Karikari te Partizani, Neftçi jep një mesazh të qartë

Sport Ekspres — Sun, 06 Jan 2019 09:41:45 +0000

Kuame Karikari, sulmuesi i Neftçi Baku, është objektiv i Partizanit dhe në klubin e kuq besojnë se lojtari do të jetë pjesë e tyre për pjesën tjetër të sezonit. Mes palëve ka një marrëveshje parimisht dhe sikurse “SportEkspres” ka mësuar një ditë më parë, të hënën e presin sulmuesin në kampin e kuq.

Gjithsesi në Azerbajxhan janë të prerë, teksa shkurtimisht ka folur edhe Rustam Allahverdijev, zëdhënësi për shtyp i Neftçi Baku. “Karikari është aktualisht një futbollist i Neftçi dhe nuk ka shkuar askund”, ka thënë mes të tjerash Allahverdijev për “Qol.az”.

Karikari te kryesuesit e elitës azere nuk ka gjetur shumë hapësira dhe në tetë ndeshje (4 titullar) ka shënuar dy gola. I gjatë rreth 190 centimetra, sulmuesi ka eksperienca të ndryshme në Katar, Ukrainë, Norvegji, Turqi dhe Suedi.

VIDEO | Ka mbetur vetëm firma, Demi dhuratë “big” Partizanit

Sport Ekspres — Sat, 05 Jan 2019 11:08:59 +0000

“Partizanit i duhet një sulmues goli për të fituar titullin kampion”. E kanë thënë të gjithë, edhe pse trajneri Skënder Gega deklaratë pas deklarate tentonte të tregonte besimin e tij te lojtarët që kishte në dispozicion. Por opinioni i përgjithshëm ka fituar në fund dhe presidenti Gazment Demi e ka “zgjidhur qesen”.

Tani është shumë e vështirë të gjesh lojtarë, por përmes menaxheres të ndryshëm është tentuar të gjendet i duhuri. Për Partizanin ka një emër konkret dhe ai është sulmuesi Kuame Karikari, ganez që do të lërë Neftçi Baku.

Te kryesuesit e elitës azere ai nuk ka gjetur shumë hapësira dhe në tetë ndeshje (4 titullar) ka shënuar dy gola. I gjatë rreth 190 centimetra, sulmuesi ka eksperienca të ndryshme në Katar, Ukrainë, Norvegji, Turqi dhe Suedi.

Stacioni i radhës për sulmuesin do të jetë Shqipëria. Marrëveshja mes palëve është arritur dhe ditën e hënë pritet të mbyllet gjithçka edhe në mënyrë zyrtare. Karikari ka ulur goxha pretendimet financiare dhe është bindur të provojë Superioren. Ndërmjetës për transferimin e 26-vjeçarit është menaxheri Franci Bode.