Marcos Alonso

Atletiko pa mbrojtje, titullari i Çelsit pranon ofertën e madrilenëve

Sport Ekspres — Fri, 31 May 2019 18:28:06 +0000

Atletiko e Madridit pothuajse është shpërbërë në pjesën difensive të saj. Nga formacioni titullar në katërshen e mbrojtjes ka mbetur vetëm uruguajani Gimenez. Drejtuesit madrilenë po mundohen të ndërhyjnë në merkato për të formuar ekipin deri para fazës përgatitore.

Markos Alonso është emri që Simeone e do për të zëvendësuar Lukas Hernandez, i larguar te Bajerni. Sipas gazetës “Marca”, mbrojtësi i majtë ka pranuar të largohet nga Çelsi. Te Atletiko 28-vjeçari do të merrte menjëherë vendin e titullarit.

Në ndeshjet e fundit Sarri ka preferuar Emerson Palmierin në krahun e majtë të mbrojtjes. Edhe në finalen e Europa League ndaj Arsenalit, trajneri i bluve zgjodhi italianin në formacionin e parë. Ky besim në aftësitë e Palmierit e shtyn Alonson të pranojë idenë e largimit në kryeqytetin spanjoll, ku e presin me krahë hapur.

Atletiko përgatit goditjen e bujshme, gati të transferojë yllin e Çelsit!

Sport Ekspres — Sat, 18 May 2019 21:14:26 +0000

Atletiko e Madridit po pëson një shpërbërje në mbrojtje. Te bardhekuqtë është konfirmuar largimi i tre mbrojtësve të formacionit bazë. Diego Godin, Lukas Hernandes dhe Filipe Luis.

Gjithsesi, për këtë të fundit, Atletiko duket se e ka gati zëvendësuesin. Markos Alonso është dëshira e Diego Simeones dhe kontaktet e para kanë nisur. Mbrojtësi i Çelsit ka bërë një sezon shumë të mirë dhe është një nga pikat kyçe të Sarrit.

Pas tre mbrojtësve dhe Antuan Grizman nje lojtar tjetër që mund të largohet nga “Wanda Metropolitano” është Tomas Partej. Ganezi pëlqehet shumë nga Interi. Në Milano sapo ka ardhur lajmi i mirë nga UEFA se nuk kanë probleme me ndershmërinë financiare dhe mund të bëjne blerje të mëdha. Kështu për 25-vjeçarin pritet që Interi të hidhet në sulm, ku pritet një ofertë zyrtare.

VIDEO | Çelsi bën detyrën, kundër Kristal Palas vendosin spanjollët

Sport Ekspres — Sun, 04 Nov 2018 17:51:33 +0000

Çelsi ka triumfuar në shtëpi ndaj Kristal Palas, duke u bashkuar me Liverpulin e vendit të dytë në kuotën e 27 pikëve. Ekipi i Sarrit bëri detyrën me fitoren 3-1, ku shënoi dy herë Morata dhe një herë Pedro Rodrigez.

Pjesa e parë ishte një dominim i bluve, të cilët arritën të konkretizonin vetëm një herë rastet që krijuan. Në minutën e 32-të ishte Alvaro Morata, i cili shënoi golin e avantazhit për Çelsin, pas një pasimi nga Pedro Rodrigez. Me rezultatin 1-0 skuadrat u drejtuan në dhomat e zhveshjes.

Në fraksionin e dytë miqtë e Kristal Palas duket se u futën më me besim në fushë dhe vetëm pas tetë minutash lojë, arritën të gjenin golin e barazimit me anë të Tousend. Goli duket se e shkundi Çelsin dhe blutë e Londrës filluan të rrisnin përsëri presionin tek porta e Kristal Palas. Në minutën e 65-të ishte përsëri Morata, i cili tashmë duket i rilindur pasi shënon golin e tretë në dy ndeshjet e fundit.

Vetëm pesë minuta më pas, Çelsi shënoi përsëri, këtë rradhë me Pedron. Një gol, që ishte i gjithi spanjoll, ku dalja e Markos Alonsos nga krahu i majtë gjeti Pedron, i cili nuk gaboi, duke shënuar dhe golin e tretë. Kështu, blutë e shoin veten në vendin e dytë tashmë, dy pikë prapa Mançester Sitit.

Nuk është Hazard goditja, Reali ka zgjedhur një tjetër “blu”

Sport Ekspres — Thu, 16 Aug 2018 12:49:33 +0000

Hulen Lopetegui ka deklaruar se nuk do të ketë merkato te Reali, por zor se do të ndodhë diçka e tillë. Spanjollët, sikurse raporton “Daily Star”, ia kanë vënë syrin lojtarit polivalent të Çelsit, 27-vjeçar Markos Alonsos.

Futbollisti i linjës së majtë është formuar si lojtar pikërisht te Reali dhe një rikthim në vendlindje nuk do të përjashtohej prej tij. Sigurisht vendos Çelsi, pasi Alonso është nën kontratë deri verën e vitit 2021. Largimi i Teo bën që te spanjollët të mendohet edhe për një përforcim tjetër.

Veçse në krah, ai luan edhe në qendër të mesfushës. Aktualisht marrëdhëniet mes dy klubeve janë shumë të mira. Kurtua u largua drejt spanjollëve këtë verë, ndërkohë që në krahun tjetër u zhvendos Kovaçiç, që do të luajë me Çelsin këtë sezon.