Licaj

MOVIOLA | Eliminim dhe polemika, Flamurtari pretendon për dy penallti (VIDEO)

Sport Ekspres — Wed, 06 Feb 2019 15:36:18 +0000

Ndeshja e Kupës së Shqipërisë mes Flamurtarit dhe Tiranës pati shumë polemika ndaj gjyqtarit kryesor të takimit, sidomos në minutat e fundit të sfidës. Flamurtari synonte të përmbyste atë humbje 2-0 në Tiranë dhe ishte shumë pranë, por të besuarit e Dajës nuk ia dolën që të shënonin edhe golin e dytë.

Halili u ndëshkua me karton të kuq që në minutën e 17’, duke lënë skuadrën e tij me një futbollist më pak, ndërsa Kale shënoi dhe kaloi në avantazh Flamurtarin. Në minutat e fundit, ndeshja ishte shumë e tensionuar dhe Flamurtari kërkoi dy penallti.

Fillimisht, në minutën e 69’, Sukaj ul një top në hyrje të zonës dhe rrëzohet, por për gjyqtarin, nuk ka 11-metërsh. Flamurtari sulmoi me forca të shumta dhe sërish pretenduan me penallti. Në sekondat e fundit, Liçaj rrëzohet në zonë, por sërish nuk ka penallti. Të gjithë lojtarët e Flamurtarit rrethojnë gjyqtarin, por asgjë nuk ndryshon dhe kuqezinjtë eliminohen nga Kupa.

Pas ndeshjes kundër Kukësit në kampionat, Flamurtari sërish është pjesë e polemikave dhe ndeshjet e të besuarve të Dajës duket se nuk do të kalojnë pa pasur një moviolë të gjerë.

VIDEO | Flamurtari i penalizuar, shikoni dy rastet për 11-metërsh

Sport Ekspres — Wed, 07 Nov 2018 18:47:51 +0000

Ndeshja e fundit e javës së 12-të ishte ajo mes Flamurtarit dhe Luftëtarit. Skuadrat ndanë nga një pikë, duke barazuar 0-0 në Vlorë, megjithatë rastet e diskutueshme nuk munguan. Ky takim gjykohej nga Olsid Ferataj.

Rasti i parë i diskutueshëm është ai i minutës së 9-të, kur pas goditjes së Bathës, Hoxha ndali topin me dorë, në vijën fatale. Një moment shumë delikat, pasi duket që Hoxha devijon pastër me dorë, ndonëse është në rënie, nuk mund të konsiderohet si një pozicion jonatyral. Një moment që duket se kryesori ka gabuar, por në këtë pikë do duhej gjyqtari pas porte, i cili në këtë takim mungonte.

Episodi i dytë i diskutueshëm është ai i minutës së 33-të, kur Torasa shërben për Mustën, por Liçaj ndërhyn dhe akordohet goditje nga këndi. Një situatë tepër e vështirë për t’u gjykuar nga pamjet filmike, pasi lojtar ii Luftëtarit e ka devijuar topin me këmbën e tij të djathtë, por shihet që me këmbën tjetër i prish ekuilibrin Mustës. Normalisht që për këtë rast plan më të pastër ka pasur gjyqtari anësor, i cili dhe ka marrë vendimin.

Flamurtari, Bicaj & Co. ndahen në mënyrën e tyre me Liçajn

Sport Ekspres — Sat, 20 Jan 2018 22:49:12 +0000

Lejdi Liçaj lë Flamurtarin dhe kthehet te Luftëtari, për të luajtur më shumë, edhe pse është vlonjat dhe Vlora është shtëpia e tij. Trajneri Shpëtim Duro nuk dëshironte ta linte të lirë, por ia ka plotësuar dëshirën, duke e mirëkuptuar lojtarin.

Ndërkaq, nga Antalia, para nisjes për në Shqipëri, futbollistët e Flamurtarit kanë përshëndetur mesfushorin duke kënduar në kor, me Ditmar Bicajn që poston në Facebook videon, me diçiturën: “Lejdi Liçaj njëri nga ne, do i mungosh këtij Grupi”.

Liçaj kthehet në shtëpi

Sport Ekspres — Sat, 22 Jul 2017 19:14:20 +0000

Lajmi ishte në ajër prej ditësh, por sot është bërë zyrtar nga Flamurtari: Lejdi Liçaj rivesh fanellën kuqezi, pas 3 vitesh larg Vlorës.

Tashmë 30-vjeçar, Liçaj është rritur në Vlorë, por ka provuar edhe fanellën e Skënderbeut në sezonin 2009/2010 dhe të Luftëtarit në sezonin 2012/2013.

Dy herë fitues i kupës së Shqipërisë në Vlorë, Liçaj në vitin 2015 shkoi te Bylisi dhe më pas u stabilizua në Gjirokastër, ku ishte një ndër lojtarët më të dashur sezonin e fundit, duke luajtur 31 ndeshje në kampionat e duke pasur një rendiment të shkëlqyer.

Mbrojtës ose mesfushor i djathtë, Liçaj është një opsion mjaft i mirë për Shpëtim Duron, i cili në të djathtë tashmë nuk ka më nevojë për lojtarë.