Luzi

Elbasani feston me “tris”, arrihet mbijetesa në të Parën

Sport Ekspres — Fri, 24 May 2019 16:01:15 +0000

Elbasani ka marrë një fitore bindëse 3-0 përballë Luzi 2008, duke siguruar kështu qëndrimin në Kategorinë e Parë dhe në sezonin e ardhshëm. Dopieta e Micit dhe goli i Ferhatit kanë mjaftuar që Elbasani të triumfojë, duke shmangur kështu ndonjë surprizë të pakëndshme.

Ndeshja ishte shumë e luftuar dhe ndërhyrjet ishin të shumta. Gjyqtari kryesor i takimit pati shumë punë, pasi në këto 90 minuta, e tregoi kartonin e verdhë plot 7 herë. Pjesa e parë dukej se do të mbyllej pa gola, por në çastet e fundit, gjyqatri akordon një 11-metërsh për Elbasanin, që ekzekutohet me sukses nga Mici.

Pjesa e dytë, nisi sërish me shumë faulle të ndëshkueshme, ndërsa në minutën e 65’, Mici shënon golin e dytë në këtë takim dhe më pas Ferhati shënon golin e nokautit në minutat e fundit të kohës shtesë duke i siguruar fitoren Elbasanit, që merr një triumf tepër të rëndësishëm në këtë ndeshje finale.

Kategoria e Parë, Play-Off

Elbasani – Luzi 2008 3-0
Shënues: Mici 45’ (pen) 65’, Ferhati 90+1

Kategoria e Dytë | Ekipet e kreut nuk falin, Shkumbini dhe Luzi “sundojnë”

Sport Ekspres — Sun, 07 Apr 2019 16:11:56 +0000

Nuk njohin hapa fals ekipet e kreut në Kategorinë e Dytë. Në ndeshjet e zhvilluara sot, Shkumbini, Devolli, Maliqi dhe Albpetrol kanë marrë tri pikët në takimet respektive. Peqinasit vijojnë të mbajnë kryesimin me një pikë më shumë se skuadra nga Bilishti, ndërsa Maliqi dhe Albeptroli qëndrojnë në vend të tretë dhe të katërt me 43 pikë, tetë më pak se kryesuesit.

Luzi rikthehet në krye të Grupit A falë fitoren së sotme ndaj Kukësit B. Skuadra nga rrethi i Kavajas shkon në kuotën e 38 pikëve, një më shumë se ndjekësit Tërbuni dhe dy më shumë se Gramshi i vendit të tretë, por më dy ndeshje avantazh ndaj rivalëve.

Java 20 / Grupi B

Maliqi 1 – 0 Naftëtari
Këlcyra 2 – 3 Shkumbini
Devolli 4 – 2 Delvina
Përmeti 2 – 1 Skrapari
Butrinti 0 – 1 Albpetrol
Gramozi 3 – 1 Memaliaj

Java 20 / Grupi A
Dje
Tërbuni 8 – 2 Ada
Vllaznia B 1 – 0 Internacional
Tirana B 1 – 2 Spartaku
Gramshi 1 – 0 Klosi
Sot
Kukësi B 0 – 3 Luzi 2008

Kategoria e Dytë | Luzi kap kreun, Shkumbini e Devolli njohin vetëm fitore

Sport Ekspres — Sun, 17 Mar 2019 16:22:10 +0000

Janë luajtur sot ndeshjet e javës së 17-të të Kategorisë së Dytë. Në Grupin A, Luzi 2008 është rikthyer krye të tabelës me 31 pikë falë fitores 3 – 1 ndaj Tiranës B. Ndeshja tjetër e këtij grupi midis Kukësit B dhe Sopotit ka mbaruar me fitoren e thellë të librazhdasve me rezultatin 4 – 1.

Në grupin B vazhdon lufta e fortë për kreun midis Shkumbinit dhe Devollit. Peqinasit mundën Butrintin me rezultat minimal 1 – 0, ndërsa më të njëjtat shifra ka marrë tri pikët dhe skuadra juglindore në transfertën ndaj Këlcyrës.

Duel tjetër interesant i kësaj jave ishte ai midis Naftëtarit dhe Përmetit, që ndajnë vendet e fundit të tabelës në Grupin B. Kuçovarët mposhtën ekipin mik me rezultatin 2 – 0 dhe falë kësaj fitoreje lënë fundin e tabelës.

KATEGORIA E DYTË | Tërbuni dhe Luzi “copëtohen” për një pikë, Këlcyra fiton derbin dhe zhyt Përmetin

Sport Ekspres — Sun, 03 Mar 2019 16:30:08 +0000

Përballja midis Tërbunit dhe Luzit rezultoi të ishte një ndeshje shumë e luftuar, por në fund nuk pati fitues dhe ndeshje u mbyll me shifra të barabarta 2-2 . Dy ekipet e kreut zhvilluan një 90 minutësh ku mbizotëroi loja e fortë, gjë që dëshmohet nga numri i lartë i kartonëve të verdhë, plot 9 të tillë. Aktualisht skuadrat ndajnë vendin e parë me nga 28 pikë, por pukjanët kanë një ndeshje më pak.

Gara për kreun mund të ishte mbyllur para kohe, nëse fitonte Tërbuni, por tashmë gjithçka mbetet e hapur dhe në lojë janë disa ekipe, përfshirë Gramshin e vendit të pestë, që duhet të rikuperojë dy ndeshje.

Në Grupin B, derbi midis Përmetit dhe Këlcyrës është fituar nga miqtë me rezultatin 2 – 2. Me këtë humbje Përmeti qëndron në vendin e fundit të tabelës me vetëm 10 pikë pas 16 javësh kampionat, po aq sa Naftëtari. Shkumbini kryesues nuk u ndal as këtë javë, teksa mundi në transfertë Tepelenën me rezultatin 3 – 0. Tani sytë e peqinasve janë nga me sytë nga takimi i ditës së nesërme midis Maliqit dhe Devollit.

Luzi sulmon kreun, “tris” Klosit në transfertë

Sport Ekspres — Wed, 20 Feb 2019 15:14:09 +0000

Luzi i afrohet kreut të renditjes, pasi ka arritur të kalojë me sukses Klosin me rezultatin 1-3. Ndeshja e luajtur në Burrel nisi me një gol të skuadrës vendase, që me anë të Pengilit shënoi golin e avantazhit. Gjithsesi festa nuk zgjati shumë.

Baholli në minutën e 27-të arriti të vendoste baraspeshën dhe pjesa e parë u mbyll me shifrat 1-1. Luzi, për vetë objektivat që ka, duhet të shënonte edhe golin e dytë dhe ia arriti përmes Hasës. Ky i fundit realizoi pas rreth çerek ore lojë që kishte nisur fraksioni i dytë.

I njëjti futbollit realizoi në të 76’ edhe golin e qetësisë dhe me shifrat 1-3 përfundoi i gjithë takimi. Tre pikë të rëndësishme për Luzin, që tashmë e sheh veten një pikë larg Tërbunit kryesues. Javën e ardhshme pukjanët janë pushim dhe për Luzin është në program një finale e vogël me Gramshin, që gjithashtu do ngjitjen në Kategorinë e Parë.

Kategoria e Dytë – Java 15
Klosi – Luzi 1-3
Shënues: Pengili 13’ / Baholli 27’, Hasa 59’, 76’

Tomori mposht Luzin, Vllaznia prenoton një rival për miqësore

Sport Ekspres — Fri, 25 Jan 2019 15:14:07 +0000

Tomori ka zhvilluar ndeshjen e fundit miqësore para nisjes së kampionatit. Beratasit u përballën me Luzin dhe fituan me rezultatin e ngushtë 1-0. Vendimtar me golin e tij ishte mbrojtësi Paja, i cili është graduar edhe kapiten së fundmi. Tanimë beratasit do të mendojnë për ndeshjen e parë në kampionat që e kanë kundër Turbinës në transfertë.

MIQËSORE – E PREMTE, MË 25 JANAR
Tomori-Luzi 1-0
Shënues: Paja 39’

Tomori: Kaloshi, Shaqe, Beci, Dore, Paja, Gjonaj, Koleci, Dyca, Sharavolli, Drabo, Dervishi. Tr. S. Dule

U aktivizuan: Braçe, Mersini, Kumani, Hoxha, Mahmutaj, Lirëza, Hadaj, Xherimeja, Qengji

Luzi 2008: Bushi, Leçini, Hasa, Xhakolli, Toli, Baholli, Zhava, Mziu, Gjoka, Barçi, Tavani. Tr. L. Pashaj

U aktivizuan: Sula, Masha, Thaçi, Hasaj, Sulaj, Çallkoj, Asllani

Kartonë të verdhë: Dore / Hasa

NJOFTIMI I VLLAZNISË – “Skuadra e Vllaznisë do ta shfrytëzojë edhe këtë fundjavë pa ndeshje zyrtare për të zhvilluar një takim miqësor. Kështu, është rënë dakord dhe nesër në orën 11.00 në fushën sportive ‘Reshit Rusi’ do të luhet ndeshja kundër ekipit të Burrelit. Një 90-minutësh që do t’i shërbejë trajnerëve Lika e Plori si testi përfundimtar një javë përpara nisjes së ndeshjeve të gjysmës së dytë të kampionatit. Vllaznia luajti edhe të mërkurën për kupë ndaj Kamzës dhe tashmë edhe me këtë miqësore, do të jetë gati për sfidën e javës së ardhshme ndaj Erzenit me të cilën do të rinisë kampionati”, njofton klubi shkodran.

Luzi “all in” për objektivin historik, vijnë dy sulmues nga Kategoria e Parë

Sport Ekspres — Sun, 20 Jan 2019 12:11:28 +0000

Skuadra e Luzit ka afruar dy sulmues me eksperiencë nga Kategorisë e Parë. Armand Pasha dhe Samet Gjoka janë dy përforcimet e klubit që militon në Kategorinë e Dytë. Të dy lojtarët kanë eksperiencë të madhe në futbollin shqiptar dhe pritet të bëjnë diferencën në Kategorinë e Dytë.

Pasha vjen nga skuadra Besëlidhjes, ndërkohë që në të shkuarën ka luajtur për Erzenin, Besën dhe Ilirinë. Gjoka e nisi pjesën e parë të sezonit , me Erzenin, ku u aktivizua në 13 ndeshje, ndërsa në të shkuarën 29-vjeçari është shpallur dy herë fitues i Kategorisë së Parë me Egnatian, Gramshin.

Drejtuesit e Luzit janë të vendosur që të sigurojnë për të parën herë në histori, kalimin e Luzit në Kategorinë e Parë, çka shpjegon dhe afrimet cilësore të merkato dimërore. Aktualisht ekipi i Luzit ndodhet në vendin e tretë në Grupin B, një pikë larg kryesuesve të Tërbunit.

RENDITJA E KATEGORISË SË DYTË, GRUPI B

Shkumbini kap sërish majën, Tërbuni mbetet në krye pa luajtur!

Sport Ekspres — Sun, 02 Dec 2018 18:02:34 +0000

Shkumbini i ka kuruar me shpejtësi plagët e ndeshjes katastrofë në Kuçovë para një muaji, sepse sot ka fituar 2-0 në Skrapar dhe ka qenë fitorja e tretë rresht në kampionat, me 9 gola të shënuar në total.

Një ndeshje mjaft e mirë nga Shkumbini në Çorovodë, që duket se është bërë edhe më i egër dhe më i vendosur, pas padrejtësive në Kuçovë.

Nga një gol në çdo pjesë, i pari autogol, kanë mjaftuar që Shkumbini të marrë fitoren dhe të kapë sërish kreun e tabelës në grupin B të Kategorisë së Dytë, sepse Maliqi u mund bujshëm në Delvinë, në një sfidë të çmendur që përfundoi 3-2. Trëndafili shënoi 2 gola në 20 minutat e para për Maliqin, por Rugji në minutën e 39-të dhe Mehmeti me dy gola brenda një minute në fillim të pjesës së dytë sollën përmbysjen e madhe.

Fluturon edhe Devolli, fitues 1-0 në Memaliaj dhe tashmë me pikë të barabarta me Shkumbinin dhe Maliqin në krye.

GRUPI A – Tërbuni i Pukës është ende kryesues në grupin A të Kategorisë së Dytë, edhe pse sot nuk luajti. Pukjanët prisnin Tiranën B, por kjo e fundit nuk denjoi të paraqitej, për arsye të motit të acartë dhe shpenzimit të madh për të shkuar në Pukë. Tërbuni ka shpenzuar nga ana e vet, më kot, sepse lojtarët kanë dalë në fushë, kanë bërë zakonin dhe është dhënë fitorja 3-0 në tavolinë sipas rregullores.

Asnjë çudi në ndeshjet e tjera, sepse Luzi ka fituar 2-1 në Pezë-Helmës ndaj Internacionalit, Gramshi ka shpartalluar Vllazninë B 4-0 dhe Sopoti fitoi 4-1 në transfertë ndaj Klosit.

Kategoria e Dytë | Tërbuni dhe Luzi nuk dinë të ndalen, “ngec” Shkumbini

Sport Ekspres — Sun, 28 Oct 2018 16:52:22 +0000

Janë zhvilluar sot ndeshjet e javës së gjashtë në Kategorinë e Dytë. Në Grupin A, kryesuesit e Tërbunit dhe Luzi 2008 kanë arritur të fitojnë për të tretën herë radhazi. Pukjanët kanë mundur 2-1 Spartakun, ndërsa Luzi 2008 ka fituar në tranfertë 0-2 ndaj Sopotit.

Në Grupin B, kryesuesit e Shkumbinit janë ndalur pas tri fitoreve radhazi nga Devolli. Peqinasit nuk shkuan më shumë se një barazim 1-1 në takimin ndaj Devollit. Hapi fals i Shkumbinit është shfrytëzuar mirë nga Maliqi. Skuadra juglindore mundi 3-0 Memaliajn dhe kap kreun me pikë të barabarta me Shkumbinin

REZULTATET DHE TABELA E GRUPIT A

REZULTATET DHE TABELA E GRUPIT B