Liga e Kampionëve

VIDEO | Kur nordiku Overbo i mohonte Çelsit finalen, një dekadë nga skandali i madh

Sport Ekspres — Tue, 07 May 2019 14:56:29 +0000

Si sot dhjetë vite më parë zhvillohej një nga ndeshjet më të komentuara të Ligës së Kampioneve. Çelsi i Gus Hidink priste Barcelonën e Pep Guardiolës në “Stamford Bridge” për ndeshjen e kthimit të gjysmëfinaleve të kompeticionit më të rëndësishëm për klube.

Takimi i zhvilluar në Spanjë ishte mbyllur ashtu siç nisi dhe të dy ekipet kërkonin kualifikimin për në finalen e madhe të Romës. Majkëll Esien kalonte vendasit në avantazh në minutën e 9-të dhe në stadium niste festa.

Barcelona tenton golin, por dalja me të kuqe e Erik Abidal rreth mesit të pjesës së dytë ia vështirëson gjërat ekipit katalanas.

“Blutë e Londrës” i afrohen disa golit të sigurisë, por i pengon edhe arbitri kryesor. Norvegjezi i quajtur Tom Ovrebo kthehet shumë shpejt në ferrin e djemve të Hidink dhe tifozëve të Çelsit. Plot 3 penallti të paakorduara për ekipin anglez bënë që polemikat të mos kishin fund.

E paharrueshme skena kur Majkëll Balak i turrej në vrap nordikut “të pashpirt”. Didier Drogba nuk u përmbajt në fund, duke iu drejtuar kamerave me fjalët “Skandal, turp i qelbur”.

https://www.youtube.com/watch?v=AMyAh-8XtR8

Edhe pse me 10 vetë, Barcelona arriti të barazonte ndeshjen. Andres Iniesta shënoi një gol shumë të bukur në minutën e tretë shtesë dhe dërgoi ekipin e tij drejt Romës, aty ku do të triumfonin përballë një tjetër ekipi anglez.

Kësaj radhe mposhtej Mançester Junajtid me golat e Samuel Eto dhe Leo Mesit. Me futboll dhe pa ndihmën e arbitrit…

10 years ago today, football witnessed one of the biggest robberies and scandals ever. Chelsea were denied 4 clear penalties against Barcelona. Drogba at the end sums it all up. “It’s a f**king disgrace!” ? pic.twitter.com/kCogatjQCC

— FutbolBible (@FutbolBible) May 6, 2019

Murinjo: Barcelona ose Juvja mund të eliminohet, ju shpjegoj pse!

Sport Ekspres — Tue, 16 Apr 2019 09:53:32 +0000

Zhoze Murinjo është i dashuruar vetëm pas fitoreve, sidomos atyre në kompeticionin më të rëndësishëm për klube. Portugezi ka fituar dy herë Champions Ligën me Porton dhe Interin. Aktualen po e shijon nga televizori, sepse për momentin është pa ekip.

Futbolli është bërë i paparashikueshëm, në fakt kështu ka qenë dhe do të jetë gjithmonë. “Special One” ka komentuar ndeshjet e kthimit çerekfinale për “Russia Today”. Juventusi dhe Reali i Madridit shihen me një këmbë në gjysmëfinale nga opinioni i gjërë.

Bardhezinjtë barazuan 1-1 në Holandë kundër Ajaksit, ndërsa Barcelona fitoi 0-1 në “Old Trafford” përballë Junajtid vendas, por një prej tyre mund të eliminohet mbrëmjen e sotme.

“Tani asnjë ekip nuk niset i eliminuar pas ndeshjes së parë. Juventusi dhe Barcelona kanë një avantazh të vogël. Megjithatë, nuk do të befasohesha nëse një prej tyre do të eliminohej. Rezultatet po na tregojnë se të gjitha ekipet luajnë në ndeshjet e kthimit pa e patur mendjen te ndeshja e parë. Askush nuk niset me idenë që ka marrë fund.

Mançester Siti-Totenhem? Është një parashikim shumë, shumë i vështirë. Mund të them që Siti është favorit, por me shumë dyshime. Do të jetë një ndeshje e ashpër, por Totenhemi mund t’ia dalë që të kualifikohet. Duhet ta pranojmë se të gjitha ekipet kanë nga 12.5% mundësi për të fituar kupën”, përfundon Zhoze Murinjo.

Champions me beteja zjarri, çfarë na ka rezervuar shorti!

Sport Ekspres — Fri, 15 Mar 2019 11:24:53 +0000

Sapo ka nisur shorti i çerekfinaleve të Champions Ligës në Nion të Zvicrës. Tetë ekipe kanë mbetur në lojë për fitimin e trofeut të madh. Liverpuli, Ajaksi, Juventusi, Barcelona, Mançester Siti, Mançester Junajtid, Totenhemi dhe Porto do të luftojnë për dy vende në finalen e 1 qershorit, që do të zhvillohet në “Wanda Metropolitana” të Madridit.

Short pozitiv për Juventusin dhe Liverpulin, dy ndër favoritët kryesorë për fitmin e trofeut. Bardhezinjtë e Alegrit do të përballen me Ajaksin. Ndeshja e parë do të zhvillohet në Holandë. Nëse kualifikohet, Juventusi do të ndeshjet në gjysmëfinale me Totenhemin ose Sitin.

Short shumë i mirë edhe për Liverpulin e Klopit. Finalistët e vjetshëm do të luftojnë kundër Portos për një vend në gjysmëfinale. Ndeshja e parë do të zhvillohet në “Anfield”, ndërsa ajo e kthimit në Portugali. Kush kualifikohet më tej do të luajë kundër fituesit të çiftit Barcelona-Mançester Junajtid.

Stadiumi ku do të zhvillojhet finalja e madhe

Përballje e fortë angleze midis Totenhemit dhe Mançester Sitit. “Qytetarët” janë të lumtur që do të luajnë ndeshjen e kthimit në stadiumin e tyre, ndërsa djemtë e Poçetinos ëndërrojnë finalen e madhe.

Duel i bukur dhe ai midis Barcelonës dhe Mançester Junajtid. Ekipi i Leo Mesit mbetet favorit për të kaluar, por “Djajtë e Kuq” kanë treguar se me Solskjaer në stol mund të dhurojnë surpriza pafund.

Ndeshjet e para do të zhvillohen me datë 9 dhe 10 prill, ndërsa ato të kthimeve do të luhen pas 1 jave, konkretisht me 16 dhe 17 prill.

ÇEREKFINALET

1- AJAKS-JUVENTUS
2- LIVERPUL-PORTO
3- TOTENHEM-MANÇESTER SITI
4- MANÇESTER JUNAJTID-BARCELONA

GJYSMËFINALET

(TOTENHEM-MANÇESTER SITI) – (AJAKS-JUVENTUS)
(MANÇESTER JUNAJTID-BARCELONA) – (LIVERPUL-PORTO)

Gjoba të rënda për PSG-në dhe Junajtid, UEFA me “dorë të hekurt”!

Sport Ekspres — Thu, 28 Feb 2019 19:21:56 +0000

Mançester Junajtid dhe PSG janë gjobitur nga UEFA për trazirat që shkaktuan tifozeritë në ndeshjen e parë mes dy skuadrave në “Old Trafford”. “Djajtë e Kuq” janë gjobitur me 16 mijë euro, pasi tifozët e tyre hodhën sende në fushën e lojës në drejtim të lojtarëve francezë. Për më tepër, bllokuan dhe shkallët brenda stadiumit, në zonën ku duhej të dilnin tifozët miq.

Ndërsa kampionët e Francës janë gjobitur me 41 mijë euro, për shkak se tifozeria e tyre hodhën fishekzjarrë në fushën e lojës, sende të tjera dhe shkaktuan trazira mes dy turmave. Këto gjoba duhen paguar para ndeshjes së kthimit, që do të luhet në “Parc de Prince” në mesjavë.

Ndeshja e parë mes dy skuadrave, u mbyll 0-2 në favor të PSG-së, falë golave të Kimpembe dhe Kilian Mbape, duke hedhur një hap shumë të rëndësishëm sa i takon kualifikimit.

UEFA i beson Kosovës organizimin e para-eliminatoreve të Ligës së Kampionëve

Sport Ekspres — Wed, 27 Feb 2019 19:32:58 +0000

Organi qeverisës i futbollit evropian, UEFA i ka besuar Kosovës organizimin e ndeshjeve para-eliminatore të Ligës së Kampionëve. Federata e Kosovës kishte aplikuar për të marrë përsipër organizimin e këtij turi, për t’i lehtësuar punët skuadrës kampione vendase, që të ketë më pak shpenzime dhe të arrijë rezultate me të mira, duke pasur dhe mbështetjen e vendasve.

Stadiumi “Fadil Vokrri” në Prishtinë dhe “Adem Jashari” në Mitrovicë do të organizojnë tri ndeshje, ato gjysmëfinale dhe atë finale të para-eliminatoreve. Kampionia e Kosovës, e San Marinos, e Andorrës dhe Gjibraltarit do të marrin pjesë në këtë tur.

Sezonin e shkuar, organizimin e këtij turi e mori përsipër Gjibraltari, ku skuadra e Dritës bëri paraqitje shumë të mira dhe arriti të kualifikohej, për t’u eliminuar më pas nga skuadra e njohur suedeze, Malmo.

Juventusi kërkon përmbysjen, ndihmë nga SHBA dhe Japonia!

Sport Ekspres — Tue, 26 Feb 2019 16:21:00 +0000

Juventusi dhe Atletiko e Madridit do të përballen mes tyre me datë 12 mars, në raundin e dytë të këtij turi në Champions Ligë. Bardhezinjtë e Alegrit do të bëjnë të pamundurën për të rikthyer rezultatin 0-2 të ndeshjes së parë dhe për të avancuar më tej në kompeticionin më të rëndësishëm për klube.

Ndeshja pritet me interes të madh dhe sipas raportimeve të mediave italiane, kjo përballje do të ketë një shikueshmëri rekord. Sipas studimeve të “StubHub”, kompania më e madhe e shitjes së biletave në internet, ka publikuar ndeshjen e parë të zhvilluar në Spanjë si ndeshja e dytë me e ndjekur në këtë raund të Champions Ligës.

Ndeshja Totenhem-Dortmund e zhvilluar në “Wembley” renditet në vendin e parë, ndërsa Lion-Barcelona në vend të fundit. Atletiko-Juventus tërhoqi në stadium tifozë nga e gjithë bota, ndërsa 11% prej tyre ishin italianë.

E njëjta gjë pritet në në ndeshjen e kthimit. Sipas “StubHub”, 33% do të jenë tifozë nga SHBA, 18% nga Japonia, 12% nga Irlanda, 6% nga Franca, Portugalia, Spanja dhe 3% nga Rusia, Meksika, Indonezia dhe Brazili.

Blerja e Kristiano Ronaldos i ka siguruar Juventusit një rritje të shikueshmërisë në nivel global, sidomos në vendet ku portugezi ka tifozë pafund si në: Amerikën e Veriut dhe Azi.

Sa shumë të dëmtuar, Liga e Kampionëve nis pa… kampionë

Sport Ekspres — Sat, 09 Feb 2019 08:00:11 +0000

Në mesjavë, Liga e Kampionëve do të startojë pas mbylljes së fazës së grupeve dhe do të futet në fazën më të nxehtë të kompeticionit, atë me eliminim direkt. Këtu nis sezoni i vërtetë i “Champions”-it për skuadrat elitare, që do të synojnë t’i shkojnë deri në fund kompeticionit më të rëndësishëm për klube.

Pavarësisht rëndësisë dhe vështirësisë së ndeshjeve, disa trajnerë nuk do të kenë në përbërje yjet e tyre, për shkak të dëmtimeve ose dënimeve prej kartonëve. Mungesa më e rëndësishëme është padiskutim ajo e Leo Mesit, yllit argjentinas që vazhdon të jetë i dëmtuar. Në stërvitjen e sotme të Barcelonës, “Pleshti” nuk u paraqit fare, çka tregon se duhet ende kohë që argjentinasi të rikthehet në fushat e blerta.

Tomas Myler do të mungojë përballë Liverpulit, për shkak të dënimit që mori nga UEFA për kartonin e kuq përballë Ajaksit, edhe kjo një mungesë shumë e rëndësishme për Bajernin. Një tjetër yll që nuk do të luajë është Heri Kejn. Pasi ka pushtuar Premier Ligën, bomberi anglez ka treguar se edhe në “Champions” di të shënojë, duke qenë një lojtar shumë i rëndësishëm për Totenhamin.

Festa e bardhekaltërve, Z Mobile Prishtina mposht kampionët e Holandës

Sport Ekspres — Thu, 20 Sep 2018 20:14:51 +0000

Z Mobile Prishtina ka fituar ndeshjen e parë të fazës së kualifikueseve të Ligës Kampionëve në basketbollit. Ekipi i kryeqytetit të Kosovës ka mposhtur kampionët e Holandës, Donar Groningen, me rezultatin 84-64. Një fitore e madhe për fituesit e kupës dhe Superkupës së Kosovës.

Ndeshja u zhvillua në pallatin e rinisë dhe sporteve në Prishtinë në një atmosferë të zjarrtë të tifozërisë vendase. Miqtë fituan periodën e parë më rezultatin (19-20), ndërsa Prishtina reagoi në periodën e dytë, duke e mbyllur atë me rezultatin (26-14) dhe shkoi në pushim me avantazhin e 13-të pikëve (46-33).

Prishtina vazhdoi lojën e mirë duke fituar dhe dy periodat e tjera dhe e mbylli ndeshjen me 20 pikë avantazh (84-64). Fitore e rëndësishme për Prishtinën, që do të zhvillojë ndeshjen e kthimit në Holandë pas dy ditësh.