Leotrim Kryeziu

VIDEO | Një talent shqiptar “ndëshkon” Interin, nis epoka Konte

Sport Ekspres — Sun, 14 Jul 2019 17:38:59 +0000

Interi ka mbyllur ndeshjen e parë të epokës Konte. Zikaltrit zhvilluan një miqësore në Zvicër ndaj Luganos, ku në fund të 90 minutave iu gëzuan fitores 2 – 1 me gola të mesfushorëve Sensi dhe Brozoviç.

Në përballje nuk mungoi një gol shqiptar, pasi goli i vetëm i Luganos u shënua nga ish-sulmuesi i Dritës së Gjilanit, Leotrim Kryeziu. Futbollisti 20-vjeçar është prej një viti pjesë e skuadrës zvicerane, ku është aktivizuar më së shumti me skuadrën e rezervë të Luganos.

Kryeziu ka luajtur për disa vite me grupmoshat e shkollës së mjeshtërisë Loro Boriçi, ndërsa më pas u rikthye në Kosovë, ku spikati më së shumti në grumbullimet me përfaqësueset e grupmoshave të “dardanëve”.

Inter 2 – 1 Lugano
Sensi 25’, Brozoviç 45’/ Kryeziu 87’

Leotrim Kryeziu debuton në Zvicër, goli i Ajetit nuk mjafton ndaj Jang Bojs

Sport Ekspres — Sun, 02 Dec 2018 20:13:37 +0000

Albian Ajeti shënoi golin e vetëm të Bazelit në përballjen me kryesuesit e Jang Bojs. Krahas Ajetit edhe Taulant Xhaka luajti për 90 minuta në këtë takim, që u mbyll me fitoren e miqve me rezultatin 3 – 1.

Leotrim Kryeziu i është dashur të presë diçka më shumë se tre muaj për të debutuar në kampionatin zviceran me skuadrën e Luganos. Sulmuesi 19-vjeçar u aktivizua në minutën 83-të, në ndeshjen kundër Ksamaksit, që përfundoi me rezultatin 2 – 2 .

Benjamin Kololli vazhdon të jetë vendimtar në kampionatin zviceran. Lojtari polivalent i përfaqësueses së Kosovës shërbeu asistin e golit të parë në fitoren 2 – 0 të Zyrihut në derbin ndaj Grasshopersit. Arlind Ajeti luajti për 90 minuta për Grasshopers në këtë takim, ku u ndëshkua me një karton të verdhë.

Në gjurmët e Sadikut, Lugano merr një “goleador” shqiptar

Sport Ekspres — Mon, 23 Jul 2018 09:21:33 +0000

Lugano i kërkon golat sërish nga një sulmues shqiptar. Më parë klubi zviceran ka pasur në ekip Armando Sadikun, që ka arritur të realizojë me ta 33 gola në kampionat, ndërkohë që tani i ka kthyer sytë nga Kosova dhe ka mbyllur marrëveshjen për Leotrim Kryeziun.

Ende pa i mbushur 20 vjeç, sulmuesi do të transferohet në Superligën e Zvicrës. Vjet u shpall kampion me Dritën në Kosovë dhe gjërat gradualisht po i marrin për mirë të riut. Kryeziu ka spikatur me Kosovën U19 në Elitë Round, teksa ka shënuar pesë gola në tre ndeshje, çka bëri që për të ofertat të ishin të shumta.

Në fund Drita ka pranuar ofertën e Luganos, gjë që konfirmohet për “Sport Ekspres” edhe nga burime pranë klubit gjilanas. Sulmuesi u aktivizua titullar në tre nga ndeshjet e kupave të Europës që kanë zhvilluar në Champions kampionët e Kosovës. Për Kryeziun tanimë do të nisë një eksperiencë e re në Zvicër. Prezantimi do të bëhet në ditët e fundit të muajit korrik.