Në një lidhje direkte me emisionin “Zona Gol” në Supersport, Lici tregon shumë gjëra. Buxheti, privatizimi i klubet, takimet në Katar dhe sigurisht që nuk mund të anashkalohen problemet e fundit që kuqeblutë kanë pasur. Presionet në Shkodër duken të pashmangshme dhe momentalisht Lici zbulon se janë marrë dy masa.

“Unë mendoj që Vllaznia është klubi më i formalizuar. Ndryshe nga klubet e tjera, kemi çdo kontratë të formalizuar në mënyrë të saktë. Borxhet janë akumuluar gjatë viteve të kaluara. Nuk kemi qenë aty ku duhet në këtë periudhë. Shumë gjëra ndikuan që të binim në Kategorinë e Parë”.

“Me ardhjen e stafit të ri kemi bërë uljen e kontratave. Ka qenë një situatë aspak e këndshme. Lojtarët kanë pasur presion nga qytetarët. Gjithsesi unë dua t’i falënderoj sportistët për punën e tyre dhe drejtuesit për korrektësinë në pagesa”.

BUXHETI – “Para pak ditësh u miratua dhe buxheti nga këshilli bashkiak. Gjysmën e lekëve do e financojë bashkia, ndërsa gjysmën tjetër do arkëtojë vetë klubi, pra ne si drejtues kemi detyrë t’i gjejmë. Synimi im është që vitin tjetër të ndërtojmë një Vllazni cilësore. Buxheti në total për të gjithë strukturat e klubit është diku te 570 milionë lekë. Këtu përfshihen punonjësit bashkiakë, klubi dhe të gjithë punonjësit e akademisë”.

BORXHET DHE PRIVATIZIMI – “Nëse ne do të jemi të suksesshëm që të ndërtojmë një Vllazni cilësore, mendoj se borxhet do t’i shlyejmë brenda dy ose tri viteve. Në asamble u përmend nga kryetarja e bashkisë që aksionet do të kalojnë në asamblenë e këshillit e më pas do të vendoset nëse një pjesë e aksioneve do t’i kalojnë privatit”.

“Unë kam hyrë me dëshirën e mirë për të bërë diçka ndryshe. Nëse nuk do kem rezultat e duhura, do të jem vetë i pari që do largohem. E kam marrë me shumë dëshirë fillimisht. Kemi hasur shumë pengesa. Drejtori teknik po merret me planet e së ardhmes. Në maj do të bëjmë një vizitë në Katar, ku shpresojmë të gjejmë disa sponsorë. Kjo është lëvizje që po bëjmë për t’i lehtësuar ‘dhimbjet’ Bashkisë e taksapaguesve shkodranë”.

MUNGESË SPONSORËSH NË SHKODËR – “Deri në këto momente që flasim, Suad Lici ka marrë 0 lekë nga biznesmenët shkodranë. Ka vetëm fjalë. Çdo gjë e ka përballuar Bashkia, ndoshta dhe vetë privatisht me diçka nga familja ime dhe biznesi im”.

KATEGORIA E PARË – “Kemi bërë një ecuri pozitive. Kemi pasur edhe ne luhatjet tona. Jemi të kënaqur. Falënderoj edhe ekipet e tjera, krahas luftës sportive, na kanë pritur mirë. Mendoj se kemi bërë një tranzicion të qetë”.

PRESIONI NDAJ TRAJNERIT –  “Në një klub futbolli gjithmonë do të ketë problematika. Ka lojtarë që kërkojnë më shumë minuta, por gjithçka duhet të vendoset nëpërmjet meritokracisë. Ne këtë kërkojmë të vendosim në klub. Nëpërmjet meritokracisë, lojtarët mund të japin më të mirën për skuadrën. Klubi ka marrë dy masa pas një ankese të trajnerit Canaj. Me ardhjen e drejtorit teknik do ta analizojmë këtë situatë”.

PERIUDHË PROVE – “U kam thënë sportistëve se këto dy muaj do ju shërbejnë, menjëfjalë janë në një lloj prove. Trajneri Lika na ka lënë një raport, një të tillë do e përgatisë tekniku Canaj më vonë dhe drejtori teknik. Më pas do të vendosim për merkaton. Pak a shumë i kemi të qarta idetë. Në përfundim të sezonit do merren hapa konkretë”.

“Unë nuk dua të jem euforik, por besoj se Vllaznia vitin tjetër do të jetë krejt ndryshe. Të them të drejtën e kam përjetuar mjaft këtë. Kam pasur shumë vuajtje, aq më tepër tani që jam në rolin drejtues. Jam shumë i vetëdijshëm për çfarë kërkon Shkodra dhe futbolli shkodran. Po punojmë dhe do vazhdojmë të punojmë”.

Leonard Trebicka

Mbrëmjen e nesërme Skënderbeu luan ndeshjen e parë të turit të parë të Europa League, duke u kthyer kështu në Europë, pas një viti pushim. Stafi teknik është përqendruar te ndeshja me San Julian, ekipin nga Andorra, që është gjysmë amator. Trajneri Ilir Daja gjatë gjithë kësaj periudhe ka kërkuar vlerësim serioz të kundërshtarit, pavarësisht modestisë së tij. Të njëjtin qëndrim ka edhe ndihmësi i tij, Gentjan Liçi. Në një intervistë për “Sport Ekspres”, Liçi flet për gjendjen e ekipit, synimet, merkaton dhe tifozët. Ja intervista e plotë e ish-kapitenit të Skënderbeut, sot zv/trajner i bardhekuqve:

– Liçi, po afron ndeshja e turit të parë në Europa League. A është gati Skënderbeu?

– Të them të drejtën, këtë verë kemi filluar më shpejt se herët e tjera përgatitjet, pasi edhe ndeshjet europiane nisin më shpejt. Mendoj se jemi gati për ndeshjen e parë. Na pret një verë me synime të mëdha dhe kam besim se do të shkojmë larg.

– Të enjten prisni në Korçë një skuadër modeste si San Julia nga Andorra. E lehtë për ju?

– Kundërshtari ynë njihet pak në Europë, por kjo nuk do të thotë se do të jetë e lehtë. Nuk duhet të futemi në fushë me mendimin se do ta kalojmë pa problem ndeshjen. Do të bënim gabim. Ne, si staf teknik, kemi thënë vazhdimisht para lojtarëve se duhet të jemi të përqendruar në çdo moment.

– Edhe në aspektin taktik apo sa i përket grupit të lojtarëve, është gjithçka gati për Skënderbeun?

– Ka gjëra që duhen ndrequr në skuadër dhe sigurisht që një staf teknik asnjëherë nuk kënaqet. Por është ndeshja e parë dhe kemi kohë të ndryshojmë në vazhdim. Këtë e them, pasi gjatë kësaj periudhe kanë ardhur lojtarë të rinj, të cilët duhet të hyjnë në skemat që praktikon trajneri Daja. Mendoj se një pjesë e mirë e atyre që kanë ardhur janë përshtatur. Tani na mbetet që gjithçka ta pasqyrojmë në fushë.

– Si do ta vlerësonit merkaton e kësaj vere, të paktën deri tani?

– Për mua, merkatoja është për t’u vlerësuar, por, nëse ka qenë apo jo pozitive, do të duket kur të marrim rezultatet. Gjithsesi, jam i bindur se kemi afruar lojtarë, të cilët i vlejnë Skënderbeut.

– Flitet se pritet edhe një sulmues. Si është e vërteta?

– Para ndeshjes së turit të parë në Europa League na lejohet të afrojmë edhe një lojtar, ndaj mendoj se drejtuesit nuk e kanë mbyllur merkaton me kaq. Padiskutim që do të gjejmë edhe të tjerë futbollistë, që do të na duhen. Mbrojtja dhe mesfusha janë të kompletuara, kështu që na duhet një tjetër përforcim në sulm. Nëse kjo realizohet, jemi plotësisht të qetë. Ky përforcim duhet për të pasur edhe pak konkurrencë, sepse i bën mirë ekipit.

– Skënderbeu do ta mbyllë kualifikimin që në ndeshjen e parë në Korçë?

– Asnjëherë nuk mund të thuhet një gjë e tillë, por besoj se do ta kalojmë San Julian dhe do të luftojmë fort, si në Korçë, ashtu edhe në Andorrë një javë më vonë. Skënderbeu ka synime madhore, ndryshe nga kundërshtari i turit të parë.

– Po për turin e dytë, çfarë mund të thoni?

– Ne jemi përqëndruar 100% te ndeshja e parë ndaj San Julias, nuk po mendojmë aspak për turin e dytë. Kur ta kemi mbyllur çështjen e kualifikimit, do të shohim kundërshtarin e radhës.

– Rruga deri në grupet e Europa League, ndryshe nga dy sezone më parë, është shumë më e vështirë…

– E dimë që është e vështirë, por jo e pamundur. Në fakt, asnjëherë nuk ka qenë e lehtë. T’i marrim turet një e nga një dhe të shpresojmë.

– Së fundi, në Korçë kthehen ndeshjet europiane pas dy sezonesh. Çfarë premtimi keni për tifozët korçarë?

– U premtojmë më të mirën. Ata janë pjesë e rëndësishme e ekipit tonë dhe sukseset i arrijmë bashkë. Edhe këtë vit do t’i kemi pranë dhe jam i bindur se mbështetja e tyre na mobilizon edhe më shumë. Për mua, janë tifozëria më e mirë në futbollin shqiptar.