kualjarela

Ka shënuar më shumë se Ronaldo, Kualjarela zbulon sekretin

Sport Ekspres — Sat, 23 Mar 2019 11:45:55 +0000

Ylli i Sampdorias, Fabio Kualjarela ka zbuluar se si vazhdon të shënojë rregullisht në Serie A. Edhe pse 36-vjeç, sulmuesi e ka gjetur rrjetën plot 21 herë në të gjitha kompeticionet, 2 më shumë se Kristiano Ronaldo, i cili ka shënuar 19.

Për “TuttoSport”, Kualjarela zbuloi sekretet e formës së tij, gjendjes fizike dhe arsyet që e mbajnë ende të motivuar të stërvitet çdo ditë dhe të jetë i gatshëm për të veshur këpucët: “Jam entuziast i madh, futbolli më ka shpëtuar jetën. Nuk mund ta lë kurrsesi, jo tani.

Kam një moshë ku i kontrolloj mirë emocionet dhe nuk ndikohem, prandaj jam shumë i fokusuar në fushën e lojës. Ky është sekreti i statistikave të mia: Kam përqendrim të lartë vetëm në fushë dhe mundohem ta shijoj çdo ndeshje sikur të ishte e fundit. Jam shumë i lumtur që vazhdoj të luaj me Sampdorian”, përfundoi Kualjarela.

Rini e dytë për Kualjarelan, sulmuesi rikthehet edhe në kombëtare

Sport Ekspres — Fri, 01 Feb 2019 21:30:49 +0000

Pas 11 ndeshjeve radhazi me gol, Fabio Kualjarela vazhdon të jetë një nga sulmuesit më të mirë në qarkullim në kampionatin italian të futbollit. Sulmuesi veteran nuk di të plaket dhe vazhdon me paraqitjet e tij shumë pozitive.

Pikërisht këto paraqitje kanë bërë që trajneri i Italisë, Roberto Mançini ta rikthejë në kombëtare bomberin 36-vjeçar. Kualjarela nuk luante me kombëtaren që nga viti 2010 dhe për “Axurrët”, ka shënuar 7 gola në 25 sfida. Kualjarela është padiskutim lojtari më i mirë te Sampdoria dhe ka udhëhequr skuadrën blu të Sampit me shiritin e kapitenit në krah.

“Plakushi” Kualjarela i pandalshëm, vetëm një ndeshje larg rekordit të Batistutës

Sport Ekspres — Sun, 20 Jan 2019 21:59:43 +0000

Fabio Kauljarela nuk di të ndalet. Sulmuesi 35-vjeçar është paradoksi më i madh i futbollit italian, pasi po zhvillon sezonin më të mirë të karrierës në një moshë ku pjesa dërrmuese e futbollistëve varin këpucët në gozhdë.

“Bomberi” shënoi një dopietë në ndeshjen në transfertë ndaj Fiorentinës, që u mbyll me shifra të barabarta 3 – 3. Ecuria e italianit gjatë muajve të fundit është e pabesueshme, pasi ai ka gjetur rrugën e rrjetës në 10 takime, një statistikë kjo që e mban vetëm një ndeshje larg rekordit të argjentinasit Batistuta, i cili shënoi në 11 ndeshje radhazi në sezonin 1994/1995.

Ndërkohë, që krahas këtij rekordi Kualjarela është në garë dhe për këpucën e artë të kampioanatit italian, teksa për momentin ndan vendin e parë me Kristiano Ronaldon dhe Duvana Zapatën, me 14 finalizime pas 20 ndeshjesh të zhvilluara deri më tani në Serie A.