Luzi 2008

Suta tek Elbasani? Tekniku: Mora dy oferta, por kam kontratë

Sport Ekspres — Mon, 01 Jul 2019 09:52:02 +0000

Trajneri i Luzi 2008, Anxhelo Suta, ka dalë këto ditë në skenën e merkatos për stolin e Elbasanit. Në një bisedë me SportEkspres.com, ai deklaroi se gjatë këtyre ditëve i kanë ardhur dy oferta nga klube të Kategorisë së Parë, por jo zyrtare. Pasi e mbylli me skuadrën kavajase sezonin e kaluar, por pa suksesin e pretenduar për t’u ngjitur në Kategorinë e Parë, Suta tregon se edhe emrat e klubeve që e kanë kërkuar.

“Aktualisht jam nën kontratë me Luzi 2008, madje jam rikonfirmuar nga presidenti Albert Lusha edhe për dy vite të tjera. Nuk e kam menduar largimin, edhe pse gjatë qershorit, jo zyrtarisht më kanë ardhur oferta nga Elbasani e Turbina. Gjithsesi kam menduar që ta respektoj kontratën me këtë klub dhe këtë vit ngjitja në Kategorinë e Parë do tentohet që nga fillimi”, theksoi tekniku Suta.

Luzi 2008 do përforcohet dhe trajneri deklaron: “Këtu ka trajtim shumë të mirë financiar për futbollistët dhe ky është një nga treguesit që e vlerësojnë këtë skuadër. Kemi nisur bisedat me 3-4 lojtarë nga Kategoria e Parë, të cilët do t’i bashkohen skuadrës në fundin e muajit korrik. Luzi do jetë skuadër pretendente”.

AGRON KAJA

Shkumbini rikthehet në Parën, Luzi nuk reziston dot

Sport Ekspres — Thu, 30 May 2019 13:56:19 +0000

Shkumbini ia ka dalë të rikthehet në Kategorinë e Parë. Një gol i Klemend Xhyrës, mbrojtësit 35-vjeçar, vendosi finalen e “play off”-it përballë ekipit të Luzit, sfidë që u zhvillua në stadiumin “Loni Papuçiu” të Fierit.

Të dy ekipet humbën mundësitë e tyre përballë Devollit dhe Elbasanit, por vendi i lënë bosh nga Kamza iu dha një tjetër shans.

“Veterani” gjeti golin deçiziv në minutën e 33-të. Shkumbini ruajti avantazhin deri në fund, edhe pse kishte mundësi të dyfishonte rezultatin. Isai nuk u tregua i saktë nga pika e penalltisë në minutën e fundit të ndeshjes dhe gjithçka u mbyll me festën e ekipit të Artan Banos.

PLAY-OFF KATEGORIA E PARË
E enjte, më 30 maj 2019, 14:00

Shkumbini-Luzi 2008 1-0
Shënues: Xhyra 33’

Luzi 2008, kapiteni Leçini: Duam arbitra seriozë, jo si me Elbasanin!

Sport Ekspres — Sun, 26 May 2019 08:48:06 +0000

Kapiteni i Luzit 2008, Eduard Leçini, për SportEkspres.com deklaron se humbjen me Elbasanin edhe e kishin menduar, duke qenë se në lojë janë të tria rezultatet, por sipas tij jo me arbitrim tendencioz. Këtë herë ai kërkon që ndaj Shkumbinit të gjykohet drejt.

“Në ndeshjen me Elbasanin arbitrimi na masakroi. Nuk na la të luanim futboll normal, duke dhënë faulle e kartonë. Nuk e kishim menduar një humbje të tillë, edhe pse për atë sfidë ishim përgatitur për të tria rezultatet. Ajo kaloi dhe tashmë jemi në pritje të datës për ndeshjen tjetër, ku kemi shansin e fundit për t’u ngjitur në Kategorinë e Parë”, shprehet fillimisht kapiteni Leçini.

Më tej ai shton: “Jemi në pritje të datës së ndeshjes me Shkumbinin, por për këtë përballje i kërkojmë FSHF-së që të vendosë arbitra seriozë, jo si ata me Elbasanin. Nuk i kërkojmë asgjë më shumë se sa të gjykojë drejt ndeshjen dhe të fitojë cila skuadër do ta meritojë në fushën e lojës”.

AGRON KAJA

Luzi 2008, Suta: Zgjidhje e drejtë nga FSHF, të bëjmë histori!

Sport Ekspres — Sun, 19 May 2019 09:55:03 +0000

Luzi 2008 i gëzohet vendimit të fundit të FSHF-së, që përcaktoi se skuadrat që luajnë në play-off do të kenë një shans më tepër për të garuar sezonin e ardhshëm në Kategorinë e Parë. Skuadra kavajase mban vendin e dytë dhe trajneri Anxhelo Suta ka folur pas vendimit të federatës.

“Jam në pankinën e Luzi 2008 për të bërë histori me këtë skuadër. Meritonim që të ishim kryesuesit e grupit, por disa gabime rrugës na bënë që t’ia dorëzojmë vendin e parë Tërbunit. Gjithsesi, edhe ndeshjet Play-off janë mundësi që ne të tregojmë vlerat tona dhe se e meritojmë Kategorinë e parë. Zgjidhja e FSHF-së për situatën që ishte krijuar pas rënies së Kamzës dy kategori më poshtë, ishte më e drejta e mundshme”, deklaroi Suta.

Për ndeshjen e së dielës me Adën, trajneri i Luzi 2008 shtoi: “Ada është skuadër serioze dhe ne e kemi vlerësuar përballjen me ta. Natyrisht që synimi ynë është fitorja e pas saj të përgatitemi për ndeshjen Play-off përballë Elbasanit. E meritojmë dhe do kërkojmë vetëm fitoren”.

AGRON KAJA