Penalltia dhe “indiferenca” e VAR-it, Niki: Gabim i pafalshëm, do të japin llogari!

Sport Ekspres — Mon, 03 Dec 2018 18:50:34 +0000

Rasti i dyshimtë i Zaniolos në ndeshjen Roma-Inter ka sjellë polemika të shumta në Itali. 19-vjeçari i Romës u pengua në zonën nga D’Ambrozio, ndërsa kryesori Roki sinjalizoi vazhdimin e lojës.

Quarto episodio: rigore non dato a Zaniolo in #RomaInter pic.twitter.com/Othw2QwT9L

— Edoardo (@_Edoar8) December 2, 2018

Lojtarët e Di Françeskos protestuan dhe kërkuan shikimin e VAR-it, por një gjë e tillë nuk ndodhi. Roki nuk u sinjalizua nga Fabri (arbitri në dhomën e VAR-it), i cili i ka patur të qarta pamjet.

“Të gjithë e pamë çfarë ndodhi, nuk është nevoja të flasim më shumë për atë rast. Dua të marr vesh se përse arbitrat e dhomës së VAR-it, nuk e panë atë rast. Është e turpshme”, reagoi Françesko Toti, ish-kapiteni legjendar i Romës.

Marçelo Niki

Për episodin e ndodhur ka reaguar dhe Marçelo Niki, presidenti i shoqatës së arbitrave në Itali. Ky i fundit ka mbetur i befasuar nga një gabim i tillë dhe ka paralajmëruar masa për personat përgjegjës.

“Nuk arrij ta kuptoj se si ndodhi një gabim i tillë, një mbikëqyrje e pakonceptueshme. Ricoli do të merret me këtë që ka ndodhur, le të kthejmë faqe dhe të rikthehemi të flasim për futboll”, sqaron shkurt Niki, duke pranuar gabimin e Fabrit. Ky i fundit duhet të sinjalizonte Rokin dhe pamjet do të detyronin arbitrin kryesor të akordonte penallti për Romën. Direkt mbas këtij episodi, Interi shënoi gol me anë të një aksioni shumë të bukur, ndërsa ndeshja u mbyll në barazim 2-2.

Dhuna ndaj arbitrave, Niki nuk duron më: Përjashtime dhe rritje gjobash

Sport Ekspres — Mon, 19 Nov 2018 11:38:09 +0000

Dhuna ndaj arbitrave po shndërrohet në një problem të madh të futbollit italian. Sidomos në ekipet e moshave. Marçelo Niki, presidenti i AIA (Shoqata Italiane e Arbitrave), është lodhur me këtë situata dhe bën thirrje për masa drastike. Gjobat duhen shtuar, por kjo nuk mjafton. Agresorët duhen përjashtuar, lojtarë dhe ekipe.

“Po ndodhin gjëra të rënda në futboll, që duhen përballuar menjëherë në mënyrë drastike. Është e paimagjinueshme që çdo vit 450 djem sulmohen në fushat e futbollit. Në ditët e fundit është folur shumë, por AIA lufton prej vitesh për të çrrënjosur këtë kancer, që ekziston në futboll. Deri tani kemi qenë të vetëm, jemi në pikën zero dhe duhet të rinisemi, sepse nuk mund të ecim përpara në këtë mënyrë.”

“Zgjidhja? Duhen ndryshuar rregullat. Jam shumë skeptik, por shpresoj që nga nesër të fillojnë të rëndohen gjobat dhe të përjashtohen skuadrat dhe lojtarët protagonistë të këtyre krimeve. Duhet të japim sinjale të forta, siç bëmë dje me Lacion. Nuk dërguam arbitra për të mbajtur ndeshjen për të reflektuar sadopak”, përfundon Marçelo Niki.