Malota

Vllaznia mban “senatorët”, rinovojnë dy futbollistë

Sport Ekspres — Tue, 16 Jul 2019 19:14:57 +0000

Vllaznia u ngjit në Superiore pas një viti mungesë, duke u renditur në vendin e parë në grupin A në Kategorinë e Parë. Ekipi me traditë i futbollit shqiptar nuk po kalon vitet më të mira, por sezoni i ri në Superiore shihet me optimizëm nga lojtarët dhe stafi teknik, që vazhdon punën me kontratat e lojtarëve dhe merkaton.

Pas afrimeve si Herald Marku dhe Dajan Shehi, Vllaznia ka rinovuar dhe me dy futbollistët aktualë të skuadrës, kapiteni Gilman Lika dhe mbrojtësi Renato Malota.

Të dy futbollistët kanë një eksperiencë shumë të madhe në Superiore dhe bashkëpunimi i tyre me Vllazninë është një plus për ekipin shkodran. Lajmi për rinovimin e dy futbollistëve e publikoi faqja zyrtare e Vllaznisë, që lajmëroi se në ditët e ardhshme do të ketë dhe rinovime të tjera.

Lojtarë në provë dhe largime, Firat paralajmëron ndryshime

Sport Ekspres — Tue, 08 Jan 2019 16:50:54 +0000

Drejtori sportiv i Vllaznisë Engin Firat, ka diskutuar para mikrofonit të “RTSH Sport” mbi planet e merkatos së dimrit te klubi shkodran. Zyrtari turk ka prekur sërish çështjen e qendërmbrojtësit Renato Malota dhe ka dhënë disa detaje për disa lojtarë që do të vien në provë në ditët në vazhdim në Shkodër

LARGIMI I MALOTËS ? – “Është folur shumë për Malotën. Ka vetëm thashetheme nuk ka asnjë ofertë, qoftë nga klubi i Kamzës apo Skënderbeut. Malota është një lojtar i rëndësishëm i Vllaznisë dhe ai do të largohet vetëm nëse për të vjen një oferta nga Emiratet e Bashkuara Arabe ose një klub europian”

MERKATO E VLLAZNISË – “Përsa i përket elementeve që mund të përforcojnë skuadrën kam folur me Hasan Likën, për të sjellë ndonjë lojtar të ri. Nëse do bëjmë afrime, do të na duhet të largojmë disa lojtarë, pasi nuk kemi financa të shendosha. Kam folur me drejtorin Lici dhe kemi ndërmend të provojmë një sulmues algjerian, një mesfushor maqedonas e një shqiptar”, tha Firat.

ZYRTARE / Malota firmos për Vllazninë

Sport Ekspres — Wed, 10 Jan 2018 17:58:56 +0000

Renato Malota është përforcimi më i fundit i Vllaznisë dhe ka firmosur mbrëmjen e sotme, mëson Sport Ekspres. Ditë plot ngjarje te klubi shkodran, që më herët ka prezantuar mbrojtësin Ergis Mersini, ndërsa tani merr edhe qendërmbrojtës.

Malota u largua nga Partizani vetëm para pak ditësh, duke u përjashtuar në mënyrë të paqartë, sepse nuk ka pasur asnjë komunikatë zyrtare nga klubi i kuq.

Gjithsesi, ish-mbrojtësi i Kukësit nuk ka polemizuar dhe ka gjetur menjëherë ekip, duke pranuar ofertën e Vllaznisë, edhe pse kishte 2-3 oferta të tjera.

Nesër Malota do të jetë në Ulqin, për të nisur stërvitjen me ekipin e ri.

Vllaznia pret Malotën, vendoset sot

Sport Ekspres — Wed, 10 Jan 2018 14:59:57 +0000

Renato Malota është pranë transferimit te Vllaznia, edhe pse nuk ka ende firma. Mbrojtësi, i cili para pak ditësh mbylli aventurën te Partizani, nuk do të qëndrojë gjatë pa ekip, pasi ka disa oferta, ku e para i ka ardhur nga Vllaznia.

Megjithatë, për Malotën ka interesim edhe nga jashtë, ndaj është lënë gjithçka pezull dhe me shumë gjasa sot vendoset për gjithçka.

Vllaznia i ka kërkuar Malotës të vendosë deri sot pasdite, ndaj në mbrëmje pritet vendimi final.

Malota kalon me sukses operacionin

Sport Ekspres — Fri, 16 Jun 2017 17:40:40 +0000

Qendërmbrojtësi i Partizanit Renato Malota i është nënshtruar sot ndërhyrjes kirurgjikale në gju, në një nga spitalet e kryeqytetit. Faqja e Partizanit njofton se ndërhyrja në menisk ka përfunduar me sukses. Dëmtimi i marrë në fundin e sezonit i ka kushtuar mbrojtësit lezhjan që të humbasë kupat e Europës.

Lojtari ka gjetur mbështetjen e drejtuesve të nënkampionëve, të cilët e kanë vizituar Malotën në përfundim të operacionit. Luçiano Moxhi, Genc Tomorri dhe Edmond Haxhija kanë parë nga afër gjendjen e lojtarit dhe i kanë dhënë atij mbështetjen e tyre. 28-vjeçari do të nisë gradualisht fazën e rikuperimit me synimin për të qenë sa më parë i gatshëm për skuadrën. Gjatë këtij sezonin Malota u aktivizua në 20 takime, 18 prej të cilave i nisi si titullar, madje duke arritur të realizojë dhe një gol përballë Tiranës, në derbin e fazës së tretë.