Firmosi me Besën, flet mesfushori Shaqe: Më bindi projekti i Maganit

Sport Ekspres — Thu, 13 Jun 2019 17:50:22 +0000

Në fillimin e kësaj jave, Besa bëri goditjen e radhës në merkato. Nuk ishte ndonjë emër i njohur, por një 19 vjeçar korçar që sezonin mbylli me Tomorin në Kategorinë e Parë. Klevis Shaqe është përforcimi i radhës te skuadra e Besës, ndërsa nga kjo skuadër janë larguar Çaço, Danaj, Mziu, Dikson, Mellugja dhe Albi Çekiçi. Mesfushori korçar ka nënshkruar për katër vite me Besën dhe mendohet që të mbyllë hapësirat e krijuara në këtë repart.

Për SportEkspres.com, Shaqe deklaron se kontrata me Tomorin i mbaroi, por shpreh keqardhjen që skuadra zbriti në Kategorinë e Dytë. “Me Tomorin kalova një sezon të mirë, por më vjen keq që nuk ja arritëm mbijetesës në Kategorinë e Parë. Skuadra bëri shumë gabime, kryesisht pas fazës së dytë, por edhe fatin nuk e kishte shumë me vete. Gjithsesi, për mua ishte një përvojë që shpresoj të më shërbejë në vazhdimësinë e karrierës sime”.

Dhe menjëherë sapo sezoni i mbyll, Magani e kishte veçuar korçarin në planet e tij, për ta bërë realitet këtë verë. “Duke qenë lojtar i lirë, kisha edhe dy oferta të tjera në Kategorinë e Parë, por Besa më bindi me projektin e saj, sepse është skuadër që synon ngjitjen në Kategorinë Superiore. E mendoj një sezon më të fortë se me Tomorin, ndaj do jap maksimumin që të bind trajnerin Magani me formën time më të mirë”.

AGRON KAJA

Besa nis merkaton, i merr Tomorit një korçar

Sport Ekspres — Tue, 11 Jun 2019 12:38:40 +0000

Besa është një klub që i kushton vëmendje të rinjve dhe merkaton e ka nisur me afrimin e një 19-vjeçari. Ditën e sotme ka nënshkruar Klevis Shaqe, një lojtar i dalë nga ekipet e moshave të Skënderbeut.

Klubi kavajas bën me dije se Shaqe do të jetë pjesë e Besës për katër sezone. I riu sezonin e parë si profesionist e ka regjistruar te skuadra e Tomorit. Lojtari i krahut të majtë është aktivizuar në 19 ndeshje me beratasit.

Tanimë ai është gati të nisë një aventurë të re me Besën. Kavajasit në vazhdim pritet të bëjnë edhe afrime të tjera. Si zakonisht do të vëzhgohet me kujdes edhe tregu në Kosovë, ku verdhezinjtë kanë gjetur shpesh elementë cilësorë.

https://www.facebook.com/349873605028455/posts/2814251825257275/