“Klubi njofton marrëveshjen me Kristi Koten. Mesfushori 21 vjeçar ka nënshkruar sot kontratën e re për dy vite e gjysmë me të drejtë rinovimi edhe për një tjetër vit. Kote i cili iu bashkua ekipit në fillim të sezonit aktual duke u aktivizuar edhe në disa takime titullar,konsiderohet pjesë e rëndësishme e projektit të klubit. Drejtuesit do të vazhdojnë të ndjekin një strategji të tillë duke i besuar dhe mbështetur lojtarët e rinj të talentuar”, shkruan klubi i Partizanit.

Kote ka debutuar në një ndeshje kundër Flamurtarit në fund të muajit shtator. Ai fillimisht nisi të marrë minuta, ndërkohë që më pas arriti të luante edhe si titullar. Në pjesën e parë të sezonit është aktivizuar në 12 ndeshje, pesë prej tyre i ka nisur nga minuta e parë. Ai ka bindur trajnerin Gega dhe tashmë klub e ka shpërblyer korçarin me një kontratë të re.

Korçari foli edhe ndeshjen e shkuar me Skënderbeun, ekipin e vendlindjes. Ngacmimet nga shokët, mbështetja e trajnerit dhe kombëtarja Shpresa. Kote thotë fjalët e tij të para si lojtar i Partizanit, teksa thekson se ndaj Kamzës është një ndeshje normale dhe se nuk kërkon hakmarrje për faktin që nuk qëndroi aty pas një testi që bëri në verë.

Zakonisht e keni nisur nga stoli, por lajm i mirë është që sa herë trajneri kthen sytë nga stoli, ju jeni i pari që aktivizoheni. Sa ju ndihmon kjo ta mendoni veten të rëndësishëm dhe që një ditë do ta nisni edhe si titullar?
-Nuk e diskutoj. Në momentin e parë që erdha te Partizani kam qenë shumë i lumtur dhe më kanë pritur shumë mirë, si shokët, ashtu edhe stafi. Kanë bërë që të rritem dita-ditës dhe shanset që më janë dhënë më kanë motivuar edhe më shumë për të dhënë më të mirën. Shpresoj që edhe në shanset që të më jepen edhe në vijim, të jap edhe më shumë nga vetja ime. Jam i sigurt që akoma nuk kam shprehur gjithë potencialin tim.

Si ndihesh të jesh pjesë e kësaj skuadre?
-Është një privilegj për çdo lojtar, sidomos në moshën time, që të përfaqësojë fanellën e një klubi kaq të madh dhe me emër, siç është Partizani.

Ishte e vështirë për ju të luani kundër ekipit të vendlindjes?
-Nuk mund të them e vështirë. Ishte një kënaqësi shumë e madhe, por edhe një motivim shumë i madh. Përfaqësoja një klub shumë madh si Partizani dhe e vetmja ndjesi që kisha ishte që të jepja më të mirën për këtë fanellë.

Ju kanë ngacmuar pas ndeshjes shokët tuaj në Korçë?
-Ngacmimet ndodhin vazhdimisht. Shokët nga Korça ngacmojnë, por që mbeten atje. Thjesht ngacmime të vogla.

Sa e rëndësishme është për ju mbështetja e profesor Gegës?
-Nuk e diskutoj, është një vlerësim shumë i madh prej tij që më ka dhënë këtë shans. Shpresoj që edhe në vijim t’ia shpërblej edhe më shumë.

Keni luajtur në të shkuarën me kombëtaret e moshave. E keni synim që të vishni edhe fanellën e Shpresave?
-E gjithë vëmendja ime momentalisht është te Partizani. Dëshiroj të jap më të mirën këtu dhe më pas t’ia lëmë kohës të gjitha.

Formacioni nuk tregohet dhe nuk presim të na e thoni, por a i shikoni sfida të tilla si me Kamzën e Kastriotin si një mundësi për të treguar vlerat dhe për të siguruar më pas një vend në formacion?
-Nuk e diskutoj. Mua çdo shans që më jepet përkthehet në një mundësi të artë për mua që të tregoj vlerat e mira. Por pse jo që të marr akoma edhe më shumë minuta. Kjo varet gjithçka nga unë.

Para se të vinit të Partizani, u munduat të bindnit Kamzën këtë verë. A është ky momenti që të tregoni se kanë gabuar me ju?
-Nuk pse i tregoj njeriu nëse kanë gabuar apo jo. E rëndësishme është që të bëj më të mirën aty ku jam. Momentalisht jam te Partizani dhe dua të bëj më të mirën këtu.

VLADIMIR PRENGA

Sapo nisi të shkëlqente me moshat nisën krahasimet e para. “Do të jetë pasardhësi i Bledi Shkëmbit”. Kjo thuhej që në vitin 2015. Nuk i kish mbushur ende 17 vjeç dhe Mirej Josa, asokohe trajneri i Skënderbeut, e afroi në ekipin e parë. Aty ishte edhe Shkëmbi, i cili mbante shiritin e kapitenit.

Në moshën e tij sigurisht që Kote ngazëllehej kur e krahasonin me Shkëmbin, pasi ishte idhulli i një qyteti. Për të ishte një shtysë më shumë për të tentuar të bëhej futbollist profesionist. Kristi e shihte si privilegj diçka të tillë dhe kishte nisur të ëndërronte gjëra të mëdha. Pse jo, ishte edhe pjesë e moshave të kombëtares.

EKSPERIENCA TE KOMBËTARET – Kote, ndër bashkëmoshatarët e tij, ka qenë nga më të spikaturit. Për këtë arsye ka mbajtur edhe shiritin e kapitenit te Shqipëria U17. Mesfushori qendror ka luajtur në 6 ndeshje zyrtare me paratërinjtë dhe më pas në tre ndeshje të tjera me të rinjtë.

Nuk do mend që cilësitë nuk i mungonin. Por ishte i vogël dhe për t’u bërë futbollist profesionist duhen shumë gjëra. Tanimë Kote duket se po gjen vetveten. Po merr minuta te Partizani dhe është një ekip që mban vendin e parë në kampionat. Ndoshta mund të fitojë edhe një vend te Shpresat. Gjithsesi për të parësore është të ketë minuta e të luajë.

HAJDUKU DHE RIBASHKIMI ME SHKËMBIN – Mesfushori, ashtu si shumë të rinj, dëshironte të provonte të luante jashtë vendit. Në nëntor të vitit 2015 provoi të bindte kroatët e Hajdukut të Splitit. Iu nënshtrua provës dhe e kaloi me sukses. Pas një viti në Kroaci gjërat atje ndryshuan, pasi në klub pati një revolucion.

Për Koten dhe shumë të tjerë duhej sërish të kalohej prova. Gjithsesi korçari vendosi të kthehej në shtëpi. Sërish me moshat e Skënderbeut. Gjatë kësaj periudhe shumë gjëra kishin ndryshuar. Bledi Shkëmbi tanimë e kishte lënë futbollin e luajtur dhe nisi eksperiencën e tij si trajner.

Ish-fantazisti mori drejtimin e Lirisë dhe mendoi t’i jepte shansin e parë si profesionist. Pas eksperiencës së parë me bardhezinjtë, shumica e lojtarëve shqiptarë u largua me ikjen e Shkëmbit. Kote ndoqi të njëjtën rrugë. I pëlqente Tirana.

RRUGËTIMI I RI – Kote është ende i ri. Vetëm 20 vjeç. U rikthye në Shqipëri këtë verë dhe dëshironte të qëndronte në kryeqytet, ku mundësia për të gjetur ekip është më e madhe. Por as shkollimi nuk duhej lënë mënjanë.

Superiorja është dëshira për shumë lojtarë të rinj dhe mesfushori iu bashkëngjit Kamzës.  E kaloi provën apo jo, pak rëndësi ka. Mbi të gjitha duhet të gjente një ekip ku t’i jepej mundësia të luante. Kote më pas vendosi t’i bashkohej Partizanit B.

Dy javë aty dhe një miqësore me Tërbunin i dha mundësinë atij të tregonte vlerat e tij përballë trajnerit Skënder Gega. Merkato ishte mbyllur dhe fillimisht duhet të debutonte me ekipin e dytë. Më pas nuk kishte më pengesa dhe tashmë ka provuar të debutojë në Superiore.

Sigurisht nuk është Bledi Shkëmbi. Tani po kërkon të ndërtojë vetë rrugën e tij dhe më parë ish-fantazisti i Skënderbeut ka kaluar përmes Kroacisë dhe Partizanit. Edhe Kote po e “imiton” disi, por duke qenë vetvetja. Rrugëtimi si profesionist ka nisur…

/PËRGATITI: VLADIMIR PRENGA