“Kam dëgjuar disa kritika kundrejt Xhejms, por nëse dikush më do mua, do dhe fitoret e ekipit. Gjaku im është verdhevjollcë dhe nuk njoh ngjyra të tjera. Nuk ka sens krahasimi midis meje dhe Xhejms. Çdokush që luan basketboll dëshiron të fitojë kampionate dhe kjo gjë vlen dhe për të gjithë lojtarët dhe drejtuesit e Lejkërs. Ky është motivi i të gjithëve që luajnë dhe Xhejms nuk do të zgjidhte Lejkërs, nëse nuk do dëshironte të fitonte. Kush është skeptik kundrejt tij, do të ndryshojë mendje shumë shpejt”, komenton Brajant gjatë një programi televiziv ku ishte i ftuar.

“Rikthim në fushë? Mundësitë për t’u rikthyer janë shumë afër zeros. Kur u tërhoqa, të gjitha deklaruan që do të rikthehesha, sepse nuk do arrija të bëja diçka tjetër. Sfida ime mbasi e mbylla me basketbollin ka qenë që t’u tregoja të gjithëve, që nuk isha një person i aftë për të bërë vetëm një gjë në jetën time. Nuk do të rikthehem më të luaj, me të vërtetë”, përfundon 40-vjeçari, Kobi Brajant.

Mbas tërheqjes, Kobi është marrë me kinema, ka punuar në televizor si analist dhe stërvit disa nga të rinjtë e talentuar (si Xhejson Tatum), me qëllimin për të nxjerrë ndonjë Brajant tjetër. Kalimi i Lebron Xhejms te Lejkërsat mesa duket ka rizgjuar diçka te Kobi. Ideja për të luajtur me Lebron në një ekip e tundon 39-vjeçarin. Ose të paktën diçka të tillë ka lënë të nënkuptohet, shoku i tij i viteve të arta me Lejkërs dhe gjiganti Shak O’Nill.

Ky i fundit, në dalje të një turneu bamirësie në Los Anxhelos, ka shokuar me deklaratën e tij për “TMZ”. “Kam dëgjuar që Kobi dëshiron të rikthehet të luajë”. Kaq mjafton dhe të gjithë kanë filluar të ëndërrojnë. Kobi përsëri te Lejkërs dhe çfarë dyshe me Lebron Xhejms… Thashetheme të tilla kanë qarkulluar dhe më parë, por afrimi i Xhejms ka rritur adrenalinën e tifozëve të “Ëngjëjve”. Imagjinoni nëse Shak është serioz në deklaratën e tij dhe Kobi rikthehet. Diçka magjike për të gjithë fansat e basketbollit.