Sipas së përditshmes italiane “La Republica” kandidati favorit për të pasuar 70-vjeçarin është një tjetër protagonist i Botërorit “Gjermani 2006”, ku Italia u shpall kampione nën drejtimin e Lipit.

Bëhet fjalë për Fabio Kanavaron. Fituesi i Topit të Artë trajnon prej tre vitesh në Kinë, ku ka fituar dy trofe me skuadra si Tianzhin Kuanzhian dhe së fundmi me Guanzhou Evergraned.

Në një lodhje telefonike me Radio Rai 1 trajneri kampion bote në vitin 2006 ka folur për Juventusin, Ançelotin dhe largimin e administratorit të deleguar  Bepe Marota nga kampionët e Italisë.

“Ndjesia është që gara për titull ka marrë fund. Interi apo Milani do të rriten, por rivali i vetëm i Juves ishte Napoli dhe në takimin direkt u panë qartë diferencat. Karlo Ançeloti është një mjeshtër, por nuk bën dot mrekulli ndaj një rivali kaq superior.

“Marota la Juventusin? Grupet e mëdhenj marrin vendime të tilla kur janë në kulmin e vet dhe nuk i gjykojmë dot, kanë të drejtë për gjithçka.

“Ronaldo? Nuk e prisja kurrë që të largohej nga Reali. Përtej pagës së frikshme, Ronaldo është vënë në dispozicion të grupit dhe po tregon se është një djalë i përulur, shumë punëtor. Nuk jam dakord që Ronaldo po i merr hapësirë Dibalas, janë lojtarë të ndryshëm. Dibala luan pas sulmuesve, Ronaldo është lojtar që shënon dhe lëviz pa fund, nuk kanë lidhje mes tyre dhe Alegri duhet t’ua gjejë vendin në formacion, nëse të dy janë në formë.

“Zhervinjo dhe shkëlqimi te Parma? Jam i befasuar, lojtarët si ai zakonisht preferojnë milionat nga Azia. Kur luan në Kinë forma fizike vjen në rënie, sepse nuk stërviten si në Europë, ndaj është një çmenduri të shohësh Zhervinjon të paraqitet kaq mirë, duhet të ketë punuar në mënyrë të jashtëzakonshme.

“Puna në Kinë? Kam kontratë deri në janar 2019, për Kupën e  Azisë, më pas nuk e di. Dua të kthehem në shtëpi, besoj se Kina do jetë aventura ime e fundit. Kombëtarja? Më pëlqen, është ekip i ri, me disa talente që po luajnë rregullisht në Serinë A dhe Roberto Mançini është shumë i zoti”.

Kampion bote në vitin 2006 me Italinë, Lipi tashmë sheh në stol edhe dy ish-lojtarë të tij, Rino Gatuzon dhe Masimo Odon: “Jam i kënaqur që p bëjnë gjëra të mira. Rino ka dëshirën dhe karakterin për të ringjitur Milanin, përmirësimet janë vënë re. Masimo ka cilësi të mëdha dhe pas eksperiencës së parë të pafat në Serinë A me Peskarën, tani po tregon sa vlen me Udinezen”.

Për Lipin surprizat e kampionatit italian këtë vit janë dy: “Simone Verdin e kam ndjekur që kur luante te Milani dhe Empoli, por këtë vit te Bolonja është përmirësuar jashtëzakonisht. Fati i Bolonjës që Verdi refuzoi transferimin te Napoli. Më pëlqen shumë edhe Brajan Kristante: di të depërtojë si pak të tjerë në Itali. Meritë edhe e Gasperinit”.