Komisioni i Apelit

Dënimi i fushës, Tirana apelon dhe ka një strategji

Sport Ekspres — Wed, 17 Apr 2019 19:10:37 +0000

Tirana pret të shtunën Kukësin dhe bardheblutë janë të dënuar të luajnë pa tifozë. Pas goditjes së arbitrit anësor, Nertil Bregasi, klubi kryeqytetas mësoi vendimin e Komisionit të Disiplinës, që i detyron bardheblutë të luajnë katër ndeshje pa tifozë.

Sipas asaj që raporton RTSH Sport, Tirana ka apeluar dënimin dhe pret që të ndryshojë masa prej tyre. “Arma” e përdorur prej tyre thuhet se është dënimi që Kukësi mori pas ndeshjes me Laçin. Goditja e Denis Rexhës u shoqërua me një gjobë prej 200000 lekësh të reja.

Për Tiranën dënimi ishte më i rëndë, por sërish më i lehtë nga sa e parashikon rregullorja. Goditja e një zyrtari të ndeshjes, që shoqërohet me ndalimin e përkohshëm të lojës, dënohet me minimalisht tetë ndeshje pa tifozë.

Shpresohet që dënimi të përgjysmohet dhe pas ndeshjes me Kukësin të kthehen tifozët. Kjo do të ndodhte nëse do paguhej shuma prej 5 milionë lekësh, që parashikon rregullorja. Gjithsesi, momentalisht duhet pritur vendimi i Komisionit të Apelit.

Apeli rrëzon Disiplinën, peqinasve u kthehen tre pikët

Sport Ekspres — Wed, 12 Dec 2018 17:12:18 +0000

Shkumbini i gëzohet Komisionit të Apelit, pasi është rrëzuar dënimi i marrë në mes të muajit nëntor pas probleme që pati në Peqin në takimin kundër Naftëtarit. Kështu është hedhur poshtë vendimi i Komisionit të Disiplinës, që i zbriti tre pikë bardhekaltërve dhe i gjobiti. Kështu te Shkumbini i gëzohen kthimit të pikëve, por nga ana tjetër kanë marrë një dënim tjetër nga Disiplina sot, që i dënon ata me katër ndeshje pa tifozë në fushë asnjanëse.

NJOFTIMI I FEDERATËS SHQIQPTARE TË FUTBOLLIT – Me vendimin nr. 15 datë 16.11.2018 (pika 15) Komisioni i Disiplinës pranë FSHF ka vendosur: KF “Shkumbini”, për akte dhune ndaj zyrtarëve të ndeshjes, në bazë të Nenit 56, 134/2, 49/3, 49/4 të KDS, dënohet me humbjen e ndeshjes në tavolinë me rezultatin 3 me 0 kundër KF “Naftëtari”, zbritjen e 3 pikëve nga klasifikimi dhe gjobë në masën 100.000 (njëqindmijë) Lek . Në aplikim të Nenit 136/1.b të KDS, gjoba paguhet në masën 20%.

Kundër këtij vendimi ka ushtruar kërkesë ankimore lojtari i KF “Shkumbini” duke kërkuar ndryshimin e pikës 15 të Vendimit të Komisionit të Disiplinës datë 16.11.2018 pasi masa e dënimit nuk i përgjigjet rrethanave të shkeljes së kryer.

KOMISIONI I APELIT TË DISIPLINËS, pasi dëgjoi relatimin e çështjes nga sekretariati teknik dhe si bisedoi e analizoi çështjen në tërësi, konstaton: Vendimi nr.15 datë 16.11.2018 (pika 15) i Komisionit të Disiplinës pranë FSHF nuk është marrë në përputhje me Kodin e Disiplinës Sportive pasi masa e dënimit të aplikuar është e lartë dhe nuk i përgjigjet shkeljes disiplinore të kryer. Nga pamjet filmike të paraqitura nuk u gjenden shkelje që justifikojnë dënimin e KF “Shkumbini”.

PËR KËTO ARSYE , bazuar në nenet 78 e vijues të Kodit të Disiplinës Sportive, Apeli VENDOSI: 1. Shfuqizimin e pikës 15 të vendimit nr.15 datë 16.11.2018 të Komisionit të Disiplinës pranë FSHF si të pa bazuar në Kodin e Disiplinës Sportive.
2. Kundër këtij vendimi lejohet ankim në Gjykatën e Arbitrazhit Sportiv (CAS/TAS) Lozanë Zvicër.

Lajm i mirë për Realin: Apeli fal lojtarin, gati për Barcelonën

Sport Ekspres — Fri, 26 Oct 2018 12:15:27 +0000

Reali i Madridit po vazhdon përgatitjet për ndeshjen kundër Barcelonës, ndërkohë që trajeri Lopetegui ka marrë një lajm të mirë. Vinisius Zhunior u ndëshkua me karton të kuq në sfidën e luajtur me ekipin e dytë të Realit kundër ekipit të dytë të Selta Vigos në divizionin e tretë të futbollit spanjoll.

Braziliani i talentuar u ndëshkua me karton të verdhë në minutën e 67, ndërsa katër minuta përpara fundit të ndeshjes, ai u ndëshkua me kartonin e dytë të verdhë, duke e mbyllur përpara kohe ndeshjen. Reali apeloi ndëshkimin e 18-vjeçarit dhe Komisioni i Apelit i dha të drejtë klubit dhe lojtarit.

Në rastin e kartonit të dytë të verdhë, Vinisius nuk ka simuluar, kështu që kartoni është zhvlerësuar. Sulmuesi do të jetë gati për klasiken kundër Barçës, por çdo gjë është në dorë të Lopeteguit. Ky i fundit nuk ka besuar shumë te Vinisius, i cili po aktivizohet me ekipin e dytë. Ai nuk u grumbullua në ndeshjen kundër Levantes, ndërsa qëndroi në stol gjatë gjithë ndeshjes kundër Viktoria Pilzen në Champions.

“E bëra fazën përgatitore duke e ditur se mund të luaja me ekipin e dytë. Kërkova të luaj me Real Madrid B, nëse nuk grumbullohesha me ekipin e parë, sepse është më mirë se të qëndrosh në shtëpi”, është shprehur Vinisius, i cili ka shënuar katër gola deri më tani në divizionin e tretë të futbollit spanjoll.