Malick Mane

Laçi e afroi me bujë, tani firmos në Kazakistan

Sport Ekspres — Thu, 04 Jul 2019 12:38:33 +0000

Malik Mane ishte një nga afrimet që Laçi bëri në merkaton e janarit. Sulmuesi senegalez, i cili kishte një “CV” të kënaqshme dhe në kampin kurbinase prisnin shumë, nuk shënoi dot asnjë gol me fanellën bardhezi. 30-vjeçari ishte ndër më të paguarit në skuadër dhe me paraqitjet e bëra nuk bindi për të rinovuar.

Mane u largua pa përfunduar sezoni dhe me fanellën e Laçit u aktivizua në 13 ndeshje (7 titullar) në Superiore. Tashmë ai ka gjetur skuadrën e re dhe është kthyer sërish në Kazakistan, aty ku kishte luajtur tre sezonet e fundit me Taraz dhe Akzhayik. Në të shkuarën ai ka qenë pjesë edhe e Aktobe.

Sulmuesi ka nënshkruar për klubin e Atyrai, që garon në elitën e futbollit kazak dhe gjithçka është zyrtare. Sa i takon kontratës, nuk jepet informacion se për sa kohë sulmuesi ka firmosur.

Erdhi me bujë në janar, Laçi e mbyll me sulmuesin

Sport Ekspres — Thu, 30 May 2019 20:40:48 +0000

Laçi nuk ia doli të renditej dot në vendin e tretë në kampionat, por ende ka shanse për kupat e Europës dhe gjithçka varet nga licencimet dhe vendimi i CAS për Skënderbeun. Kurbinasit janë në pritje dhe më pas do të projektohen edhe lëvizjet që do të bëhen në verë.

Pa u mbyllur ende kampionati, të konfirmuara janë disa largime. Ivan Galiç dhe Bojan Najdenov prej kohëhs kanë tërhequr lejekalimin dhe kanë dalë lojtarë të lirë. Prej të dyve pritej shumë gjatë këtij sezoni, por gjërat nuk shkuan mirë. Anësori kroat ishte i pafat, pasi pësoi një dëmtim në Kupë me Naftëtarin dhe në kampionat as që ia doli të luante me bardhezinjtë.

Tanimë me Laçin e mbyll edhe një lojtar tjetër dhe ai është sulmuesi Malik Mane. Senegalezi, i cili la Kazakistanin për Superioren, nuk ia doli dot të shënonte në 13 ndeshje në kampionat me fanellën bardhezi.

Laçit i vjen sulmuesi nga Senegali, Starova bën planin

Sport Ekspres — Mon, 13 May 2019 16:46:59 +0000

Laçi mori tre pikët me Kamzën në tavolinë dhe kurbinasit tani renditen në vendin e katërt. Fitorja e Teutës në Korçë sigurisht ua ka prishur disi planet bardhezinjve, që kërkojnë vendin e tretë që të çon direkt në kupat e Europës.

Gjithsesi duhet parë te ndeshja e radhës, që zhvillohet në transfertë me Flamurtarin. Vlerësimi është maksimal për kuqezinjtë e drejtuar nga Ilir Daja. Për këtë ndeshje mungesë e sigurt te Laçi është sulmuesi Nikola Okpotu.

Nigeriani u ndëshkua me karton të verdhë ndaj Kastriotit dhe për të ishte i katërti. Kështu ai duhet të vuajë pezullimin dhe trajneri Starova mendon se kë do të aktivizojë në sulm. Në sfidën me krutanët nuk ishte as Malik Mane.

Senegalezi kishte marrë leje në klub për arsye familjare dhe është rikthyer sikurse pritej. Mane është bashkuar me grupin dhe është stërvitur normalisht. Stafi teknik mund t’i bëjë llogaritë me të për ndeshjen e radhës me Flamurtarin.

Laçi në kërkim të goleadorit, dalin dy emra në skenë

Sport Ekspres — Tue, 15 Jan 2019 19:39:08 +0000

Një sulmues është objektivi kryesor i Laçit për merkaton e janarit. Bardhezinjtë kanë afruar në ekip mbrojtësin Ceka, mesfushorin Çokaj dhe portierin Sali, ndërsa tashmë duket se kanë gjetur sulmuesin e munguar.

Siç raporton “A2 News”, dy emra po lakohen si opsion për repartin ofensiv të ekipit kurbinas. Laçi po negocion me Xheferson Kojazos, 28-vjeçarin nga Kolumbia. Sulmuesi luan me ekipin peruan të UTC Cajamarca, ku ka shënuar katër gola këtë sezon.

Xheferson Kojazos

Emri tjetër vjen nga Senegali dhe quhet Malik Mane. 30-vjeçari është pjesë e ekipit kazak të Akzhaikit, aty ku ka shënuar nëntë gola këtë sezon. Mane është një sulmues me eksperiencë, ndërsa më parë është aktivizuar në Suedi me Goteborgun dhe ka provuar të aktivizohet me disa ekipe në Norvegji.

Bardhezinjtë po tentojnë të mbyllin akordin me të paktë njërin prej tyre për t’i dhuruar trajnerit Prenga një emër të ri në repartin e sulmit.