Lëvizje befasuese, talenti i Barcelonës i bashkohet Iniestës në Japoni

Sport Ekspres — Sat, 02 Mar 2019 16:47:58 +0000

Për vite me radhë Sergi Samper shikohej si pasuesi ideal i Andres Iniestës te Barcelona. Megjithatë, i riu katalanas nuk “shpërtheu” kurrë duke mos përmbushur pritshmëritë e mëdha të tifozëve dhe drejtuesve katalanas.

Në më shumë se një vit e gjysmë Samper ka luajtur më pak se pesë ndeshje dhe lojtari ka vendosur të ndryshojë ambient. Destinacioni i ri i 24-vjeçarit është befasues. Bëhet fjalë për ekipin japonez të Visel Kobes, ku do të firmosë një kontratë 4-vjeçare.

Në këtë ekip Samper do të ritakohet me idhullin e tij Andres Iniesta dhe ish-kolegun David Vija, ndërsa një yll tjetër në kontingjentin e skuadrës japoneze është gjermani Lukas Podolski.

Ndodh tek ekipi i Iniestës, “spiuni” merr një muaj pezullim

Sport Ekspres — Sat, 13 Oct 2018 16:32:40 +0000

Në Japoni, klubet e futbollit janë shumë strikte përsa i përket thyerjes së rregullave nga pjesëtarët e skuadrës. Futbollisti më i fundit, i cili e ka pësuar është Shunki Takahashi, një mbrojtës në skuadrën e Visel Kobes, ekip ku aktivizohet ish-mesfushori i Barcelonës, Andres Iniesta.

Takahashi është dënuar, pasi i dërgoi një mesazh një miku të tij, ku e lajmëroi se Iniesta nuk do të luante në ndeshjen e radhës në kampionatin japonez. Gjithçka mund të kishte kaluar pa shumë zhurmë, por miku i futbollistit japonez vendosi që të shpërndante menjëherë lajmin në rrjetin social “Twitter”.

Lajmi bëri bujë dhe drejtuesit e klubit arritën të zbulonin se kush e kishte nxjerrë informacioni. Lojtari është pezulluar për një periudhë kohore 1-mujore, ndërsa klubi u garantoi fansave se të tilla incidente nuk do të përsëriten më.