Në analizën e bërë nga biznesmeni i njohur u diskutua mbi paketën e reformës që po përgatitet të implementohet në futbollin shqiptar. Ndër të tjera Kokëdhima nuk la pa “thumbuar” edhe kryebashkiakun e Tiranës, Erion Veliaj.

REFORMA – “Shqetësimi që kam unë është se qeveria nuk ka një vizion të drejtë për reformën në futboll. Ekonomia botërore e futbollit është një ndër më të mëdhatë dhe është një ndër ekonomitë me rritje të shpejtë, ndërsa futbolli në Shqipëri është i varfër, mjerat, i prapambetur, informal në të zezë dhe pa infrastrukturë. Përpjekjet e FSHF-së janë shumë më mbresëlënëse se sa pala e qeverisë. Qeveria duhet të reflektojë në përgjegjësitë e saj, të gjitha qeveritë e kanë braktisur këtë sferë të rëndësishme të shoqërisë”.

“Klubet profesioniste të Shqipërisë duhet të jetë në të shoqëri të së drejtës tregtare. Licencimi duhet të vendosë këtë standard të ri. S’duhet të kemi gjëra të s’kanë sens si te Flamurtari ku presidenti aktual ka në përdorim stemën dhe asetet, por pronësia është e bashkisë që s’do t’ia dijë për asgjë”.

APOLONIA –  “Është një shoqëri aksionere. Klub me kapitale e me vlera të njohura sipas ligjit. Nuk ka asgjë gjë të zezë, çdo gjë deklarohet. Marrëdhëniet bazohen në kontrata dhe fatura të rregullta. Apolonia është një model përsa i përket raportit dhe marrëdhënies se si duhet ndërtuar një shoqëri sportive në Shqipëri”.

PRIVATIZIMI DHE ASETET E KLUBEVE – “Shteti jonë ka shitur pasuri të pafundme strategjike për një euro. Kompani, banka, territore dhe kur vjen puna qeveria nuk u jep klubeve me 1 dollar terrene sportive, këto terrene nuk mund të ndryshohen e të bëhen pallate. Këto asete klubet do t’i zhvillojnë”

AMNISTIA – “Paratë që hidhen në futbollin shqiptar nuk merren mbrapsht. Çfarë futbolli është ky. Duhen incentiva për investime në sport, amnisti për kamat vonesat tatimore, por jo për sigurimet e prapambetura. Nuk jam i idesë që sportet elitare të përjashtohen nga taksat, nuk jam për taksa 0. Futbolli në veçanti duhet të ketë taksën 6% të sheshtë, aq sa bujqësia. Kjo gjë do të ndihmojë formalizimin. Po të modelojmë një treg me rregulla dhe barazimi mund të krijojë një ekonomi që mund të lulëzojë. Reforma duhet që t’i vendosë të gjitha klubet në kushte të barabarta. Ka nevojë për një fillim të lirë”.

“Futbolli duhet të bëhet treg fitimprurës. Klubet që nuk janë të pasura nuk zhvillojnë dot futbollistë të mirë, nuk marrin dot para nga tregu botëror i futbollit. Po flasim për një pasuri të madhe kombëtare. Tani po hedhim para në një vrimë të zezë, nuk mund të vazhdohet kështu”.

KANDIDATURA  PËR BASHKINË E TIRANËS – “Kryetari aktual pas katër vitesh nuk ka kuptuar asnjë përveç se të hedhë në shitje disa aksione të pavlera të Tiranës, gjë që e deklaroi pak ditë më parë. Për çdo impiant sportiv të ri që duhej bërë nga privati, qeveria duhet të jepte 30% të investimit donacion. Po të bëhem unë kryetar i Bashkisë së Tiranës nuk mund të ndodhi që të mos bëhen 100 impiante për Tiranën në katër vite, si mund të mbajë Tirana me kaq fusha 350 mijë fëmijë. Çdo investim në impiant sportive do të ketë 30% vlerës donacion nga buxheti i Bashkisë. Ai ka mendjen vetëm për t’u pasuruar vetë. Fola më parë për një impiant stërvitor me vlerë 3 milionë euro të një çifti në Tiranë (Football Republic), Bashkia s’ka pasur lidhje fare me atë investim, e ka braktisur”.

KRAHASIMI ME GJICIN – “Nuk dua të flas për modelet e të tjerëve. Nuk kam informacion si është i organizuar Kukësi dhe as për financat e këtij klubi. Unë e vlerësoj për rezultatet sportive, sepse Kukësi ka vite që është në majën e futbollit shqiptar dhe meriton përgëzime. Megjithatë, ne kemi politikë tjetër, politika jonë është realiste dhe nuk bazohet në planifikime që nuk justifikohen as me të ardhura dhe as me rezultate. Duke qëndruar në binarë realistë, me bilanc të balancuar, krejtësisht transparent me shtetin, të bazuar në detyrime fiskale, tatimore, kontraktore e ligjore, klubi ynë është shumë i qëndrueshëm, duke pasur mundësinë të promovojë vlera dhe të ndërtojë karriera.

Në këtë aspekt, ndryshimi më i madh i Apolonisë nga klubet e tjera është se Apolonia është pa dyshim shkolla më e mirë e futbollit që ka sot Shqipëria, gjë që duket nga lojtarët që janë promovuar në tregjet e zhvilluara të futbollit, apo në tregun e brendshëm. Edhe aktualisht kemi shumë talente që besojmë se do të lënë gjurmë në futbollin tonë në të ardhmen. Apolonia do vazhdojë në këtë mënyrë, nëse sot stërvitim 250 lojtarë, synimi është që vitin e ardhshëm të stërvitim 500 lojtarë. Apolonia investon më shumë në teknologji, infrastrukturë dhe trajnim, sesa në paga lojtarësh, sepse duam të rritim djemtë e vendit dhe lojtarët e Akademisë tonë. Jo rastësisht pjesa dërmuese e lojtarëve të ekipit të parë të Apolonisë vinë nga Akademia jonë e futbollit.

PROBLEMET NË SUPERIORE – “Në përgjithësi, futbolli shqiptar është rritur shumë këto vitet e fundit dhe FSHF ka merita, sepse nga një federatë shumë e varfër dha pa kapacitete është shndërruar në një institucion i pasur, që ka punuar shumë edhe në aspektin e infrastrukturës dhe në shumë drejtime të tjera. Megjithatë, janë pjekur kushtet që futbolli shqiptar të reformohet rrënjësisht, me qëllim që ai të mos jetë futboll i klubeve piramidale. Duhet seriozitet, në çdo drejtim, pasi përndryshe bëjmë vetëm dëme dhe nuk prodhojmë asgjë. Duhen marrë masa urgjente, që loja të jetë më e pastër dhe cilësore dhe që klubet të jenë solide në aspektin financiar dhe të trajtohen të gjithë njësoj.

Problemi që ngrini ju është real dhe serioz. Kjo reformë duhet bërë në mënyrë urgjente, pasi nëse disa klube kanë probleme dhe u largohen lojtarët, apo luajnë mes gjyqesh dhe nuk licencohen dot për kupat e Europës, domethënë se kemi një shtrembërim të garës. Disa luajnë dhe punojnë duke qenë korrektë, ndërsa disa të tjerë thjesht zvarriten deri në mbyllje të sezonit, duke shpresuar që FSHF të mos i dënojë apo përjashtojë”.

TALENTET TE APOLONIA – “Aktualisht tek Apolonia kemi tre grupe lojtarësh të rinj shumë të talentuar. Grupi i parë janë 22 vjeçarët Buzi, Andoni dhe Prifti. Këta luajnë shumë bukur krahas lojtarëve të formuar e të pjekur Hysenshahaj, Nako dhe Çako që luajnë dhe mbajnë peshë të madhe te skuadra jonë. Grupi i dytë janë tre 18-vjeçarë të formacionit bazë Omeri, Zogaj dhe Gjata. Grupi i tretë përbëhet nga lojtarët 19-20 vjeçarë Mihana, Memeti, Sota dhe Harizi. Janë katër lojtarë fantastikë. Njëri më i mirë se tjetri. Mund të luajnë titullarë në çdo ekip të Superiores.

Redon Mihana, është një lojtar i shkëlqyer dhe shumë interesant. Ka qenë i dëmtuar për pak kohë, por tashmë ka rigjetur formën e plotë dhe është kthyer në fushë. Është shumë premtues, do të keni mundësi ta shihni edhe në vazhdim. Mendoj se bëhet fjalë për një talent që do të lërë gjurmë në futbollin tonë dhe nëse ndodh, është diçka që do të na gëzonte shumë, pasi do të konfirmonte punën e mirë që po bëhet tek Apolonia me këta talente. E rëndësishme është që këta futbollistë të rriten gradualisht, t’i hedhin hapat një nga një, derisa të arrijnë maksimumin e vet dhe të ndihmojnë klubet ku do të luajnë, por edhe veten.

Për punën e jashtëzakonshme që bëhet me këta talente të veçantë dua të përgëzoj trajnerët e Apolonisë. Ata janë vërtet skuadra më e madhe e KLUBIT dhe Akademisë tonë.

DUKA – “Kam pasur besim se zoti Duka do e fitonte vendin në këtë organ kaq prestigjioz dhe të rëndësishëm. Ai e meritonte. Ka bërë shumë për futbollin. Zgjedhja e Dukës është një ngjarje historike për futbollin Shqiptar. Është vërtet shumë e rëndësishme për Shqipërinë. E kam inkurajuar të konkurrojë dhe jam i lumtur që ia doli”.