Lucas Leiva

Rinovim dhe dashuri e përjetshme për Lacion, mesfushorin e intrigon kjo ide

Sport Ekspres — Sat, 04 May 2019 13:39:35 +0000

Lacio do të presë nesër Atalantën në “Olimpico” në ndeshjen më të fortë të kësaj jave në Serie A. Të dy ekipet luftojnë për një vend në katërshen e parë dhe fitorja është alternativa e vetme.

Lukas Leiva është një nga lojtarët kyç të ekipit të Inzagit. Braziliani është ura lidhëse mes mbrojtjes dhe sulmit. Ish-lojtari i Liverpulit ka rinovuar deri në vitin 2022 me Lacion, që ka bërë publik lajmin në faqen e saj zyrtare.

Në një prononcim për “Corsport”, 32-vjeçari flet për të ardhmen dhe mundësinë e rikthimit dhe mbylljes së karrierës në vendlindje. Lukas ndihet i lumtur në kryeqytetin italian dhe mohon në mënyrë kategorike rikthimin një ditë te Liverpuli, aty ku u aktivizua për 10 sezone, përpara se Igli Tare ta vishte me ngjyrat bardhekaltër.

“Është akoma herët për të menduar për ekipin e radhës. Nuk e kam vendosur ende nëse do të kthehem në Brazil për të luajtur apo për të jetuar. Rikthimi te Liverpuli? Jo, familja ime gjendet për mrekulli në Romë. Mund të jetojmë këtu përgjithmonë. Më intrigon kjo ide dhe më pëlqen shumë”, përfundon mesfushori i Lacios.

“Rri aty ku je dhe qepe!” Jo vetëm Kesi dhe Bakajoko, edhe laciali rrezikon

Sport Ekspres — Tue, 16 Apr 2019 11:10:34 +0000

Fundi i ndeshjes Milan-Lacio solli shumë polemika, tension dhe një sherr, që për fat të mirë u shuajt shpejt. Frenk Kesi dhe Timue Bakajoko vepruan gabim duke festuar pas ndeshjes me bluzën e Açerbit, mbrojtësit të Lacios.

Gjykata sportive do të marrë sot masën ndaj dy mesfushorëve të Milanit. Një tjetër rast i turpshëm pretendohet të ketë ndodhur në momentet e kaosit që ekzistonte në fund të ndeshjes.

Lukas Leiva ka ofenduar një zyrtar për shtyp të kuqezinjve, i cili ndodhej në një karrige më rrota. “Rri ulur aty ku je dhe qepe gojën”, i është drejtuar braziliani i Lacios milanistit. Diçka e tillë është dëgjuar nga inspektorë të ndeshjes në terren.

Mesfushori lacial ka mohuar me forcë, duke pretenduar se edukata e tij nuk e lejon të bëjë një gjë të tillë. Leiva tregon se nuk ka patur asnjë sherr apo problem me ndokënd në karrierën e tij. Tashmë pritet vetëm vendimi. Kesi dhe Bakajoko rrezikojnë, ashtu si dhe lojtari 32-vjeçar i Lacios.

Arrihet akordi, Tare rinovon me liderin e mesfushës

Sport Ekspres — Tue, 26 Mar 2019 09:39:08 +0000

Lacio ka arritur të rinovojë kontratën e një prej lojtarëve më të rëndësishëm. Sipas lajmeve që vijnë nga Brazili, Lotito dhe Tare kanë gjetur akordin me Lukas Leivën.

32-vjeçarit i përfundonte kontrata me klubin kryeqytetas në vitin 2020, por ai do të qëndrojë edhe dy sezone më shumë te Lacio. Mesfushori do të përfitojë një rrogë prej 2.2 milionë eurosh në sezon (aktualja shkonte në 2 milionë) dhe do të luajë me bardhekaltrit deri në moshën 35 vjeçare.

Leiva, i cili numëron dhe 22 ndeshje me kombëtaren braziliane, la Liverpulin në vitin 2017 për t’u transferuar te Lacio, aty ku është kthyer në një nga pikat më të forta të ekipit të Simone Inzagit.

Akordi është arritur dhe, përveç përcaktimit të komisioneve midis klubit dhe menaxherit të lojtarit, pritet vetëm zyrtarizimi i Lacios për rinovimin e Lukas Leivës.