Madagaskar

VIDEO | Fitore pas tragjedisë, Madagaskari pranë arritjes historike

Sport Ekspres — Thu, 27 Jun 2019 16:58:42 +0000

Kombëtarja e Madagaskarit nuk e pati aspak të lehtë të futej në fushë në ndeshjen e vlefshme për fazën e grupeve të Kupës së Kombeve të Afrikës kundër Burundit. Pak orë më parë një tragjedi kishte ndodhur në vendlindje, pikërisht në stadiumin kombëtar të Madagaskarit.

Gjatë festimeve të ditës së pavarësisë situata doli jashtë kontrollit dhe në rrëmujë e sipër 16 vetë u vranë nga shtypja e turmës, dhe 100 të tjerë ndodhen të shtruar në spital. Për të gëzuar zemrat e 25 milionë banorëve mendoi kombëtarja e futbollit që tani është pranë suksesit historik.

Goli i mesfushorit Ilaimaharitra i dha tri pikët Madagaskarit, që tani e gjen veten me një këmbë në fazën 1/8-ave, një arritje historike po të marrim parasysh faktin se kjo është hera e parë në histori që shteti ishullor kualifikohet në këtë kompeticion pas më shumë se 6 dekadash përpjekje të vazhdueshme.

Madagaskar 1 – 0 Burundi
Shënues: Ilaimaharitra 76′

Standings provided by Sofascore LiveScore

Madagaskari arrin suksesin historik, por çfarë belaje i ka gjetur komentatorët e gazetarët

Sport Ekspres — Tue, 16 Oct 2018 20:30:22 +0000

Kombëtarja e Madagaskarit shkroi historinë duke u kualifikuar në “Kupën e Afrikës 2019”, falë fitores 1-0 ndaj Guinesë Ekuatoriale. Kjo është hera e parë që Madagaskari përfaqësohet në këtë kompeticion, pas vitesh të tëra zhgënjimesh të njëpasnjëshme.

Por, krahas gëzimit të milionave personave në ishullin e Madagaskarit ka dhe një problem të madh që prek më së shumti gazetarët dhe komentatorët, që do mbulojnë turneun madhor të futbollit afrikan. Arsyeja ka të bëjë me mbiemrat tmerrësisht të gjatë të futbollistëve të kombëtares së Madagaskarit, që janë shumë të ndërlikuar.

Stefan Raheriharimanana, Paskal Razakanantenaina, Zotsara Randriambololona, Lalaina Nomenjanahary, Ando Rakotondrazaka… etj. Këto janë disa nga emrat e futbollistëve të kombëtares, ndoshta si rrallëherë do të duhet që lojtarëve tu thuhet vetëm emri, ose t’i kërkohet ndonjë nofkë, pasi emrat e lartpërmendur do të trullosnin edhe komentatorët më të zotë.