NDRYSHIMI  I FORMULËS – “Normalisht për sezonin që vjen s’do të preket numri i skuadrave, pasi rregullorja e thotë që klubet duhet një njoftohen një vit para për ndryshimet e formulës. Ne planifikojmë që pas dy ose tre vitesh të kemi një numër të reduktuar skuadrash. Kjo do të hidhet si ide në mbledhjen e komitetit të garave. Mund të jetë një reformë e dhimbshme për disa nga klubet e kësaj kategoria. Ndoshta në të ardhmen nuk do të kemi më dy grupe, kjo ndarje është bërë më parë për të zvogëluar shpenzimet e transportit. Ne synojmë që ta çojmë Kategorinë  e Parë sa më afër Superiores. Këto javë do ulemi në tavolinë me klubet dhe më pas vendimi final do të merret nga komiteti ekzekutiv. Skema do të miratohet para hedhjes së shortit, pra nga fillimi i muajit gusht”.

INFRASTRUKTURA – “Skuadrat që nuk kanë mundësi për të zhvilluar ndeshjet në qytetet e tyre, do t’u vendoset një afat 2-vjeçar për të plotësuar kushtet në stadiumet e tyre. Këtë sezon kemi pasur raste si Veleçiku dhe Vora të cilat nuk kanë luajtur në kushtet e tyre. Vora për shembull i ka pasur mundësitë për të filluar punën për një stadium në qytetin e tyre. E ka thënë dhe presidenti Duka, do fillojmë vitin 0 përsa i përket licencimeve. Klubet duhet të investojnë për të krijuar kushtet për të ardhur në Superiore. Nuk duam të kemi më raste si Kastrioti që luan jashtë qytetit të tyre”.

PRECEDENTI KAMZA – “Me rënien e ekipit të Kamzës u krye një mundësia për një skuadër të tretë që të plotësonte numrin e 20 ekipeve që duhet për të plotësuar Kategorinë e Parë. U mendua që t’i jepej mundësia humbësve të “Play-Off”-it, ky vendim u vendos për shkak të infrastrukturës dhe kritereve të cilat klubet e Kategorisë së Parë i kanë më të mira. Marrim për shembull ekipin e Gramshit që ka një stadium të amortizuar që me shumë mundësi nuk do të plotësojë as kushtet e licencimit për Kategorinë e Dytë”.

LICENCIMET E DEVOLLIT DHE TËRBUNIT – “Mesa dijeni kam unë Tërbuni i ka kushtet minimale për të luajtur në Kategorinë e Parë, por për këtë do të kryhet një inspektim nga sektori i licencimit. Devolli ka goxha punë për të bërë pasi është një stadium i ri, por duke parë puën dhe dëshirën e drejtuesve them se këto kushte do të plotësohen shumë shpejt”.

KATEGORIA SUPERIORE – “Skema aktuale e Kategorisë Superiore funksionin mirë. S’do të ketë ndryshime. Ndoshta në të ardhmen nëse nuk do kemi më kaq shumë probleme me licencimet mund të rritet numri i ekipeve në Kategorinë Superiore”.

VLLAZNIA – “Në grupin e veriut ka pasur shumë pak konkurrencë për kreun. Në grupin e jugut situata ka qenë disi me ndryshe me dy, tri ekipe që luftuan për kreun. Vllaznia tani duhet të mendojë për përforcimet, pasi siç dihet diferencat midis Kategorisë së Parë dhe Superiores është shumë e lartë. Rikthim i Vllaznisë i bën mirë Superiores, është një klub i madh me një stadium të mirë”.

BYLIS – “Ishte një nga skuadrat më të mira përsa i përket organizimit. Kanë një stadium që plotëson shumicën e kritereve e Superligës, megjithatë kanë ende disa kushte për të plotësuar, si vendet e posaçme për mediet, kamerat e transmetimit dhe kamerat e sigurisë dhe dhoma e kontrollit. Edhe përsa i përket gjobave, janë ndër ekipet që janë gjobitur më pak, kjo tregon edhe një emancipim të drejtuesve, të cilët nuk e shohin futbollin si një arenë lufte”.

DHUNA NË KAMËZ – “Ato pamje na kthyen vite mbrapa, si rrjedhojë vetë arbitrat kanë menduar se bojkotimi do të shërbejë si një shtysë që gjëra të tilla të mos ndodhin më”.

TAKIMI I TË HËNËS – “Të hënën në orën 11 do të zhvillohet një mbledhje ku do të jetë i pranishëm kryeministri Edi Rama, krerë të tjerë të shtetit, presidenti i FSHF-së, Armando Duka, dhe pjesa më e madhe e presidentëve të klubeve shqiptare”.

“Tema më e nxehtë do të jetë rikthimi i policisë në stadiume. Federata në emër të klubeve do t’i kërkojë qeverisë ndryshimin në lidhje me ligjin që ndalon policinë nga të qenit brenda në stadium. Me stjuart siguria nuk mund të garantohet”.

“Policia e shtetit në deklaratën e saj përmendi që vetëm dy stadiume i plotësojnë kushtet, por duhet të jemi të vetëdijshëm se futbolli luhet në çdo cep të Shqipërisë. Stadiumet e kategorive të ulëta u duhet të plotësojnë disa kushte minimale. Duhet të jemi realist nuk mund t’i kërkojmë atyre ekipeve amatore të vendosin kamera”.

“Përsa i përket Superiores mendoj se stadiumet e së ardhmes së Shqipërisë duhet të jenë pa rrethime të larta, ashtu siç janë në të gjithë Europën. Nuk duhet të mendojmë për më të keqen”.

“Ne po kërkojmë ndryshimin e nenit 51 në ligjin e sportit, në mënyrë që policia të garantojë sigurinë në stadiume. Këtë sezon pa policinë brenda rrethimit të stadiumit kemi pasur probleme gjatë ndeshjeve të tensionuara kur kemi pasur shumë vonesa”.

“Në takimet e mëparshme me drejtues të policisë, kur i kemi pyetur përse ky lloj ndryshimi në ligjin në stadiume, ata janë përgjigjur se ka ardhur si pasojë e përputhjes me standardet evropiane. Përsa i përket pagesës ndaj Policisë, më duhet të them se FSHF është e vetmja federatë sportive në Shqipëri që nuk përfiton fonde financiare nga buxheti i shtetit”.

KËRKESAT E TJERA – “Të gjitha kërkesat e presidentëve do parashtrohen ditën e hënë. Do prezantojmë një paketë të përbashkët. Kjo pjesa e lehtësirave/subvencioneve financiare është disi e vështirë të arrihet të them të drejtën”.

KALENDARI – “Klubet janë të lajmëruara, kalendari nuk ka ndryshuar. Shpresoj që ditën e hënë të kemi një konsensus dhe të martën gjithçka do të rifillojë normalisht”.

“Besoj se të hënën do të merret një vendim për të pasur policinë brenda rrethimit të stadiumit, duke qenë ata garantuesit e sigurisë në stadiume”.

KAMZA – “Ekipi i Kamzës ka kërkuar një vendim të arsyetuar, pra shpjegimin juridik, që është  e drejtë e çdo klubi. Më pas ata mund të tentojnë apelimin. Më pas duhet të presim vendimin e Apelit për të parë se çfarë do të ndodhi”.

Për gjithçka po ndodh, shefi i Sektorit të Garave, Lysien Nurishmi, shprehet kështu: “Në këtë rast dhuna nis nga tribuna, janë zyrtarë që futen në fushë. Jemi të mendimit që duhet të vinte gradualisht largimi i policisë, jo të ikte komplet. Prania në pistë apo në tunele është një frenim. Nuk është se policia e ndalon plotësisht. Nëse ka masa paraprake, minimizohen rastet e dhunës”.

Më tej, në deklaratën e tij për “Supersport”, Nurishmi shtoi: “Kemi zyrtarë që futen dhe krijojnë dhunë. U bëj thirrje klubeve të jenë të ndërgjegjshëm për organizimin e ndeshjeve. Janë një numër i madh takimesh qe luhen në gjithë Shqipërinë. Normalisht Policia e ka të pamundur t’i mbulojë të gjitha, por klubet e kanë detyrim oficerin e sigurisë dhe duhet të ketë një bashkëpunim mes palëve. Prania e disa zyrtarëve të Policisë në dhomat e kontrollit, apo gatishmëria e tyre është me rëndësi. Duhet të jenë aty për të ndërhyrë kur duhet, jo pasi të kenë ndodhur aktet e dhunës”.

GJENDJA E STADIUMEVE – Policia e Shtetit, disa ditë më parë deklaroi se vetëm “Loro Boriçi” dhe “Elbasan Arena” plotësojnë kushtet e sigurisë. Por Nyrishmi shprehet se jo çdo klub mund të ketë impiante të tilla: “Edhe vetë UEFA ka disa kategori stadiumesh. Një klub nuk është e thënë që të ketë stadium me kamera. Nuk mund të kërkosh në Memaliaj e Tepelenë të kenë kamera, pasi luajnë në Kategorinë e Dytë. Në Superiore duhet t’i kenë kamerat, zonën VIP etj. Atalanta, për shembull, në Itali luan në shtëpi në kampionat, kurse në kupat e Europës luan në stadium tjetër ku UEFA e lejon”.