Problematikat e krijuara, Alimehmeti i mendon të mbyllura vetëm pasi të zgjidhet ligjërisht gjithçka me kompaninë angleze, që po e mban në ajër skuadrën. Për SportEkspres.com, Alimehmeti deklaron se rrugëzgjidhja është në tryezë për Elbasanin. Ai nuk harron edhe skuadrën e tij të zemrës, Tiranën.

SITUATA E ELBASANIT – Tekniku tiranas beson se përmirësimi i financave do sjellë ndryshimin te kjo skuadër, që sipas tij po “lëngon” si inferiore. “Ka disa vite që Elbasani po mbetet peng i një gjyqi me anglezët, që e futën këtë skuadër elite në kanalet e thella si inferiore. Si ish-trajner i kësaj skuadre në Superiore, ndjej keqardhje për këtë transformim. Mendoj se rrugëzgjidhja është në tryezë: mbyllja e gjyqit që po bëhet telenovelë pa asnjë kuptim”.

RRUGËZGJIDHJA – Në 15 sezonet e fundit, Elbasanin e kanë drejtuar 15 trajnerë. Një shifër kjo që flet vetë. Gjithsesi Alimehmeti këtë nuk e quan si problemin kryesor të  situatës. “Tregu i trajnerëve ka qenë normal edhe te Elbasani, por unë besoj se nuk kanë qenë ata arsyeja pse skuadra ndodhet në inferiore. Sapo të zgjidhet gjyqi dhe financat të rregullohen, duhet një riorganizim i klubit e më pas të fillojë ngritja e një skuadre pretendente me lojtarë cilësorë” , u shpreh Alimehmeti.

SITUATA TE TIRANA  – Skuadra “mëmë” për Krenar Alimehmetin, Tirana, ka bërë merkato cilësore dhe ai e sheh si pretendente për sezonin e ri. “Tirana ka bërë lëvizje cilësore në merkaton e kësaj vere. Me përforcimet e reja unë e shoh si një skuadër pretendente për sezonin e ri. Kësaj skuadre i duhet që të përshtatet më mirë me filozofinë e trajnerit Ardian Mema. Lëvizjet e fundit të drejtuesve i shoh me optimizëm”, përfundon Alimehmeti.

AGRON KAJA

“Të them të drejtën në fillim të sezonit, Tirana hyri si një ndër ekipet pretendente për pjesëmarrjen e Europës. Mendoj se fitorja me Laçin ishte një zgjim me shumë vonesë i Tiranës. Megjithatë, kjo tregon që Tirana ka mundësi dhe forcat brendapërbrenda. Ky vit iku. Kanë dhe një finale kupe, që shpresoj ta fitojnë”.

“Tirana ka pasur shumë luhatje. Nuk e di si i kanë pasur brenda, nuk besoj se kanë qenë të këqija, por grupi nuk ishte kompakt, kanë çeduar në shumë raste. Tirana ka shumë nevojë për ndërhyrje”.

“Për të kuptuar sa të renduar ishin nga gjenda psikologjike lojtarët e Tiranës mjafton të shikosh momentin kur shkuan te tifozët. Ishte një gëzim i jashtëzakonshëm vetëm se shpëtuan nga kategoria, llogarit se çfarë stresi kishin përbrenda ky klub e këto lojtarë, që ndoshta s’do të ishin gëzuar kaq shumë nëse do ishin kualifikuar kaq shumë”.

“Mendoj se këtë herë do të jetë pika e kthesës, për shumë arye. Tirana e ka fitoren të domosdoshme, për moral, për pozitat që ka në renditje. Besoj se do t’ia dalin. Derbi gjithmonë është një ndeshje që duhet trajtuar si një ndeshje e veçantë, nuk ka rëndësi renditja dhe gjendja e skuadrave.

Unë nuk mendoj se ka diferenca në organikë, sa i takon lojtarëve, lojës, por faktet janë fakte dhe renditja e tregon. Partizani është në një moment që është më i çliruar dhe kërkon ta mbyllë kampionatin nga matematika, pasi titulli është vendosur me kohë. Tirana vjen pas kualifikimit në finalen e Kupës. Do të jetë një sfidë e lufutar.

Memën e kam mik, kemi luajtur bashkë futboll. Mema është një trajner i zgjuar, shumë punëtor. Prandaj jam besimplotë se Mema sezonin e ardhshëm do të bëjë gjëra të mëdha me Tiranën”, u shpreh ish-kapiteni bardheblu për “RTSH Sport”.

“Tirana e kishte marrë shumë lehtë kampionatin, ndoshta edhe nga mospërshtatja e saj me Superioren. Një tjetër faktor ishte edhe ndryshimi i trajnerit në fillimin e kampionatit, pasi nga Ze Maria duket qartë ndryshimi i filozofisë së tyre dhe efektet reale në këtë periudhë”, kështu deklaroi në këtë intervistë ish-futbollisti e trajneri i Tiranës, Krenar Alimehmeti.

INTERVISTOI: AGRON KAJA

Si e përshkruani situatën e Tiranës në ndeshjet e luajtura gjatë muajit janar, në kampionat dhe në Kupë?
-Të dy kompeticionet kanë specifika të ndryshme dhe nisur nga ky këndvështrim, mendoj se Tirana ka treguar ndryshim cilësor në raport me paraqitjet në gjysmën e parë të sezonit. Në këtë progres unë shikoj se është rritur besimi te skuadra, ndaj edhe përfaqësimi ka qenë më dinjitoz.

Ku i shikoni ndryshimet më të spikatura te Tirana në këtë periudhë?
-Si treguesi më kryesor i ndryshimeve cilësore mendoj se është drejtimi teknik nga trajneri Ardian Mema, i cili ka sjellë një fizionomi fituesi te skuadra. Tashmë shpirti bardheblu po ndjehet në këto ndeshje dhe ndryshimet po qartësohen më shumë nga rritja graduale e skuadrës.

Pse Tirana është në vendet e fundit të renditjes në kampionat?
-Tirana e kishte marrë shumë lehtë kampionatin, ndoshta edhe nga mospërshtatja e saj me Superioren. Një tjetër faktor ishte edhe ndryshimi i trajnerit në fillimin e kampionatit, pasi nga Ze Maria te Mema duket qartë ndryshimi i filozofisë së tyre dhe efektet reale në këtë periudhë.

Pse e veçoni trajnerin Ardian Mema në këtë situatë që po kalon Tirana?
–Sepse si pinjoll i familjes së madhe bardheblu me mbiemrin “Mema”, Ardi e njeh mirë mentalitetin e Tiranës dhe këtë ai e ka “injektuar” te skuadra. E veçoj këtë sepse është karakteristikë e veçantë. Shpirti bardheblu në fushën e lojës është pjesë e sukseseve të Tiranës.

Sot Tirana luan në Vlorë ndeshjen e kthimit të turit të dytë të Kupës, e mendoni të kualifikuar?
-Nisur nga rezultati i pastër 2-0 në takimin e parë, Tirana është më pranë kualifikimit. Por duke e parë edhe situatën jo fort të mirë te Flamurtari, mendoj se është momenti që Tirana të mendojë për ndeshjen e turit të tretë të Kupës, ku do presë rezultatin e ndeshjes Laçi-Bylis.

Në tërësinë e 20 javëve të luajtura në Kategorinë Superiore, çfarë tregojnë rezultatet?
-Në tërësi mendoj se renditja tregon realitetin e skuadrave, por jo tek të gjitha. Për nga luhatjet që kanë treguar skuadrat nga ndeshje në ndeshje, më duket një kampionat i çuditshëm. Sepse humbasin thellë në fushat e tyre dhe fitojnë në transfertë.

Në fundjavë luhen ndeshjet e javës së 21-të, mendoni se do të ketë ndonjë surprizë mes tyre?
-Flasim gjithmonë për surpriza, por ato nuk varen nga parashikimet tona. Shikoj si më favorite të gjitha skuadrat vendase, por do të dëshiroja që të kemi një vazhdimësi të pastër si deri në këto javë të luajtura dhe çdo skuadër të marrë atë që do meritojë në fushën e lojës.