Për sfidën në fjalë kanë folur dhe dy-ish trajnerë të mëdhenj të ekipeve respektive: Arrigo Saki dhe Marçelo Lipi. I pari revolucionoi futbollin italian dhe atë europian me Milanin magjik të holandezëve, ndërsa i dyti ka fituar gjithçka me bardhezinjtë dhe është trajneri i fundit, i cili ka sjellë Champions Ligën në Torino, 22 vite më parë.

Në një prononcim për “Gazzetta dello Sport”, Saki vlerëson kualitetin e Juventusit, i jep këshillat e duhura Gatuzos dhe shpreson e mendon në një fitore të Milanit, ndërsa Lipi mendon ndryshe. Juventus është më lart, ekipi është i zemëruar pas humbjes kundër Junajtid në Champions dhe stadiumi i Milanos i sjell fat bardhezinjve.

SAKI – “Gatuzo ka një mal me të dëmtuar dhe duhet të përballet me ndeshjen e jetës në kushte të pasigurta. Përveç ekuilibrit dhe përqendrimit, kjo ndeshje kërkon organizim, forcë fizike, agresivitet dhe shpejtësi në qarkullimin e topit. Juventus është favorit për kontingjentit e lojtarëve dhe aftësinë për të zgjidhur ndeshjen në çdo moment, por futbolli është si jeta: nuk e di kurrë se çfarë do të ndodhë”

LIPI – “Do të jetë e vështirë për Milanin, sepse Juventus është i zemëruar për humbjen e parë në këtë sezon dhe mënyrën se si erdhi. Ronaldo? Ai është një makinë golash dhe vendimtar. Sa i përket ndeshjes, mendoj se do të fitojë Juventusi. ‘San Siro’ është shtëpia e dytë e bardhezinjve, të cilët zhvillojnë ndeshje të mëdha në këtë stadium. Më kujtohet një fitore 1-6 kundër Milanit dhe shumë ndeshje të mëdha kundër Interit. Megjithatë, një ditë fantastike për kundërshtarët mund të ndodhë gjithmonë.”

Lipi ka konfirmuar një gjë të tillë dhe zbulon se ka ardhur momenti për të pushuar. Me klubet e ka mbyllur përfundimisht, ndërsa një ofertë kombëtareje do e tundonte shumë. 70-vjeçari, i cili ka fituar gjithçka në karrierën e tij me Juventusin dhe Italinë, komenton dhe rritjen e futbollit kinez si dhe sekretet e një trajneri fitues në prononcimin për “Corriere dello Sport”.

SITUATA – “Kam kaluar gjashtë vite këtu, një eksperiencë e mrekullueshme që do të përfundojë me datë 31 janar pas Kupës së Azisë. Federata më ofroi një kontratë të re prej katër vitesh e gjysmë, por nuk e ndjeva ta pranoj. Kam nevojë të rikthehem në shtëpi dhe të qëndroj aty për njëfarë kohe. Kam nevojë të rikarikoj bateritë e mia, kështu që do të pushoj për të nisur me më shumë dëshirë dhe motivim. 2-3 vite punë dhe udhëtime, një vit pushim dhe përsëri rinisje. Kam gjetur që kjo është formula e duhur. Nuk do të drejtoj më klube, por një ofertë nga ndonjë kombëtare europiane, ose nga Emirates, do e merrja në konsideratë.”

KINA – “Bilanci është pozitiv. Kina është kthyer në një nga ekipet kombëtare më të forta të kontinentit dhe nuk arritëm kualifikimin për në Rusi për vetëm një pikë. Mendoj se kam bërë gjëra të mira, madje dhe në nivelin struktural, sepse i kam shtyrë klubet të investojnë në sektorët e të rinjve dhe të gjithë klubet tani kanë ekipet e tyre U15, U16, U17.”

SEKRETET E LIPIT – “Gjithmonë sa herë më ftojnë për të folur, ose në takimet mes trajnerëve, përsëris gjithmonë të njëjtën gjë. Një trajner fitues është ai që arrin të futet në kokat e lojtarëve, sidomos nëse janë kampionë. Ti mund t’u mësosh atyre mbajtjen e topit, markimin e dyfishtë, por nëse nuk krijon harmoni në grup dhe nuk je i besueshëm, nuk arrin të fitosh. Futbolli është psikologji dhe përshtatje ndaj situatave të ndryshme.