Klejdis Branica

Fetollari konfirmon Branicën, Pogradeci e merr seriozisht

Sport Ekspres — Mon, 01 Jul 2019 12:55:15 +0000

Peqinasi Klejdis Branica, i cili sezonin e kaluar doli golashënuesi më i mirë në Kategorinë e Parë me 14 gola, portieri Mateo Boçi që e mbylli me Tërbunin, si dhe mesfushori Alton Shkëmbi që luan me skuadra inferiore në Greqi, janë emrat e radhës në merkaton e Pogradecit. Duke shtuar këtu Albi Çekiçin e Ildi Shytin, të cilët janë konfirmuar nga drejtuesit e klubit, duket që pogradecarët e kanë marrë seriozisht këtë merkato.

Është vetë trajneri Festim Fetollari që i konfirmon këto lëvizje, madje për Branicën ai deklaron se është gati për firmë. “Branica është një përfircim cilësor për Pogradecin. Ditë më parë me drejtuesit e klubit kemi bërë një parakontratë me të dhe këto ditë pritet firma. Duke shtuar këtu Albi Çekiçin dhe Ildi Shytin, si dhe dy futbollistë maqedonas që këto ditë vijnë në Pogradec, për sezonin e ri skuadra do jetë shumë e kompletuar”.

Nga ana tjetër, tekniku i liqenorëve thekson se zgjedhjet e 30 qershorit nuk kanë efekt në formimin e skuadrës: “Këtu të gjithë jetojnë me futbollin dhe nuk ka asnjë ndikim politika, nisur nga fakti që ne si skuadër administrohemi nga Bashkia. Edhe për sezonin e ri ne do të jemi një skuadër e fortë, që do synojë ngjitje në Kategorinë Superiore”.

AGRON KAJA

Golashënuesi i së Parës, Branica: Jam gati për Superioren!

Sport Ekspres — Mon, 20 May 2019 10:20:17 +0000

Klejdis Branica u shpall golashënuesi më i mirë në Kategorinë e Parë dhe kështu bën për vete trofeun “Këpuca e Artë”. Me 14 gola të shënuar ai tregoi se është rikthyer në formën e tij më të mirë dhe ka lënë pas Fatjon Sefën e Lushnjes me 13 gola, si dhe Zhunior të Vllaznisë me 12 gola. Përmbysja erdhi në javën e fundit të kampionatit, kur shënoi tripletë në transfertën me Orikun.

Branica, në një deklaratë për SportEkspres.com, thekson se golat e shënuar prej tij tregojnë rikthimin në formën e tij më të mirë edhe bashkëpunimin e mirë me gjithë skuadrën. “Hyra në kampionat në javën e tretë dhe deri në mbyllje shënova 14 gola. Nuk jam i kënaqur me numrin, por jam i kënaqur se e fitova me meritë trofeun “Këpuca e Artë” në Kategorinë e Parë. Falënderim për gjithë skuadrën e Egnatias në këtë sukses”, shprehet peqinasi.

Më tej ai shton: “Ky ka qenë sezoni më i mirë për mua në Kategorinë e Parë, jo vetëm për 14 golat që shënova, por edhe për gjendjen time fizike e formën që tregova në fushën e lojës. Tashmë jam i gatshëm që të luaj edhe në Superiore, ku dy skuadra më kanë bërë ofertë një muaj më parë. Gjithsesi ka kohë për të vendosur”.

AGRON KAJA

Kryegolashënuesi Branica: Më duan në Superiore, rikthimi në sulm “sekreti” im!

Sport Ekspres — Thu, 27 Dec 2018 21:20:45 +0000

Në 14 javët e para të Kategorisë së Parë, peqinasi Klejdis Branica që luan me Egnatian ka shënuar 8 gola. Edhe pse ai ka startuar në javën e katërt të këtij kampionati, golat nuk i ka harruar, ndërkohë që Egnatia renditet në vendin e tretë. Për SportEkspres.com, Branica deklaron se synimi për t’u ngjitur në Superiore do ta bëjë edhe më interesante garën në Grupin B.

Sulmuesi 26-vjeçar, djali i ish-futbollistit të Shkumbinit, Sokol Branica, në shtatë sezone karrierë ka luajtur me disa skuadra të Superiores e të Kategorisë së Parë, njëherësh ka qenë edhe pjesë e Kombëtares U19.

Dëmtimet e shumta, njëherësh edhe aksidenti i para disa viteve me makinë, e kanë larguar për pak kohë nga fusha e lojës, por peqinasi deklaron se ato i mendon të kaluar dhe është rikthyer për të qenë protagonist.

INTERVISTOI: AGRON KAJA

E kishit menduar se në 14 javët e para të Kategorisë së Parë do të ishit ju golashënuesi më i mirë?
-Unë jam sulmues dhe qëllimi im primar kur jam në fushën e lojës është shënimi i golit. Tashmë që jam rikthyer në pozicionin tim të preferuar si sulmues i mirëfilltë, kam besuar shumë te mundësitë e mia, por edhe te kolektivi i skuadrës që në përbërje ka elementë shumë cilësorë.

Ku e mendoni çelësin e këtij suksesi me 8 golat që keni shënuar në këto javë kampionat?
-E mendoj te përshtatja ime si sulmues i mirëfilltë me gjithë grupin. Unë kam startuar në javën e tretë në këtë kampionat dhe golin e parë e shënova në javën e katërt ndaj Pogradecit. Ky është pozicioni im në fushë dhe besoj se në vazhdimësi do të shënoj më shumë gola.

Ju keni luajtur edhe me skuadra të tjera në elitë dhe me Kombëtaren U19, a ndjeheni i plotësuar tek Egnatia?
-Momentalisht ndjehem shumë mirë te kjo skuadër, që veç përbërjes me lojtarë cilësorë që kanë luajtur edhe në Kategorinë Superiore, ka një organizim dhe angazhim serioz për mbarëvajtjen e garës. Besoj shumë për ngjitjen në Superiore dhe te serioziteti i trajnerit Duro.

Në këtë periudhë merkatoje, keni patur oferta nga skuadra të tjera?
-Po, këto ditë kam patur oferta nga dy skuadra të Kategorisë Superiore, por asgjë konkrete më tej. Unë jam futbollist profesionist dhe i gatshëm që çdo ofertë ta shikoj me kujdes, jo vetëm për anën ekonomike të saj.

Si e shikon Egnatian për pjesën e dytë të sezonit 2018-2019?
-Do të jetë një garë shumë e vështirë, pasi në fazën e tretë përgjysmohen pikët. Ne si skuadër nuk i jemi larguar synimit për t’u ngjitur në Kategorinë Superiore. Nëse Bylisi do të penalizohet me heqien e 3 pikëve, besoj se do të jetë më e hapur gara për kreun e Grupit B.

Po Kategorinë e Parë në tërësi, si e vlerësoni?
-Mendoj se është një kategori që ka edhe profesionizmin brenda, por ka edhe mangësi. Unë i shikoj terrenet si mangësinë më evidente. Me individët që janë pjesë e skuadrave në Kategorinë e Parë, ka më shumë mundësi që të rritet niveli. Por kjo dotë ndodhë pasi të përmirësohen terrenet.