loew

Lëv: Nojer sërish numri një, Gëcen e kam nën vëzhgim

Sport Ekspres — Fri, 15 Mar 2019 16:41:36 +0000

Joakim Lëv ka filluar revolucionin e tij te Gjermania. Trajner i katër herë kampionëve të botës bëri sot publike listën me të grumbulluarit për ndeshjet kualifikuese te “Euro 2020”. Në daljen për shtyp ku prezantoi të përzgjedhurit e tij Lëv, preku disa nga çështjet më delikate të kombëtares.

“Kam shumë pritshmëri për këta lojtarë, ndihem me fat që i kam. Vendimet nuk ishin të lehta për mua, por për duhet të marrim vendime të vështira për të qenë gati për të ardhmen. Duam t’i japim lojtarëve të rinj më shumë përgjegjës. Kemi potencial të madh”.

HUMELS, BOATENG, MYLER – “Ata nuk janë të përjashtuar nga kombëtarja. Nuk është se kanë bërë diçka gabim. Kam folur shpesh në telefon me ta këtë javë. Të jeni të sigurt mes nesh ka akoma respekt të anasjelltë. Ata më thanë që do të jenë gjithmonë të gatshëm për kombëtaren. Nuk e di çfarë do të ndodhë në të ardhmen”.

NOJER – “Manuel Nojer mbetet portieri numër një, kjo gjë s’do të ndryshojë. Marku (ter Shtegen) do të ketë shansin e tij, është e sigurt, por aktualisht Nojer është kapiteni dhe numri një”.

GËCE – HEKTOR – “Jam shumë i gëzuar me Mario Gëcen. Ai po rikthehet në formë, po e vëzhgoj. Hektor nuk luan më si mbrojtësi i majtë te Këlni, prandaj nuk e kam thërritur, por gjithsesi ai ka ende interesin tim”.

Lëv fillon revolucionin, tri debutues te Gjermania

Sport Ekspres — Fri, 15 Mar 2019 12:43:24 +0000

Joakim Lëv ka publikuar listën me emrat e grumbulluar për ndeshjet kualifikuese të “Euro 2020”. Katër herë kampionët e botës kanë një fytyrë krejtësisht të re tani, me vetëm Manuel Nojer, Toni Kros dhe Marko Rojs që kanë mbetur nga skuadra e viteve të shkuara.

Lëv ka ftuar për herë të parë në kombëtare mbrojtësin e Lajpcig Lukas Klosterman dhe Niklas Shtark të Hertës së Berlinit. Risi ka pasur dhe në mesfushë ku është ftuar 21-vjeçari i Verder Bremen Maksimilian Egeshtajn.

Portierë
Manuel Nojer, Mark-Andre ter Shtegen, Kevin Trap
Mbrojtës
Matias Ginter,Halshtenberg, Tiho Kehrer, Lukas Klosterman, Antonio Rydiger, Niko Shulc, Niklas Shtark, Niklas Syle, Xhonatan Tah
Mesfushorë
Xhoshua Kimish, Leon Gorecka, Ilkai Gyndogan, Toni Kros, Maksimilian Egeshtajn, Kai Haverc, Julian Brandt
Sulmues
Leroi Sane, Serzh Gnabri, Marko Rojs, Timo Verner

Mateus: Jam dakord me vendimin e Lëv, por më irriton koha e njoftimit

Sport Ekspres — Wed, 06 Mar 2019 13:12:42 +0000

Ish-lojtari i Bajernit dhe kombëtares gjermane, Lotar Mateus, ka folur për “T-Online”, në lidhje me vendimin e Joakim Lëv për t’i mbyllur derën e kombëtares treshes së Bajernit të Mynihut: Humels, Boateng dhe Myler.

Sipas legjendës gjermane vendimi i trajnerit të kombëtares është i kuptueshëm, por koha kur u dha njoftimi e irriton atë, pasi Bajerni i Mynihut do të ndeshjet javën që vjen me Liverpulin.

“Çfarë më irriton është koha që Lëv zgjodhi për të bërë këtë njoftim, vetëm një javë para ndeshjes me Liverpulin. Humels dhe Boateng kanë shumë pak kohë për ta lënë pas këtë lajm”.

“Gjithsesi, përveç këtij detaji, vendimi është 100% i kuptueshëm. Kemi të bëjmë me një revolucion në kombëtare, pasi Lëv po mendon një plan afatgjatë për të ardhmen. Dua të shtoj që të tre ata nuk janë më lojtarët e dikurshëm. Për shembull Boateng dhe Humels kanë humbur shumë nga shpejtësia e tyre”, tha Mateus.

E bujshme: Lëv kryen revolucion, heq nga kombëtarja tre bavarezë

Sport Ekspres — Tue, 05 Mar 2019 14:37:41 +0000

Joakim Lëv dhe menaxheri i kombëtares gjermane Olivier Bierhof udhëtuan sot drejt Mynihut për t’i komunikuar një vendim ekzemplar tre figurave që kanë dhënë shumë për katër herë kampionët e botës. Cili është vendimi? Mats Humels, Zherom Boateng dhe Tomas Myler s’do të jenë më pjesë e Gjermanisë.

Në një dalje për shtyp, Lëv shpjegoi se ky vendim vjen si pasojë e një strategjie për t’i hapur rrugën brezit të ri në skuadër dhe në fund i falënderoi të tre lojtarët për kontributin e tyre.

“2019-ta është viti që sinjalizon një fillim të ri për kombëtaren e Gjermanisë. Duam të vazhdojmë me planin e ndryshimeve që vazhduam gjatë fundit të vitit të kaluar. Boateng, Humels dhe Myler nuk do të jenë më në skuadër. Erdha sot në Mynih për t’ia komunikuar atyre personalisht këtë gjë”, tha gjermani para mediave.

“Ata mbeten lojtarë klasi, të cilët janë liderë te klubet e tyre. Janë futbollistë të mëdhenj, që kanë luajtur për një kohë të gjatë për kombëtaren gjermane. Kanë kaluar shumë vite më ne. I falënderoj për vitet e paharrueshme që kaluam së bashku”.

“Është koha që të vëmë bazat për të ardhmen. Duam t’i japim skuadrës një fytyrë të re. Jam i bindur se ky është vendimi i duhur. Po jap një sinjal të qartë për rinovimin e skuadrës. Lojtarët e rinj do të kenë hapësira që të përmirësohen. Ata duhet të marrin përsipër përgjegjësitë që të jep fanella e kombëtares”, përfundoi Lëv.