Mario Hermoso

Pasardhësi i Godin, Atletiko akord me mbrojtësin e kombëtares

Sport Ekspres — Thu, 18 Jul 2019 12:24:59 +0000

Atletiko Madrid nuk ka ndërmend të ndalet në merkato. Klubi madrilen ka arritur akordin me Espanjolin për shërbimet e Mario Hermosos, duke përforcuar në këtë mënyrë mbrojtjen.

24-vjeçari aktivizohet në rolin e qendërmbrojtësit dhe mbrojtësit të majtë dhe prej dy vitesh është pjesë e ekipit katalanas. Paraqitjet pozitive me Espanjolin bënë të mundur që në nëntor të vitit të kaluar të debutonte me kombëtaren e Spanjës.

Mario Hermoso

Mediat katalanase raportojnë se Atletiko do të paguajë 29 milionë euro (25 dhe 4 në formë bonusesh), ndërsa Espanjoli mban 20% të kartonit në rast të një rishitje në të ardhmen.

Vazhdon kërkimi për pasuesin e Godin, Simeone veçon tre mbrojtës

Sport Ekspres — Mon, 24 Jun 2019 21:41:28 +0000

Atletiko e Madridit interesohet për Mario Hermozon. Spanjolli është një lojtar shumë interesant. Me paraqitjet e tij të mira ai ka tërhequr interesin e klubeve si Barcelona dhe Atletiko. Këta të fundit e kanë jetike ardhjen e një mbrojtësi me cilësitë e tij. 24-vjeçari arrin të mbulojë qendrën dhe krahun e majtë të mbrojtjes.
Çmimi i lartë që Espanjoli i ka caktuar yllit të saj i step disi drejtuesit madrilenë. Katalanasit e vlerësojnë plot 40 milionë euro, ndërkohë që kontrata e tij skadon vitin e ardhshëm dhe Simeone mund të presë për ta marrë falas. Për këtë Atletiko ka gati planin rezervë.

Nikolas Otamendi dhe Dalej Blind janë dy opsionet e tjera në rast të dështimit të operacionit “Hermozo”. Blind ashtu si Hermozo arrin të mbulojë qendrën dhe krahun e difensivës. Gjithsesi, shkëputja nga Ajaksi duket e vështirë. Nikolas Otamendi është mundësia më e arritshme. E vetmja pengesë këtu është paga e lartë që argjentinasi merr te Siti.

Ekipet “Big” gati, garë e fortë për zbulimin e La Liga-s

Sport Ekspres — Tue, 21 May 2019 18:57:41 +0000

Bajerni i Mynihut dhe Arsenali janë futur në garë për Mario Hermozon. Mbrojtësi i Espanjol ka treguar aftësi të jashtëzakonshme, duke u shndërruar në një prej lojtarëve më të mirë të ekipit katalanas. Paraqitjet e tij pozitive kanë rënë në syrin e disa ekipeve të mëdha evropiane.

Baverezët dhe Topçinjtë kanë shprehur interesin më të madh për të. 23-vjeçari arrin të mbulojë qendrën dhe krahun e majtë të mbrojtjes, çka e bën një lojtar tepër të vlefshëm për çdo skuadër.

Trajneri i kombëtares spanjolle e ka vlerësuar talentin dhe punën e tij, duke e thirrur në kombëtare, ku regjistron dy ndeshje. Vlera e tij në merkato është rreth 20 milionë euro. Gjithsesi vështirë se ekipet që e kërkojnë e marrin pa 35 milionë euro. Shifër e përballueshme për klube si Bajerni apo Arsenali. Ankandi për të sapo ka nisur.

Ka konkurrencë me Realin, Bajerni hap thesin për spanjollin

Sport Ekspres — Thu, 31 Jan 2019 13:25:47 +0000

Bajerni i Mynihut po kërkon një mbrojtës. Gjiganti gjerman ka një preferencë dhe ai luan në La Ligën spanjolle. Flasim për Mario Hermoson, 23-vjeçarin e Espanjolit.

Siç raporton “Sport Bild”, Bajerni është gati të shpenzojë për qendërmbrojtësin e ekipit katalanas, i cili bën mirë dhe rolin e mbrojtësit të majtë.

Mario Hermoso

Për Hermoson, i cili debutoi me kombëtaren e Spanjës në miqësoren e 18 nëntorit të vitit të kaluar kundër Bosnjës, interesohet dhe Reali i Madridit, por drejtuesit e Bajernit janë gati të mbyllin marrëveshjen për shumën e 40 milionë eurove dhe t’i dhurojnë trajnerit Kovaç një përforcim për repartin ofensiv.