“Ne kemi propozuar që deri ne 30% e tatimit mbi fitimin të njihet si shpenzim i zbritshëm kur këto të ardhura i shkojnë sportit. Me këtë mënyrë do të na afrohen shumë sponsor. Synojmë dhe disa insentiva të tjera si ulja e tvsh-së nga 20% në 0 deri 5% ose shmangia e tatimit mbi të ardhurat personale mbi futbollistët elitarë për të paktën pesë vite. Me këtë paketë do nxisim formalizimet e kontratave të lojtarëve dhe do të kemi një ide të qartë të bilanceve të klubeve shqiptare”.

“Pjesa dërrmuese e propozime është dakordsuar. Ka një debat mbi zbritjen e shpenzimeve nga tatimi mbi fitimin, ne po këmbëngulim për këtë gjë, pasi është diçka më rezultative. Miratimi i ligjit në Kosovë do të na ndihmojë pasi unë në kam besim që ditën kur ky ligj të jetë në parlament, ky ligj do miratohet”.

“Në prag të fillimit të sezoni të ri, liga ka filluar që të kërkojë të ketë zërin e vetë në veprimtaritë futbollistike. Jemi duke punuar për të pasur pjesëmarrje në komisionet e federatës. Jemi duke paraqitur kandidaturat tona përomisionin e disiplinës, atë të caktimit të arbitrave dhe vëzhguesve. Shpresoj që vitin e ardhshëm ne t’i kemi marrë të gjitha funksionet organizative. Gjithashtu shpresoj që të rrisim të ardhurat. Tani marrim para vetëm nga shitja e së drejtës televizive, ndërsa në të ardhmen synojmë të gjejmë një sponsor për emrin e ligës, siç e ka Kosova IPKO-n”.

Të tre drejtuesit kanë shprehur para mikrofonit të “Ora Neës”, disa nga kërkesat dhe pakënaqësitë e tyre në lidhje me këtë zhvillim madhor të futbollit shqiptar.

Safet Gjici:Liga duhet të kërkoj sponsorë të fuqishëm, sidomos kryetari i Shoqatës dhe të gjithë klubet që janë pjesëtar të ligës. Kryetari i Ligës duhet të jap rezultate çdo 6 muaj, duhet të raportoj para presidentëve se çfarë kemi bërë. Duke pasur të ardhura më të larta klubet shqiptare, natyrisht do të ketë produkt akoma më të fortë sepse do ketë blerje më cilësore, lojtarë më të mirë. Do të bëhet loja më e fortë, më e bukura. E duke ndodhur kjo do na vijnë tifozët. E duke ardhur tifozët do të rriten edhe të ardhurat e klubit. Pra janë të lidhura zinxhir. Unë nuk e kam parë në fakt kontratën që e drejta televizive është shitur për 4 vite, por nëse Kryetari i Ligës  do të ketë sponsor më të fuqishëm se kjo që është shitur padiskutim që nuk do të jetë pjesë e diskutimit të Ligës, pasi prandaj është krijuar. Por duhet të shikojnë se nëse ka sponsor më të fuqishëm ky që na ka blerë të drejtën televizive për 4 vjet, e nëse do të ketë patjetër që do të shikohen me sy tjetër, pasi të ardhurat e klubit kryesisht janë nga të ardhurat televizive. Liga duhet ta kontrollojë edhe pse prapë e ka në mbikëqyrje Federata. Koordinimi mes Federatës dhe Ligës besoj se do të jetë bashkëpunues që të kemi sa më pak gabime të arbitrave në fushë.

Sinan Idrizi: Si iniciativë e kam përkrahur dhe e përkrah deri në fund. Pra na duhet një Ligë Profesioniste për njerëz profesionist. Kjo është ana teorike e çështjes. Ana praktike është se cilët janë ata që do e krijojnë Ligën Profesioniste. Pra nëse do të bëjmë skanerin e aktorëve që duan të krijojnë Ligën Profesioniste, do të shikojmë një tablo që nuk ka lidhje në terminologjinë, Ligë Profesioniste. Pse? Poseduesit e aseteve dhe aksioneve kryesore të kësaj, të ashtuquajtur Ligë Profesioniste duhet të jenë ente publike shqiptare. Pra e përsëris për Bashkitë që menaxhojnë dhe janë aksionere kryesore të të gjitha këtyre shoqërive që ne sot menaxhojnë. Pra flas në rastin konkret Flamurtarin. Nëse unë do të vij dhe do të marr përsipër që të jem pjesë e Ligës Profesioniste, unë jam askushi. Jam vetëm një firmëtar i radhës. 100% aksioner i SHA-së është Këshilli Bashkiak i Vlorës. Po kështu, përjashto Partizanin janë të gjitha ekipet shqiptare. Nëse ne nuk zgjidhin përfundimisht në mënyrë të qartë ose kapitalizëm ose bolshevizëm, Liga Profesioniste për mua është ajo dilema e madhe mes një virusi dhe një bakteri. Pra nuk ka të ardhme në syrin tim. Pra ky muhabet nuk fillon nga A-ja. A-ja është që sporti shqiptar duhet t’i kthehet kapitalizmit. Nuk duhet të ngelet peng i aseteve publike. Domethënë klubet shqiptare janë të gjitha me minus dhe vazhdojnë të mbeten në këmbë. Dmth me ligj ne duhet të kishim falimentuar të gjithë, duhet të kishim shfaqur falimentimin. Janë të gjitha hipokrizi. Klubet shqiptare janë qesharake, ose më mirë jemi qesharak.

Arbi Laçi: Emri duhet shitur më mirë. Emri duhet mbrojtur. Emri duhet kuruar në të gjitha pikat më të rëndësishme të tij. Dhe në këtë linjë logjike duhet në mënyrë absolute që ajo pjesa organizative të ndihmojë futbollin në mënyrë që të jetë më i shitshëm, të jetë më produktiv për thithjen e të ardhurave dhe më pas, jo vetëm që duhen marrë por edhe duhen rishpërndarë më mirë. Kam kërkuar gjithmonë të na vihet në dispozicion kontrata katërvjeçare për të drejtën televizive. Ende nuk e kemi marrë. Unë vijoj ta kërkoj për ta konsultuar dhe për ta parë sepse ajo kontratë duhet ribërë në momentin që Liga do të marrë jetë sepse Liga do të vendosi vetë për sa i përket burimit të të ardhurave, menaxhimit të shitjeve të të drejtës televizive etj. Kështu që Liga domosdoshmërisht duhet të jetë kompetente për të vendosur kontratën që normalisht duhet rishikuar.

President, si e komentoi hapin e parë për krijimin e Ligës Profesioniste?
Mbledhja ishte iniciativë e klubeve të Kategorisë Superiore, për të përfunduar procesin e krijimit të Ligës profesioniste, e cila përfundoi me sukses dhe u vendos krijimi i Ligës. U bënë zgjedhjet për drejtuesin e saj me konsensus të të gjitha klubeve. Do të jetë zoti Edvin libohova drejtuesi i Ligës. Tani Liga duhet të regjistrohet sipas rregullave dhe procedurave juridike dhe do të fillojë aktivitetin e saj, për të marrë në dorë administrimin, organizimin dhe mirë menaxhimin e aktivitetit të Kategorisë Superiore.

Sa i rëndësishëm është krijimi i Ligës?
Teorikisht duket një proces shumë i mirë dhe i rëndësishëm për zhvillimin e futbollit. Në konceptin tim, ajo çka është kryesorja, duke qenë me interes të një grupi më të ngushtë se federata e Futbollit, do i shohë më mirë, do t’i menaxhojnë më mirë, do të kujdes më mirë ndoshta për të rritur imazhin e këtij produkti të përbashkët, për ta mbrojtur më shumë dhe për t’i diskutuar dhe zgjidhur problemet e tyre në tavolinë dhe jo jashtë saj.

Pse mungoi sot një përfaqësues nga Tirana?

Në dijeninë time ishte një mungesë për arsye objektive, por jo se është kundër krijimit të Ligës. E ka mbështetur iniciativën e krijimit të Ligës, madje e ka firmosur edhe statutin e saj.

Çfarë do të ndodhë me të drejtën televizive?
Të gjitha të drejtat e menaxhimit të aktivitetit të Kategorisë Superiore do t’i ketë Liga. Të drejtat e emrit, të drejtat e marketingut, të drejtat televizive etj.

Çfarë do të ndodhë me komisionet?
Komisionet juridike dhe Komisionet e arbitrave janë një dhe nuk mund të ketë komisione paralele, por gjithsesi Federata do i japë akses Ligës që të kontrollojë 100% ato çka kanë lidhje dhe interesa të garës tyre.

A do të japë dorëheqje nga posti i zëvendës presidentit zoti Libohova?
Jo. Të gjitha duhet të miratohen nga Asambleja e Futbollit, e cila do të mblidhet në gjashtë mujorin e parë të vitit e ardhshëm. Në statut do i propozohet Asamblesë që gjithmonë presidenti i Ligës të jetë dhe anëtar i Komitetit Ekzekutiv dhe zëvendëspresidenti i Federatës së Futbollit.

Si e shikoni garën këtë edicion?
Gara e këtij viti mund të vlerësohet nga ana ime me një hap pozitiv, duke e krahasuar me vitet e mëparshme. Klubet janë akoma më të organizuara, cilësia është më e mirë dhe gara është në mesin e saj. Duhet kohë për të mësuar se kush do të jetë fituesi.

President, komenti i parë pas këtij hapi të rëndësishëm?
Nuk ka ndonjë gjë sekrete apo shumë të vështirë. Prej kohësh kemi diskutuar me ekipet e Superligës, për të krijuar Ligën Profesioniste. Qëllimi i saj është që brenda këtij grupimi të gjejmë rregulla dhe forma organizimi, që të ndihmojnë më shumë garën, por edhe për të rritur të ardhurat financiare të klubeve. Dihet që në radhë të parë pa një financë të fuqishme futbolli nuk mund të ecë para. Kemi dakordësuar të gjitha problemet që kishin me statutin dhe shumë shpejt do të fillojmë të rregullojmë marrëdhënien me Federatën për sa i përket të gjithë kuadrit rregullativ, sepse dihet që Liga pas krijimit të saj do të jetë anëtare e FSHF-së, siç janë të gjithë anëtarët e tjerë. Qëllimi kryesor është industrializimi i procesit dhe tani fillon puna reale, siç janë një sërë fazash që duhen ndjekur për të arritur aty ku ne mendojmë.

Mendoni se klubet kanë financat e mjaftueshëm për këtë organizim?
Është e vërtetë që një pjesë e klubeve kanë probleme dhe do të jetë një nga prioritetet që Liga do të ketë për të sistemuar financat e klubeve, por dhe për të gjetur rrugë se si të jenë më efektive dhe jo thjeshtë për të luajtur futboll, por edhe të luash futboll në kushte sa më të mira.

Sa e vështirë ishte dakordësimi?
Më tepër kanë qenë diskutime lidhur me dakordësinë në statutit, pasi ka dy këndvështrime. Liga do të jetë krejtësisht e pavarur, apo do të jetë një element apo një institucion brenda FSHF-së. Do të jetë si anëtarët e tjerë, por me një organizim ndryshe, duke gjetur dhe gjuhën për të zbatuar dhe kuadrin legjislativ sportiv që kemi ne, por dhe kriteret që ka FIFA dhe UEFA për organizimit që ka për të tilla formate.

Cili do të jetë hapi i radhës?
Hapi i parë do të jetë regjistrimi në gjykatë, por që është punë ditësh, pasi u arrit dakordësia.

Do të ketë ndryshime sa i përket kritereve për skuadrat pjesëmarrëse në Supeirore?
Janë ato që ka vendosur FSHF, nuk ka ndryshime. Nga pikëpamja e statutit çdo klub i Superligës humbet të drejtën e pjesëmarrjes në Ligë, sapo del nga Superiorja dhe e kundërta, çdo klub që ngjitet bëhet pjesë e Ligës. Nëse një klub hyn në Superligë dhe nuk pranon të jetë anëtar i Ligës, mund të vazhdojë, por pa përfitimet që vijnë nga Liga dhe kjo nuk u leverdis.

Çfarë mund të na thoni për pozicionin tuaj?
Është kompetencë e asamblesë së Federatës, sepse do bëhen ndryshime në statut që kryetari i Ligës do jetë automatikisht pjesë e KE-së. Të tjerat do diskutohen më tej.

Do jetë gati Liga për sezonin e ri?
Patjetër që gjithçka pritet të jetë gati për sezonin e ardhshëm, Liga do të jetë ngritur.

Çfarë do të ndodhë me të drejtën televizive?
Menaxhim 100% vetë. Kontrata aktuale nuk mund të ndërpritet, por ka edhe burime të tjera dhe do të ketë negociata.

Do të ketë ndikim te financat e klubeve ky ndryshim i madh që po ndodh?
Në vitin e parë mos prisni çudira. Ne do të kërkojmë forma të tjera, duke nisur nga emri i Superligës, që mund të krijojë të ardhura të mëdha nga sponsori që do të blejë të drejtën e emrit. Nuk mund të jap shuma për klubet, por synojmë që me kalimin e viteve të ardhurat të rriten.

Drejtor, cilat ishin disa nga pikat që hasët vështirësi?
Nuk patëm ndonjë vështirësi, ne kishim sjellë disa mendime në projektin e paraqitur, të cilat u diskutuan dhe u panë me vëmendje, pasi gjithçka duhet të bëhet konform dispozitave të rregullave të UEFA-s dhe FIFA-s. Liga do të jetë një shoqatë që do të anëtarësohet në Federatë dhe të gjitha, duke nisur nga statuti dhe akti i themelimit duhet të jenë konform rregullores së UEFA-s, pasi ne nuk mund të bëjmë gjëra ndryshe nga se janë  rregulloret që më pas mos të pranohen nga instancat më të larta. U gjet një gjuhë e përbashkët, për të pasur një organizim sa më efiçent në të ardhmen.

Zoti Libohova ishte një propozim i juaji?
Jo nuk ishte një propozim i imi, ishte edhe i të tjerëve.

A mos është një tregues se klubet e kanë të vështirë për ta drejtuar vetë Ligën dhe duhet të jetë një i Federatës?
Zoti Libohova ka qenë i ngarkuar si nismëtar. Në statut ishte parashikuar që të mos ketë persona nga klubet, për arsye se në situatën ku ne jetojmë mund të krijonte një ngërç në raportet me klubet e tjera. Duke qenë se është një person që e njeh futbollin, ishte propozimi më i natyrshëm për të filluar këtë punë.

Cilat kanë qenë amendamentet që ju keni propozuar?
Në përgjithësi kishin të bënin me garantimin e një dige që do të funksiononte në mënyrë sa më të pavarur nga FSHF, duke marrë parasysh ato kanale që i lidhin në mënyrë organike me Federatën. Është komisioni i arbitrave, i cili sipas propozimeve që u bë do të ketë imput nga Liga dhe nga disenjatori që do të caktohet. Këto janë gjëra që do të sqarohen më pas nga një marrëveshje që do të bëjë Liga me Federatën.

Lista e arbitrave do të propozohet nga Liga apo do të jetë sërish nga FSHF-ja?
Shoqata e arbitrave është e pavarur. Arbitrat duhet të çertifikohen, duhet të kalojnë të gjitha kategoritë që ju të gjithë i dini. Ideja është që Liga të ketë imputon e vet, duke caktuar disenjatorin, i cili do të caktojë gjyqtarët për ndeshje e Ligës.

Çfarë do të ndodhë me të drejtën televizive, pasi kontrata është afatgjatë?
Një nga elementët kryesor të organizimit të Ligës është ideja për të marrë të drejtën komerciale dhe një prej tyre është e drejta televizive. Është shumë e rëndësishme që të marrë një emër dhe jo vetëm Superliga. Të ketë një sponsor gjeneral, çka do të ndihmonte në arkën e çdo ekipi. E drejta televizive është e firmosur nga Federata dhe do të transferohet, ende nuk e di se ku juridikisht dhe kush mund të jenë kompetencat e Ligës për ta diskutuar këtë kontratë.