Lebron James i pafuqishëm, Rockets “kockë” e fortë

Sport Ekspres — Sun, 21 Oct 2018 08:52:36 +0000

LeBron James u largua nga Cleveland Cavaliers te Los Angeles Lakers për të luftuar për titullin kampion në NBA, por në dy ndeshjet e para ka dalë i mposhtur. Këtë herë Houston Rockets i ka thyer 115-124, me James Harden (36 pikë, 5 asite, 7 rikuperime) dhe Chris Paul (28 pikë, 10 asiste, 7 rikuperime) që ishin në një formë të mirë.

James shënoi 24 pikë dhe kjo nuk mjaftoi, sikurse as fakti që gjashtë shokë të tij arritën të regjistronin më shumë se 10 pikë. Loja ishte deri diku e barabartë në tre periodat e para, ndërsa në të fundit Rockets bënë më mirë dhe fituan.

Dramatike ishte përballja Miami Heat-Chartlotte Hornets, skuadra që në fund u ndanë me një pikë. 112-112 shkoi ndeshja, ndërkohë që miqtë shënuan me një gjuajtje të lirë në fund dhe nuk pati më kohë. Kemba Walker ishte njeriu i ndeshjes me 39 pikë të realizuara.

Interesant edhe takimi mes Chicago Bulls dhe Detroit Pistons. Miqtë arritën të bllokonin sulmin e fundit të vendasve, që tentuan përmbysjen me një gjuajtje për tre pikë. Blake Griffin ishte i papërmbajtshëm, me 33 pikë të shënuara dhe 12 topa të rikuperuar. Po aq pikë për Bulls-at shënoi edhe Zach LaVine, i cili u bllokua në fund nga Griffin.

Dallas Mavericks ka kaluar me sukses Minnesota Timberwolves. 276 pikë të shënuara nga të dyja skuadrat, por vendasit fituan 140-136. Kosha të shpërndarë në pjesën më të madhe të skuadrës nga të dyja krahët. Luka Donçiç (26 pikë) ishte shënuesi më i mirë për Mavericks, kurse Karl-Anthony Towns për Timberwolves.

Portland Trail Blazers janë në rrugë të mbarë, pasi morën fitoren e dytë. Këtë herë kanë mposhtur San Antonios Spurs, që provuan shijen e humbjes. Diferenca u bë në periodën e dytë dhe të tretë (22-22; 37-28; 38-32; 24-26). Damian Lilliard bëri një paraqitje të mirë, pasi shënoi 29 pikë dhe asistoi nëntë herë. DeMar DeRozan i Spurs-ave asistoi po aq herë dhe shënoi një pikë më pak.

Chicago Bulls-Detroit Pistons 116-118
Dallas Mavericks-Minnesota Timberwolves 140-136
Portland Trail Blazers-San Antonio Spurs 121-108
Miami Heat-Charlotte Hornets 112-113
Denver Nuggets-Phoenix Suns 119-91
Los Angeles Lakers-Houston Rockets 115-124

Brajant sqaron zërat e rikthimit: Tifozët e mi kundër Xhejms? Do ndryshojnë mendje

Sport Ekspres — Mon, 27 Aug 2018 15:03:39 +0000

Kobi Brajant është një nga basketbollistët më të mëdhenj të historisë dhe një ikonë e ekipit të Los Anxhelos. Pesë tituj NBA të fituar me bluzën e Lejkërs, shume vite në nivele të larta dhe ta shihje në aksion ishte një emocion i madh. Brajant është tërhequr nga basketbolli para dy vitesh dhe komenton mbi zërat që flasin për një rikthim të tij. Ai ndalet dhe te afrimi i Lebron Xhejms te Lejkërsat dhe ka një mesazh për tifozët, të cilët kritikojnë blerjen e re.

“Kam dëgjuar disa kritika kundrejt Xhejms, por nëse dikush më do mua, do dhe fitoret e ekipit. Gjaku im është verdhevjollcë dhe nuk njoh ngjyra të tjera. Nuk ka sens krahasimi midis meje dhe Xhejms. Çdokush që luan basketboll dëshiron të fitojë kampionate dhe kjo gjë vlen dhe për të gjithë lojtarët dhe drejtuesit e Lejkërs. Ky është motivi i të gjithëve që luajnë dhe Xhejms nuk do të zgjidhte Lejkërs, nëse nuk do dëshironte të fitonte. Kush është skeptik kundrejt tij, do të ndryshojë mendje shumë shpejt”, komenton Brajant gjatë një programi televiziv ku ishte i ftuar.

“Rikthim në fushë? Mundësitë për t’u rikthyer janë shumë afër zeros. Kur u tërhoqa, të gjitha deklaruan që do të rikthehesha, sepse nuk do arrija të bëja diçka tjetër. Sfida ime mbasi e mbylla me basketbollin ka qenë që t’u tregoja të gjithëve, që nuk isha një person i aftë për të bërë vetëm një gjë në jetën time. Nuk do të rikthehem më të luaj, me të vërtetë”, përfundon 40-vjeçari, Kobi Brajant.