Marco Reus

Rojs: Jemi të aftë për të arritur të pamundurën!

Sport Ekspres — Mon, 04 Mar 2019 19:51:54 +0000

Borusia e Dortmundit do të luajë mbrëmjen e nesërme ndeshjen e kthimit përballë Totenhemit, sfidë e vlefshme për fazën e 1/8-ave të Champions League. Shanset për të kaluar më tej për ekipin gjerman janë shumë të pakta, pasi takimi i parë përfundoi me shifrat 3-0 për “gjelat” e Londrës.

Në kuadër të sfidës, ka folur kapiteni i verdhezinjve, pikërisht Marko Rojs. Mesfushori ka thënë për mediat gjermane që gjithçka mund të ndodhë dhe se beson tek ekipi i tij. Sidoqoftë, Rojs pranoi se një gol i Totenhemit do të shuante përfundimisht shpresat e Dortmundit për të kaluar më tej.

“E dimë që jemi të aftë për të arritur të pamundurën. Nëse Totenhemi shënon një gol, atëherë do të ishte shumë e vështirë. Gjithsesi, ne kemi shumë besim se do ja dalim dhe do të kalojmë më tej”, përfundoi kapiteni i verdhezinjve.

Lajme të shkëlqyera për Dortmundin, rikthehet ylli i ekipit

Sport Ekspres — Mon, 25 Feb 2019 17:25:40 +0000

Marko Rojs njihet për fatin e tij të keq për sa i pëket dëmtimeve. Së fundmi, kapiteni i Borusias së Dortmundit ka munguar në katër ndeshje për ekipet e tij, si pasojë e një dëmtimi që mori në ndeshjen e Kupës ndaj Verder Bremenit.

Për shkak të dëmtimit, 29-vjeçari humbi dhe ndeshjen e rëndësishme përballë Totenhemit në Champions, ku verdhezinjtë u mposhtën me shifrat 3-0. Gjithsesi, kur kanë mbetur diçka më shumë se një javë nga ndeshja e kthimit, një lajm i mirë vjen për Rojs dhe Dortmundin.
Kapteni ka nisur stërvitjen ditën e sotme dhe sipas asaj që raportohet në mediat gjermane, do të jetë i gatshëm që këtë fundjavë për të ndihmuar ekipin e tij. Padyshim një lajm fantastik për trajnerin Favre dhe një vlerë e shtuar për verdhezinjtë.

Premtimi i kapitenit, Rojs: Unë te Bajerni? Harrojeni, nuk do ndodhë kurrë!

Sport Ekspres — Mon, 21 Jan 2019 08:33:53 +0000

Marko Rojs është një nga lojtarët më të talentuar dhe më besnikë që ekzistojnë në botën e futbollit. Sulmuesi aktivizohet me Dortmundin që nga viti 2012, ndërkohë që ka refuzuar oferta të shumta gjatë kësaj periudhe.

Bajerni është ndër klubet që e ka kërkuar më shumë, por ai nuk është si Levandovski, Gëce dhe Humels, të cilët lanë verdhezinjtë për të kaluar në Bavari. Rojs është ndryshe dhe një gjë të tillë nuk do e bënte kurrë për respekt të Dortmundit dhe tifozëve të tij.

Ai po shijon një sezon fantastik, ka shënuar 11 gola në kampionat, Dortmundi kryeson Bundesligën me gjashtë pikë më shumë se Bajerni dhe në Champions do të përballen me Totenhemin. Në një prononcim për “Frankfurter Allgemeine Zeitung”, 29-vjeçari bën një premtim në lidhje me të ardhmen.

“Unë? Të Bajerni? Kurrë! Nuk do të më shikoni kurrë të vesh bluzën e Bajernit të Mynihut dhe unë ja u premtoj këtë gjë. Jam kapiteni i Dortmundit dhe duhet të jem një shembull”, përfundon Marko Rojs.