Laxalt

Është në shitje, mbrojtësi i Milanit takim me drejtuesit

Sport Ekspres — Sat, 06 Jul 2019 06:48:19 +0000

Milani po mendon seriozisht shitjen e Laksalt. Uruguajani nuk ka bindur me paraqitjet e tij në Milano dhe largimi është zgjidhja perfekte për të dyja palët. 26-vjeçari regjistron vetëm 6 ndeshje si startues në gjithë sezonin e kaluar të Serie A.
Atalanta dhe Torino janë dy klubet, që interesohen për shërbimet e latinit. Klubi “granata” janë pala më e interesuar në këtë mes. Ndërkohë, Atalanta do të hyjë në garë për Laksalt në rast largimi të Gosenit.

Siç raportojnë mediet italiane, Laksalt ka ndërprerë pushimet dhe është paraqitur në zyrat e “Casa Milan”. Arsyeja ka qenë një takim me Ariel Krasouski, drejtor i jashtëm sportiv në klubin kuqezi. Gjatë bisedës është diskutuar e ardhmja e lojtarit. Zyrtari i Milanit i ka shpjeguar se është në shitje.

Laksalt është dakort me këtë ide dhe në konsensus me klubin do të zgjedhë ekipin e ri, ku do vazhdojë karrierën. Largimi i tij do të gjeneronte të ardhura në këto ditë të errëta financiare për Milanin. Lojtari vlerësohet rreth 14 milionë euro në merkato.

Nis epoka e re, flasin tre blerjet e Milanit

Sport Ekspres — Fri, 17 Aug 2018 14:12:14 +0000

Tri blerjet që mbyllin merkaton e Milanit Laksalt, Bakajoko dhe Kastijeho kanë folur para gazetarëve për aventurën e re në skuadrën kuqezi. Të tre lojtarët janë shprehur mjaft të nderuar që do të veshin fanellën e skuadrës 7-herë kampione të Champions-it. Vlerësimet për historinë e klubit nuk kishin si të mungonin, teksa premtuan se do të japin maksimumin për trajnerin dhe fanellën.

LAKSALT – “Ardhjen te Milani e kam përjetuar si një ëndërr që po bëhet realitet. Isha shumë pranë Zenitit, por kur më kërkoi Milani, nuk u mendova dy herë. Është diçka e veçantë kur komunikon me figura si Maldini dhe Leonardo. Roli? Ajo pjesë i takon trajnerit, Gatuzo do të vendosë se ku do të luaj ”.

KASTIJEHO – “Emocionet nga San Siro? Kam qenë dikur me familjen vite më parë, ishte një eksperience e paharrueshme. Mezi po pres të luaj aty. Kam zgjedhur numrin 7, pasi është një numër që më pëlqen dhe ishte i lirë, gjithsesi këto janë gjëra dytësore. Roli? Më së shumti kam luajtur si anësor i djathtë. Do të bëj maksimumin për të luajtur kudo që më kërkon trajneri”

BAKAJOKO “Vij pas një eksperience nga kampionati anglez. Gjërat nuk shkuan ashtu siç e prisja, por mund të them se kam marrë shumë mësime. Tani jam i fokusuar vetëm te Milani. Krahasimi me Desajin? Pa dashur të tregoj mungesë respekti, ai ishte një mbrojtës, ndërsa unë luaj në mesfushë, gjithsesi shpresoj të arrij sukseset që ai pati këtu. Ka ngjashmëri midis Kontes dhe Gatuzos, e vërej këtë në stërvitje, por akoma nuk kemi folur për rolin tim, detyrat që do të kem etj… Futbolli italian është shumë i ndryshëm nga ai anglez. Besoj se më punë do ta përshtatem shpejt falënderoj klubin, jam shumë i lumtur për këtë mundësi.

Milani mbyll marrëveshjen për titullarin e Uruguait, merkatoja nuk ka mbaruar

Sport Ekspres — Wed, 15 Aug 2018 13:15:03 +0000

Leonardo i bën gjërat në heshtje dhe me shpejtësinë e dritës, sepse në pak ditë ka mbyllur bisedimet edhe me Xhenoan për mesfushorin Diego Laksalt, i cili sot zbarkon në Milano dhe nesër kryen vizitat mjekësore.

Anësori i majtë, i aftë të luajë edhe në mbrojtje, por edhe si mesfushor ofensiv, vjen nga tre sezone të shkëlqyera me Xhenoan dhe ishte titullar me Uruguain në Kupën e Botës, ndaj është një goditje cilësore, duke llogaritur që bëhet fjalë për një futbollist vetëm 25 vjeç.

E solli Interi në Itali, duke e blerë për 2.8 milionë euro nga Defensori në vitin 2013, por që atëherë vetëm huazime, derisa e bleu Xhenoa për 2.3 milionë në vitin 2016.

Tani kalimi në krahun kuqezi të Milanos, ndoshta më hakmarrje në mendje. Xhenoa merr sulmuesin Lapadula dhe 3 milionë euro, ndërsa çmimi total i Laksalt shkon 14 milionë euro, plus 4 milionë në bonuse.

Në Itali raportohet se Laksalt është një goditje për të përforcuar krahun e majtë, sepse Rikardo Rodrigez mund të shitet te PSG, ndoshta më synimin për të marrë ndonjë lojtar, ku ëndrra mbetet mesfushori Rabio.