Sport 1 ka intervistuar një legjendë të Bajernit, Stefan Efenberg, i cili si gjithmonë nuk e vret mendjen për diplomaci dhe sulmon trajnerin Niko Kovaç për rotacionin e vazhdueshëm.

“Rotacion OK, por jo në mënyrë të vazhdueshme, sepse nuk ka logjikë. Ka momente gjatë sezonit ku duhet të luash me formacionin më të mirë, ndërsa rotacioni futet në lojë vetëm në periudha të ngarkuara, si në Krishtlindje, pas ndeshjeve të kombëtareve, apo kur vjen faza finale e sezonit. Në këtë moment nuk e kuptoj këtë ngut për të ndërruar 6-7 lojtarë për ndeshje, sepse Bajerni duhet të mendojë të shkëputet në Bundesligë dhe të fitojë grupin në Champions”.

Pas ndeshjes në Berlin Zherom Boateng u kritikua ashpër, por Efenberg nuk është dakord: “Tepër e lehtë të fajësosh vetëm një lojtar, nuk mund të gjendet arsyeja e humbjes vetëm të gabimet e Boateng. Ishte një ndehsje e keqe për të, duket qartë që nuk është në nivelin që ka qenë, por është lojtar shumë i rëndësishëm për Bajernin dhe thjesht duhet të kthehet në formën maksimale, fizikisht e psikologjikisht”.

Per ish-mesfushorin e famshëm humbja në Berlin është diçka pozitive: “Në Gjermani të gjithë e dinë që Bajerni është tepër superior dhe lojtarët e Bajernit ndoshta mendojnë se me 80% të rendimentit mund të fitojnë ndaj çdo rivali. Nuk është ashtu dhe ndoshta tani e kanë kuptuar që duhet të kapin maksimumin e vet në çdo ndeshje”.

Niko Kovaç nuk qëndroi i heshtur në konferencën për shtyp pas ndeshjes, ku i bëri thirrje ekipeve të Bundesligës që të respektonin rregullat e “Fair Play”-it kur kanë kundër kampionët e Gjermanisë.

“Kushdo që më njeh mua e di mirë se unë e konsiderohej futbollin një sport ku lejohet kontakte dhe ekipet që unë kam pasur janë mjaft luftarake, por çdo gjë e ka një limit, pasi në lojë vihet shëndeti i lojtarëve. Gjyqtarët duhet të bëjnë më shumë për të parandaluar nxehjen e lojës. Ka raste ku ndërhyrje në kockë nuk ndëshkohen as me të verdhë dhe më pas futbollistët nuk i kontrollojnë dot nervat. Po na dëmtohen lojtarët gjatë të gjithë lojës, Bajerni nuk është i vetmi ekip që po vuan në këtë aspekt. Lojtarët e mi luajnë pastër, shpresoj qe dhe ekipet e tjera të ndjekin shembullin tonë