Gëce i “ringjallur”, Dortmundi vihet në lëvizje

Sport Ekspres — Mon, 29 Jul 2019 11:07:17 +0000

Mario Gëce ka lënë pas dëmtimet e shumta dhe sëmundjen e rrallë që e la një vit të tërë pa futboll. Te Dortmundi besojnë ende te 27-vjeçari dhe palët kanë filluar negociatat për rinovimin e kontratës.

Kontrata aktuale e Gëces mbaron në fund të vitit 2020. Fantazisti është lojtari më i paguar te Dortmundi me një pagë vjetore prej 10 milionë eurosh.

Më kontratën e re, Dortmund ka propozuar një ulje të pagës deri në 6 milionë euro në këmbim të tri viteve shtesë me ngjyrat verdhezi.

Kujtimet e Gëces: Psikolog dhe origjinal, ju tregoj Klopin që nuk njihni

Sport Ekspres — Tue, 21 May 2019 12:08:04 +0000

Trajnerët janë shumë të rëndësishëm në jetën e një futbollisti. Ata mund t’i japin udhë një karriere të madhe. Kështu është edhe historia e Mario Gëce dhe Jurgen Klop. Mario është ndalur të flasë gjatë për trajnerin që i dedikohet karrierën. 26-vjeçari kulmin e karrierës së tij e shënon me atë gol të shënuar në finalen e Botërorit të 2014-ës ndaj Argjentinës së Leo Mesit.

Sulmuesi tregon dy anët e personalitetit të trajnerit dhe mënyrën e veçantë sesi sillej me të. E vlerëson shumë besimin e tij. “Klop besoi te unë kur isha 17 vjeç. Më vjen për të qeshur kur e shoh sesa i natyrshëm është para mediave angleze. Është aq origjinal dhe thotë çdo gjë që mendon. Por kjo nuk është e gjithë pjesa e personalitetit të tij. Ka një anë tjetër mjaft të egër.”

“Kur isha një adoleshent dhe nuk jepja maksimumin, ai më afrohej dhe bërtiste me gjuhën e tij të rëndë. Pas stërvitjes më merrte menjanë dhe më thonte: ’Mario si je ti? Flasim pak për jetën, çfarë po ndodh?’. Ai dinte gjithmonë si të sillej me mua. Ka një personalitet të veçantë”, u shpreh Gëce për ish-trajnerin e tij.