Lushtaku

Përgënjeshtron Lushtaku: Lajm i pavërtetë! Politikë e klubit, por marr masa me avokatin tim

Sport Ekspres — Mon, 08 Oct 2018 11:47:29 +0000

Kushtrim Lushtaku iu përfol se ka pasur një incident me trajnerin e tij në Gjermani, saktësisht tek skuadra e Forchajm. Gjithsesi, “SportEkspres.com” ka kontaktuar me lojtarin dhe ky i fundit e ka përgënjeshtruar lajmin.

Për portalin tonë, vetë mesfushori, i cili në të shkuarën ka qenë pjesë e Kombëtares së Kosovës, por dhe e Kukësit e Flamurtarit në Shqipëri shprehet se ai po merr masa me avokatin e tij për këtë lajm të rremë. Vetë Lushtaku sqaron se kjo është një politike e klubit.

“Kjo e cila po flitet për mua është një gënjeshtër. Jam në dijeni që një lajm të tillë e kanë nxjerrë mediat gjermane. Është një politike e klubit dhe unë po marr masa me avokatin tim. Nuk dua që lajme të tilla të pavërteta të përhapen. Nuk është e vërtetë ajo që është shkruar”.

E BUJSHME | Ish-lojtari i Kukësit dhe Flamurtarit bën për spital trajnerin turk

Sport Ekspres — Mon, 08 Oct 2018 10:44:05 +0000

Pas një aventura të shkurtër në Shqipëri, Kushtrim Lushtaku vendosi që të rikthehet në Gjermani, ku nënshkroi një kontratë me Forchajm. Gjithsesi, ka ndodhur një ngjarje aspak e hijshme, pasi 29-vjeçari ka goditur trajnerin Gokhan Gokçe, ashtu sikundër lajmërojnë mediat gjermane.

Një ngjarje aspak e mirë, pasi trajneri ka pësuar disa të nxira në trup dhe menjëherë është nisur drejt spitalit, për kontrolle më të specializuara. Fatmirësisht për turkun nuk ka pasur asnjë dëmtim serioz. E gjithë kjo ngjarje ka ndodhur në pushimin e ndeshjes gjatë kësaj fundjave që lamë pas.

Menjëherë pas kësaj ngjarje, klubi i Forchajm i ka ndaluar afrimin në stadium lojtarit i cili në të shkuarën ka qenë dhe pjesë e përfaqësueses së Kosovës. Më pas klubi po ashtu ka njoftuar se është ndërprerë në mënyrë të menjëhershme kontrata me lojtarin.

Lushtaku firmos për kampionët e Kosovës

Sport Ekspres — Mon, 05 Jun 2017 12:29:11 +0000

Kushtrim Lushtaku ka mbyllur aventurën 3-vjeçare, në Shqipëri, duke u larguar si kampion. Mesfushori u shpall këtë sezon kampion me Kukësin, ku dha kontributin e vet dhe shënoi edhe dy gola shumë të rëndësishëm, që vlejtën 4 pikë, ndaj mund të konsiderohet edhe ai një ndër heronjtë e Kukësit, pavarësisht se luajti shumë pak ndeshje si titullar.

Tani mesfushori kthehet në vendlindje, sepse pas shumë vitesh mes Gjermanisë, Suedisë e Shqipërisë, tashmë ka firmosur për Trepçën ’89.

Kampionët e Kosovës e kanë marrë shumë seriozisht përfaqësimin në turin e parë në Champions League dhe po bëjnë sforcime të mëdha për të ndërtuar një skuadër të aftë që jo vetëm të kalojë turin e parë, por të jetë dinjitoze edhe në turin e dytë, pavarësisht se i mungon tërësisht eksperienca, që do t’ia shtojë disi një si Lushtaku, i cili në këtë aspekt do të jetë lider te Trepça ’89.