Lejdi Licaj

VIDEO | “Magji e zezë” për Partizanin, Liçaj zbulon edhe shënuesin

Sport Ekspres — Thu, 21 Feb 2019 10:56:48 +0000

Flamurtari mundi Skënderbeun në shtëpi dhe tani përgatitet për ndeshjen e së shtunës me Partizanin në kryeqytet. Edhe pse në Vlorë problemet financiare kanë qenë prezente, mes futbollistëve harmonia është e madhe. Ata madje gjejnë kohë edhe të bëjnë shaka e të ngacmojnë rivalët.

Së fundmi ka qenë mesfushori Idriz Batha, i cili ka postuar një video dhe shkruan: “Magjistari, Lejdi Liçaj, filloi punën”. Vlonjati, i cili njihet për batutat e tij, shfaqet duke bërë si magjistar dhe “parashikon” sfidën me të kuqtë: “0-1, kundërsulm dhe… Ribaj”.

Të qeshura dhe brohoritje në dhomat e zhveshjes. Sikurse kuptohet, optimizmi ëshët i madh para ndeshjes që Flamurtarin zhvillon me Partizanin të shtunën prej orës 17:00 në stadiumin “Selman Stërmasi”.

U largua nga Luftëtari, Liçaj gjen skuadrën e re

Sport Ekspres — Sat, 05 Jan 2019 10:24:33 +0000

Lejdi Liçaj doli lojtar i lirë në fund të muajit dhjetor, pasi i përfundoi kontrata me skuadrën e Luftëtarit. Në takimet e fundit me gjirokastritët ai nuk u aktivizua, çka bëri që edhe të mos kishte diskutime për rinovimin e marrëveshjes.

Gjatë kësaj periudhe Liçaj nuk ka qëndruar duarkryq, pasi ka arritur marrëveshjen për të vijuar karrierën e tij aty ku edhe ka luajtur më së shumti: te Flamurtari. Lajmi raportohet nga “A2 News” dhe mbetet vetëm zyrtarizimi i mbrojtësit të djathtë tek ekipi i vendlindjes.

Futbollisti 31-vjeçar rikthehet pas një viti në Vlorë, ndërkohë që në karrierën e tij ka provuar të veshë edhe fanellën e Skënderbeut dhe Bylisit. Liçaj mund t’i bëjë shumë punë trajnerit Ilir Daja, pasi luan në disa pozicione.

Kriza e Luftëtarit, largimi i parë “big”

Sport Ekspres — Sat, 08 Dec 2018 09:12:13 +0000

Luftëtari mund të humbë një nga lojtarët kryesorë të viteve të fundit. Sportekspres.com mëson se “xholi” i bluzinjve, Lejdi Liçaj, do të jetë largimi i parë i madh nga skuadra gjirokastrite. Vlonjatit i përfundon kontrata dhe nuk do të rinovojë.

Arsyet janë të shumta. Mes tyre edhe ato financiare. Prej muajsh në Gjirokastër nuk paguhen futbollistët dhe së fundmi gjithçka ka dalë hapur, pavarësisht se në kampin bluzi janë munduar të mohojnë herë pas here problemet.

Liçaj së fundmi nuk është preferuar as nga trajneri Gentian Mezani. Gjithçka ndodhi pas ndeshjes me Flamurtarin dhe në dy takimet e radhës ishte në pankinë. Në takimin e fundit me Kukësin ai nuk ishte as në stol.

Largimi i tij nuk do të jetë i vetmi, pasi edhe të tjerë lojtarë janë të pakënaqur. Drejtuesit duhet të gjejnë një zgjidhje për të shlyer detyrimet financiare që kanë ndaj lojtarëve, pasi një pjesë e mirë e tyre kanë oferta dhe po joshen nga klube të tjera të elitës.

VLADIMIR PRENGA

Mezani rigjen një titullar, kundër Laçit pa tifozë

Sport Ekspres — Mon, 29 Oct 2018 13:06:14 +0000

Luftëtari mori tre pikë me mjaft vlera kundër Kastriotit dhe tanimë për momentin e ka lënë vendin e parafundit në klasifikim. Gjirokastritët kanë mundësinë të thellojnë diferencën me Kamzën e vendit të parafundit javën e ardhshme dhe për këtë duhet të mposhtin Laçin.

Kurbinasit kanë pësuar dy humbje radhazi dhe do të udhëtojnë drejt qytetit jugor jo në gjendjen e tyre më të mirë, sidomos në aspektin psikologjik. Gjithsesi nuk do të jetë aspak e lehtë dhe trajneri Mezani e di këtë.

Sikurse dihet, kjo ndeshje do të luhet pa praninë e publikut. Luftëtari është dënuar nga Komisioni i Disiplinës pas ndeshjes në shtëpi me Skënderbeun dhe kështu takimi me Laçin do të luhet në qetësi totale.

Për këtë ndeshje trajneri Mezani do të ketë të gatshëm edhe mbrojtësin Lejdi Liçaj, i cili në ndeshjen me Kastriotin ishte i pezulluar për shkak të kartonëve të verdhë. Vlonjati pritet të jetë titullar kundër kurbinasve.

Luftëtari ndryshon sërish mbrojtjen, lëvizje e detyruar

Sport Ekspres — Tue, 23 Oct 2018 09:42:53 +0000

Luftëtari ka lënë pas humbjen e pësuar me Partizanin dhe po mendon për transfertën e radhës me Kastriotin. Kërkohen pikët maksimale kundër krutanëve, edhe pse luhet jashtë fushe. Trajneri Gentian Mezani ndërkohë duhet të ideojë formacionin.

Ai nuk do të ketë në dispozicion mbrojtësin Lejdi Liçaj, i cili me kartonin e verdhë të marrë me Partizanin e çoi në katër numrin e tyre. Kështu i duhet të pushojë këtë javë për t’u kthyer i gatshëm për takimin kundër Laçit në shtëpi.

Mezani në këtë mënyrë është i detyruar të ndryshojë mbrojtjen sërish. Në të djathtë në vend të Liçajt me shumë mundësi do të pozicionet Oltion Rapa. Por dilema mbetet se kush do të zhvendoset në qendër krah Rustem Hoxhës.