Luis Muriel

Atalanta përforcon sulmin, prezantohet kolumbiani

Sport Ekspres — Fri, 21 Jun 2019 13:10:20 +0000

Luis Muriel është zyrtarisht një futbollist i Atalantës. Klubi bergamask ka arritur akordin me Sevijën, që zotëronte kartonin e sulmuesit latin.

Muriel u huazua në janar te Fiorentina, aty ku shënoi 9 gola në 23 ndeshje mes kampionatit dhe kupës së Italisë. 28-vjeçari do të mbajë veshur fanellën me numrin 9 dhe mezi po pret të luajë në Champions Ligë me ekipi e ri.

Si fillim duhet të rikuperohet nga dëmtim i pësuar në ndeshjen e Kupës së Amerikës kundër Argjentinës. Goditje e mirë e Atalantës, që pagoi rreth 15 milionë euro te spanjollët e Sevijës dhe do të ketë një sulm shumë të fortë të përbërë nga Zapata, Muriel, Gomez dhe Iliçiç.

Luis #Muriel è un giocatore dell’Atalanta! ??? Bienvenido Luis! ?
Welcome @LuisFMurielCF! ? ??

? https://t.co/qX8W4VeUuR #WelcomeMuriel #Atalanta3uropa #GoAtalantaGo pic.twitter.com/QHOSiRvTZV

— Atalanta B.C. (@Atalanta_BC) June 21, 2019

Atalanta nuk pyet fare, arrin akordin dhe përforcon sulmin

Sport Ekspres — Tue, 18 Jun 2019 10:08:13 +0000

Atalanta po punon për të përforcuar ekipin. Kualifikimi në Champions Ligë i ka entuziazmuar të gjithë në Bergamo, ndërkohë që janë mbushur edhe arkat. Drejtuesit duan t’i dhurojnë Xhan Piero Gasperinit një kontingjent të plotë, që do të jetë në gjendje të përballojë ndeshje çdo tre ditë.

Fiksimi i trajnerit quhet Luis Muriel. Kolumbiani e mbylli sezonin me Fiorentinën, por kartonin e tij e zotëron Sevija. 28-vjeçari pësoi një dëmtim në ndeshjen e parë të Kupës së Amerikës kundër Argjentinës dhe do të qëndrojë 1 muaj e gjysmë pushim.

Diçka e tillë nuk e ka frenuar Atalantën, e cila ka paguar 15 milionë euro në arkat e klubit spanjoll duke përforcuar repartin e sulmit me një lojtar si Muriel. Lajmi raportohet nga “Sky Sport”, ndërsa lojtari do të tentojë rikuperimin e plotë për të qënë gati për nisjen e sezonit të ri.

Lajm i keq për Kolumbinë, sulmuesi humbet Kupën e Amerikës

Sport Ekspres — Sun, 16 Jun 2019 12:23:18 +0000

Kolumbia arriti një fitore të madhe kundër Argjentinës. Ekipi i drejtuar nga portugezi Kieroz mposhti 2-0 Argjentinën e Mesit për llogari të Kupës së Amerikës, që zhvillohet në Brazil.

Trepikëshi i parë i ka lumturuar të gjithë në kampin kolumbian, por shqetëson dëmtimi i Luis Muriel. Ndeshja e sulmuesit nuk zgjati më shumë se 14 minuta. Dëmtimi në gjurin e majtë bëri të vetën dhe 28-vjeçari u detyrua t’i linte vendin Roxher Martinezit, i cili zhbllokoi sfidën me golin e shënuar.

Kontrollet e detajuara kanë hequr frikën e madhe të thyerjes së ligamentit, por kompeticioni ka marrë fund për lojtarin. Muriel ka pësuar zgjatje të ligamentit dhe do i duhet të qëndrojë pushim 4-6 javë, kështu që lamtumirë Kupa e Amerikës!

Lojtari mbylli sezonin e fundit me Fiorentinën, ndërsa kartonin e tij e zotëron Sevija. Atalanta dhe Milani interesoheshin për shërbimet e tij, por dëmtimi i pësuar ia komplikon akordin me ekipin e ri.

Zbulohen detajet e operacionit, Atalanta me sulm kolumbian

Sport Ekspres — Thu, 13 Jun 2019 13:50:14 +0000

Atalanta do të provojë për herë të parë në historinë e saj emocionet e Champions Ligës. Djemtë e Gasperinit zhvilluan një sezon të jashtëzakonshëm dhe e mbyllen kampionatin në vend të tretë pas Juventusit dhe Napolit.

Drejtuesit e po synojnë të mbajnë “yjet” e ekipit dhe të përforcojnë skuadrën. Luis Muriel është dëshira e madhe e repartit ofensiv dhe akordi është afër.

Kolumbiani u aktivizua me Fiorentinën pjesën e dytë të sezonit, ndërsa kartonin e tij e zotëron Sevija. Sipas raportimeve të “Il Corriere di Bergamo”, Atalanta pritet të paguajë 15 milionë euro në arkat e klubit andaluzian.

Ekipi i Gjimshiti dhe Berishës pritet të formojë një dyshe kolumbiane në majën e sulmit, me Zapatën dhe Muriel, ndërsa nga krahët do të operojnë kapiteni Gomez dhe Iliçiç.

Muriel: M’u prenë këmbët kur takova fenomenin

Sport Ekspres — Sat, 02 Feb 2019 16:06:55 +0000

Rikthimi në Serie A ka rezultuar mjaft i goditur për sulmuesin e Fiorentinës, Luis Muriel. Kolumbiani ka shënuar katër gola në tri takimet e fundit me klubin nga Firence, duke rrëmbyer mënjëherë zemrat e tifozëve të skuadrës vjollcë.

Në një intervistë për “La Nazione”, 27-vjeçari tregon momentin kur takoi për herë të parë idhullin e tij Ronaldo fenomenin. “Bomberi” tregon se emocionet e të takuarit një hero të fëmijërisë së tij ishin tepër të mëdha.

“Gjatë një grumbullimi më kombëtaren e Kolumbisë mu dha rasti për të takuar Ronaldon e vërtetë. Ai doli nga një ashensor, sapo e pashë mu prenë këmbët nga emocionet. Kuadrado më mori për krahu dhe e takuam e bëmë një foto. Kisha turp si një fëmijë në ato momente. Ai ka qenë rasti i vetëm që e kam takuar atë”, tha Muriel.

Muriel i thotë jo Milanit, por rikthehet në Serie A

Sport Ekspres — Mon, 31 Dec 2018 08:00:28 +0000

Luis Muriel do të rikthehet në futbollin Italian, por jo te skuadra e Milanit ashtu siç ishte përfolur gjatë javëve të fundit. Sulmuesi kolumbian ka refuzuar ofertën e “djallit”, duke preferuar të shkojë pak më në jug të Italisë. Bëhet fjalë për klubin e Fiorentinës, që nuk ka ndenjur duarkryq e ka befasuar me këtë lëvizje të bujshme.

Milani dhe Sevija kishin rënë dakord që lojtari të huazohej për 6 muaj në këmbim të 500 mijë eurove, në marrëveshje ishte e përfshirë dhe një opsion për blerjen përfundimtare të kartonit të lojtarit për 13 milionë euro. Por, drejtori sportiv i Milanit mori një përgjigje negative nga agjenti i lojtarit.

Muriel është një lojtar që e njeh mirë në kampionatin Italian, pasi ka luajtur për shtatë sezone me skuadra si Leçe, Udineze dhe Atalanta. Sulmuesi kolumbian ka shënuar 51 gola në 165 ndeshje të Serie A.

Milan bën goditjen e dytë, sulmuesi një hap larg firmës

Sport Ekspres — Sun, 30 Dec 2018 13:10:07 +0000

Milani duket se bën goditjen e dytë në merkaton e janarit. Kuqezinjtë, pasi kanë siguruar me kohë shërbimet e brazilianit Lukas Paketa, janë shumë pranë firmës me Luis Muriel. Sulmuesi, i cili e njeh mjaft mirë Serinë A, do të vijë nga skuadra e Sevijas dhe nga mediat italiane e spanjolle, raportohet se kanë mbetur vetëm detajet e fundit për të zyrtarizuar marrëveshjen.

Kolumbiani do të vijë në Milano me formulën e huazimit me të drejtë blerje deri në fundin e sezonit. Klubet kanë rënë dakord midis tyre dhe tashmë mbetet vetëm të gjendet marrëveshja mes drejtuesëve kuqezi dhe lojtarit për sa i përket kushteve personale. Një përforcim i rëndësishëm për “djallin”, ku dhe trajneri Gatuzo pritet të jetë i kënaqur nga ky transferim.
27-vjeçari shihet si mjaft i vlefshëm për numrin një të stolit kuqezi, pasi jo vetëm luan si qendërsulmues, por mund të luajë dhe si anësor. Muriel është aktivizuar më parë në Serinë A, me fanellat e Sampdorias, Udinezes e Leçes.

Milani “harron” Ibrën, objektivi i ri është në Spanjë

Sport Ekspres — Wed, 19 Dec 2018 13:53:01 +0000

Milani është një ndër klubet që është përfolur më së shumti në këtë prag merkatoje. Kuqezinjtë, të cilët kanë pësuar edhe shumë dëmtime në kontigjentin e tyre, do të provojnë të përforcohen dhe siç thuhet gjasat janë që të merret nga një lojtar për çdo repart.

Ditët e fundit u zyrtarizua se, Ibrahimoviç do të vazhdojë karrierën e tij në Amerikë dhe në këtë mënyrë drejtuesit e Milanit, do t’i përqendrojnë kërkimet e tyre diku tjetër tashmë. Sipas raportimeve të fundit, nga “Marca”, thuhet se kuqezinjtë po përgatisin një sulm për Luis Muriel. Kolumbiani, i cili aktivizohet te Sevija, nuk ka gjetur hapësira këtë sezon, teksa Andre Silva dhe Ben Jeder, shihen si zgjedhje të para.

Kështu, 27-vjeçari mund të transferohet në Milano në formulën e huazimit me të drejtë blerje në fund të sezonit për 12 milionë euro. Kujtojmë, Luis Muriel u ble nga klubi andaluzian për shumën e 22 milionë eurove nga ekipi i Sampdorias. Me fanellën e spanjollëve, kolumbiani ka shënuar 8 gola në 35 ndeshje në La Liga.