GJENDJA E STADIUMEVE – “Stadiumet e vendit tonë, përjashto ‘Elbasan Arenën’, ‘Loro Boriçin’ dhe stadiumin ‘Arena Kombëtare’ që po ndërtohet, lënë për të dëshiruar. Nga 10 stadiumet e Superiores kamera nuk ka vetëm në stadiumin e Kamzës.

Kampionati i Kategorisë së Parë është i ndarë në dy grupe me 10 skuadra. Ka stadiume që i plotësojnë kushtet, siç është ai i Shkodrës, por ka edhe stadiume që nuk i plotësojnë, kjo në kuptimin e kamerave të sigurisë apo të sigurisë së pranuar nga UEFA.

Cilësia e fushave lë për të dëshiruar në disa stadiume, ashtu sikurse rrethimet e brendshme dhe të jashtme. Infrastruktura  e ambienteve të brendshme të stadiumeve, sidomos në Kategorinë e Parë dhe të Dytë, lë për të dëshiruar”, shprehet Gjini për ABC News.

STADIUMI “REDI MALOKU – Në Fushë-Krujë gjendja e stadiumit nuk është aspak e mirë, teksa ka probleme me fushën dhe me garantimin e sigurisë. “Ne jemi në dijeni që situata e atij stadiumi është e rënduar, pasi edhe koha nuk ka mbajtur. Aty kanë luajtur dy skuadra, Iliria dhe Kastrioti. Me rritjen e intensitetit të ndeshjeve edhe fusha çedoi”, shton zyrtari i FSHF-së.

LICENCIMI PËR EUROPËN – Për të marrë pjesë në kupat e Europës duhen plotësuar disa kushte dhe kriteri financiar është një nga ato që klubet duhet të plotësojnë. Gjini nuk dëshiron të përmendë emra, edhe pse dihet që për shembull Tirana është një nga klubet që rrezikon licencimin për shkak të borxheve që ka në Tatime.

“Pa përmendur emra, në parim ka klube që rrezikojnë. Por kjo nuk do të thotë që ai klub që në po përmendim, në parim, nesër apo brenda 31 marsit të gjejë një buxhet, të shlyejë detyrimet që ka dhe e plotëson kriterin financiar. Deri më 31 mars nuk flasim dot, por as më pas. Klubi do e marrë vesh, por nuk duam të prishim garën”, përfundon Gjini.

Nga hetimi i kryer nga “Trupi i Kontrollit Financiar të Klubeve” (CFCB) rezultoi se FSHF nuk ka zbatuar rregulloren e UEFA-s në lidhje me licencimin e klubit të Tiranës, që pas hetimit të UEFA-s u zbulua se bardheblutë nuk kishin plotësuar asnjë nga kriteret e UEFA-s për licencimet.

Shuma prej 100.000 Eurosh do t’i zbritet FSHF-së nga fondet vjetore që UEFA i shpërndan federatave anëtare. Masë tjetër e marrë nga UEFA ndaj federatës është futja e sektorit të licencimit në një periudhë vëzhgimi tri-vjeçare.

Në rast se FSHF nuk arrin të plotësojë kërkesat e vendosura nga UEFA në lidhje me zbatimin e përpiktë të rregullores së licencimit, atëherë institucioni rrezikon të gjobitet me 150.000 Euro të tjera.

Edhe stadiumi “Kastrioti” nuk i plotëson kushtet dhe duhen bërë disa ndërhyrje në stadium dhe Komisioni i Licencimeve i kishte lënë detyrat. Në Krujë nuk është bërë asnjë ndërhyrje, kurse në Kukës situata është më komplekse, pasi ka edhe një problem klub-bashki. Gjithsesi presidenti Safet Gjici nuk po tenton një zgjidhje të përkohshme.

Në Kukës po mendojnë të ndërtojnë një stadium të ri ku të mund të luajnë edhe ndeshjes në kupat e Europës. Madje është bërë edhe një projekt, por mbetet për t’u parë se kur do të miratohet dhe kur mund të jetë gati. Deri atëherë Kukësi mund të shtegtojë dhe stadiumi “Loro Boriçi” mund të jetë shtëpia e verilindorëve. Gjithsesi ende nuk është vendosur përfundimisht dhe i takon Gjicit fjala e fundit për këtë çështje.

Kukësi dhe Kastrioti, por edhe klubet e tjera, kishin afat deri më 10 korrik të realizonin detyrat e lëna nga Komisioni i Licencimeve në FSHF. Veç Laçit e Teutës, të gjitha klubet e tjera kishin probleme me stadiumet, por gjëra të vogla. Ishte programuar që me 15 korrik të mblidhej Komisioni i Licencimeve dhe të merrej një vendim, por qëlloi e diel, ndaj me shumë mundësi sot do të ketë të reja. Me licencimin e klubeve dhe përcaktimin e stadiumeve ku do të luajnë, FSHF do të përcaktojë edhe datën për hedhjen e shortit.