka lënë jashtë ekipit për fazën pregatitore. Ndërkohë, mesfushori në një intervistë është shprehur qartë se ka biseduar me klubin dhe këta të fundit i kanë dhënë mundësinë të largohet.