Bardhezinjtë treguan edhe njëherë limitet e tyre në futbollin e burrave, aty ku vijnë disa të rinj të “çmendur” dhe të dominojnë në çdo aspekt. Në prononcimin e dhënë për “TMW”, ish-drejtuesi i Juventusit dhe Partizanit tregon shkakun e asaj paraqitje të dobët të Juves, komplimentin “Harkëtarët”, insiston se duhet besuar tek Alegri dhe shpreh mendimin e tij për ekipin fitues të Champions Ligës.

NDESHJA – “Ajaksi ishte superior në shpejtësi dhe në kontrollin e topit. Juventusi nuk është në formë. Dje mungonin dy elementë të rëndësishëm si Kielini dhe Manxhukiç, por asgjë nuk i justifikon. Ajaksi i mposhti në çdo drejtim dhe e meritoi fitoren.”

CR7 – “Një futbollist nuk mund të fitojë një kompeticion i vetëm. Paraqitje e djeshme nuk ishte në nivelin e duhur, si nga Juventusi ashtu dhe nga Ronaldo. Alegri? Trajneri meriton besim. Kur fiton pak, fiton kampionatin.”

JUVENTUSI – “Bardhezinjve i mungoi forma. Dje ishin të panjohur në të gjitha aspektet. Holandezët e morën veten avash avash dhe ia dolën të fitojnë. Juvja do tentojë përsëri vitin tjetër. Duhen mbështetur shpresat e duhura, por duhet të kuptojnë se ka edhe skuadra të tjera në valle. Ajaksi qëndroi i fshehur, por jo dhe aq shumë.”

AJAKSI – “Nëse do të ruanin këtë skuadër, ata do të bëheshin shumë të fuqishëm. Atyre nuk iu plas shumë për këto gjëra dhe i shesin lojtarët më të mirë. Gjynah, por mirë për skuadrat e tjera që marrin pjesë në Champions.”

FITUESIT – “Sigurisht që Barcelona. Ata kanë Mesin, i cili është më i miri, por edhe skuadra është shumë kompakte.”

Tekniku francez është në qendër të vëmendjes dhe janë të shumtë personalitet e botës së futbollit që komentojnë suksesin e Francës dhe të Deshamp. Në të shkuarën ai ka drejtuar Monakon, Juventusin dhe Marsejën, ndërkohë që prej vitit 2012 është në krye të “Gjelave”.

Luçiano Moxhi është një nga ata që e njeh Deshamp dhe në vitin 2004 zbulon se e ka kërkuar te Juventusi, por 49-vjeçari ka thënë “jo” me stil. Umberto Anjeli e donte në stol dhe ish-drejtori i bardhezinjve tentoi ta bindte, por francezi kishte qenë i prerë: “Unë vij vetëm nëse blini lojtarët që unë sugjeroj”.

Në atë periudhë torinezët po tregoheshin të kujdesshëm me shpenzimet dhe Moxhi e ka kuptuar qartë atë që ka dashur të thotë Deshamp. “Pra, ju doni të vini tek Juventusi”. Francezi po bënte mirë me Monakon në Ligue 1 dhe vazhdoi aty edhe për një sezon, ndërkohë që Kapelo mori drejtimin e bardhezinjve në periudhën 2004-2006. Më pas për dy vite Deshamp provoi të drejtonte ekipin ku kishte luajtur edhe si lojtar.

Fitorja me Kamzën dhe rishfaqi në skenë këshilltarin e presidentit Gaz Demi, Luçiano Moxhi, duket se italiani e ka taktikë këtë lëvizje. Ai kthehet në protagonist, edhe mediatike, sa herë ekipi i kuq fiton një ndeshje, s’ka rëndësi rezultati.
Luçiano Moxhi e pa fitoren me Kamzën së bashku me trajnerin e Partizanit, Sulejman Starovën. Ata shijuan të dy 3 pikët e para të vitit 2018. 80-vjeçari dhe 62-vjeçari pas përfundimit të ndeshjes u ulën në dhomat e zhveshjes të ekipit. Aty u lajmërua se do të kishte edhe një mbledhje mes drejtuesve që u zhvillua ditën e djeshme. “Sport Ekspres” mëson se italiani mblodhi stafin drejtues të klubit dhe stafin teknik për të diskutuar në lidhje me situatat e fundit që kanë përfshirë ekipin kryeqytetas. Moxhi i mëshoi disa çështjeve kryesore.
OBJEKTIVAT – Në mbledhjen e djeshme u diskutua edhe për vazhdimësinë e skuadrës. Fitorja me Kamzën riktheu disi qetësinë, ndërsa drejtuesit e klubit kërkojnë që të mos ndalen më. Italiani kërkon nga Starova dhe lojtarët të vazhdojnë punën me qetësi në mënyrë që të mos gabojnë sërish. Ndeshja e radhës kundër Laçit u cilësua si shumë e rrezikshme, por edhe si një mundësi për t’u rikonfirmuar, pasi luhet brenda përballë një kundërshtari direkt.
Kupa e Shqipërisë zuri vend në diskutimet e djeshme mes drejtuesve të klubit të kuq. Moxhi dhe Rama besojnë se skuadra mund të kthejë rezultatin kundër Flamurtarin dhe u munduan ta transmetojnë këtë optimizëm dhe te stafi teknik. Preiti ishte dakord, sigurisht, ai është dakord me çdo fjalë që thotë Moxhi.
AFRIMET E JANARIT – Të kuqtë janë të bindur se kanë bërë afrime të mira në merkaton e janarit. Ata besojnë te lojtarët e afruar dhe kanë thënë fjalë të mira për paraqitjen e disa prej tyre. Lukasi u vlerësua pas përformancës së bërë kundër Kamzës, por edhe i riu Mala që cilësohet si një surprizë e bukur. Paraqitja e Abdurahimit nuk ka lënë shije shumë të mira, por pritet adoptimi i tij me grupin dhe kapja e formës optimale. Ai nuk është ende gati. Me padurim për të kuqtë pritet edhe rikthimi i Edgar Çanit, pasi të gjithë drejtuesit ishin të mendimit, se me ardhjen e shtatlartit, skuadra do të bëhet më e frikshme. Dyshja Bardhi-Progni po mundohen të bëjnë mirë, por e vuajnë faktin që nuk janë në pozicionin e tyre natyral. Rasti i humbur nga 19-vjeçari i vetëm kundër Gjonikajt ishte treguesi më i mirë.
TIFOZËT – Një tjetër çështje e nxehtë që u diskutua në takimin e djeshëm ishte edhe largimi i tifozëve nga stadiumi. Moxhi u mësua me situatën nga Drejtori Olsi Rama dhe e kuptoi se pse Guerrilsat bojkotonin ndeshjet e Partizanit brenda në stadiumin “Selman Stërmasi”. Italiani kërkoi nga drejtuesit e klubit që të merreshin me këtë çështje dhe të mundohen që të rikthejnë sa më shpejt tifozët e kuq në stadium, pasi ai ja di rëndësinë tyre. Mbase mund të ketë paqe në horizont? Vështirë, por mund të ketë marrëveshje për “luftë të ftohtë”.