Bojkot te Turbina, Hasanbelli: Situata nuk motivon, por ta mundim Pogradecin

Sport Ekspres — Wed, 24 Apr 2019 13:10:32 +0000

Turbina po kalon një moment jo të mirë në aspektin financiar, çka ka detyruar futbollistët të bojkotojnë stërvitjen. Ata presin të paguhen nga Bashkia e Cërrikut dhe një premtim i bërë për t’u shlyer pas ndeshjes me Elbasanin. Ende asnjë qindarkë për lojtarët, që po luftojnë të sigurojnë qëndrimin në Kategorinë e Parë.

Klevis Hasanbelli, portieri i rikthyer në janar te Turbina në formë huazimi prej Laçit, komenton situatën në klubin cërrikas. “Ende ne nuk jemi paguar, edhe pse na u premtua që do të na jepeshin pagat në rast fitoreje me Elbasanin. Duke qenë se edhe sot ato nuk na janë dhënë, na kanë detyruar që të mos dalim në stërvitje, pasi është një situatë që nuk të motivon për vazhdimësinë”.

Më tej portieri flet për ndeshjen e radhës me Pogradecin: “Me Pogradecin është ndeshje vendimtare për mbijetesën e Turbinës. Deri atëherë do të ishte mirë që pagat të jenë dhënë, pasi motivimi i skuadrës është ulur shumë. Gjithsesi, mendoj se të gjithë lojtarët do të tregohen profesionistë e do bëjnë më të mirën për Turbinën”.

AGRON KAJA

Turbina bëhet e “gjallë”, bën “pazar” në Superiore

Sport Ekspres — Wed, 09 Jan 2019 21:12:33 +0000

Pas mbylljes së ndeshjes të 14-të më 21 dhjetor 2018, të cilën Turbina e humbi me rezultatin e thellë 1-5 me Pogradecin, skuadra cërrikase dukej se ishte në “letargji”, sa i përket lëvizjeve për gjysmën e dytë të kampionatit. Por fondi prej 55 milion lekësh që Bashkia e Cërrikut i akordoi skuadrës për vazhdimësinë, i ka dhënë mundësinë të rinisë përgatitjet dimërore. Duke qenë aksionere me 40%, njëherësh ky fond i Bashkisë jep sinjale se vendi i fundit në Grupin B nuk është i pamundur të shmanget.

Për trajnerin Sinan Bardhi, largimi i Efijoh Ejong te Besa mbetet një mungesë serioze për rrugën e vështirë në gjysmën e dytë të kampionatit, por rikthimi si i huazuar i portierit Klevis Hasanbelli, pas përvojës së tij jo fort të mirë te Laçi, duket si përforcimi i parë për të besuar te mbijetesa në Kategorinë e Parë. Turbina renditet në vendin e 10-të në Grupin B të Kategorisë së Parë me 8 pikë, e rrezikuar seriozisht për rënien në Kategorinë e Dytë.

AGRON KAJA