Mallorca

VIDEO | Finale e pabesueshme në Spanjë, elitës i kthehet ish-ekipi i Etosë

Sport Ekspres — Sun, 23 Jun 2019 20:59:34 +0000

Majorka i jep fund vuajtjeve dhe endjeve në kategoritë inferiore, pasi sot ka siguruar rikthimin në elitë, pas gjashtë vitesh. Spanjollët kishin provuar edhe ligën e tretë, ndërkohë që humbja 2-0 në ndeshjen e parë me Deportivo La Korunja i zvogëlonte shanset për një rikthim në La Liga.

Gjithsesi Majorka ka bërë mrekullinë, duke triumfuar në ndeshjen e sotme me rezultatin 3-0. Duhej një gol i shpejtë dhe u bë realitet në minutën e 20-të. Budimir bëri gjithçka mirë në hyrje të zonës dhe më pas u tregua i saktë me goditjen e tij, duke çuar stadiumin peshë.

Një shkëndijë duhej, kurse zjarri do të ndizej në pjesën e dytë. Sevija ekzekutoi në mënyrë perfekte një goditje dënimi dhe ëndrra La Liga nisi të marrë jetë. Një gol i mrekullueshëm, që do të pasohej nga një tjetër perlë e realizuar nga Prats. Përmbysje e çmendur e skuadrës ishullore, që tani kthehet mes skuadrave më të mira në Spanjë. Mrekulli!

VIDEO | Fitorja nuk mjafton, Albasete dhe Manaj mbeten në Segunda Divizion

Sport Ekspres — Sun, 16 Jun 2019 19:29:02 +0000

Ëndrra “La Liga” ka marrë fund për Rei Manajn. Skuadra ku luan sulmuesi lushnjar, Albasete, fitoi 1 – 0 takimin e sotëm kundër Majorkës, por ky rezultat nuk mjaftoi për të përmbysur humbjen 2 – 0 që Albasete pësoi në takimin e parë ndaj ishullorëve.

Manaj rrezikoi disa herë portën e Majorkës, por portieri i ishullorëve Manolo Reina u kthye në një makth për të dhe sulmuesit e tjerë të Albasetes. Majorka do të ndeshjet në finale me Deportivo La Korunjën.

Skuadra galiciane eliminoi Malagën duke fituar të dyja takimet (4 – 2) (0 – 1 ). Finalja do të jetë me format me dy takime. Ndeshjet do të zhvillohen më datë 20 dhe 23 qershor.

https://www.youtube.com/watch?v=nt3jUCe7TEk

E quajnë vrasës, Manaj: Shumë kërcenime ndaj meje, ishte e pavullnetshme!

Sport Ekspres — Sun, 23 Sep 2018 14:04:21 +0000

Rei Manaj ka folur pas sfidës së sotme që ekipi i tij Albasete zhvilloi në fushën e Majorkës. Lojtari jonë i kombëtares nuk pati një ndeshje të lehtë teksa e vetmja gjë pozitive ishte fitorja e Albasetes dhe goli i shënuar nga Manaj në një sfidë që përfundoi 2-3 në favor të ekipit të Manaj.

Ajo që ra në sy ishte incidenti i ndodhur ndërmjet Manajt dhe lojtarit të Majorkës, Xisco. Lojtari i Majorkës pësoi një dëmtim në kokë dhe u transportua me urgjencë në spital. Tifozët e Majorkës reaguan mjaft ashpër ndaj sulmuesit tonë teksa dhe mori shumë vërshëllima dhe thirrje në kor “asesino”, që në shqip përkthehet vrasës. Për këtë ngjarje të rëndë ka folur pikërisht Manaj, i cili ka dhënë një deklaratë në fund të takimit.

“Më vjen shumë keq për atë që ndodhi me Xiscon dhe shpresoj që ai të jetë mirë. Çdo gjë ishte e pavullnetshme, pasi unë u nisa për të kapur topin. Ishte shumë e vështirë ajo që ndodhi. Kam marrë shumë mesazhe kërcënuese në rrjete sociale si dhe në fushë. Dhe një herë më vjen keq për atë çfarë ndodhi.”

Gjithashtu Manaj foli shkurtimisht dhe për golin e shënuar. “Zozulia është një lojtar me të vërtetë fantastik, më dha një top shumë të mirë tek goli dhe jam shumë i lumtur, si për golin ashtu dhe për fitoren. Duhet të vazhdojmë kështu dhe të qëndrojmë më këmbë në tokë”, ka përfunduar sulmuesi i kombëtares sonë.