kf vllaznia

Njihuni me portierin hero, shkodrani shpëton jetën e dy njerëzve

Sport Ekspres — Sat, 03 Aug 2019 13:09:39 +0000

Eldi Hasani po bën një shkëputje të vogël nga futbolli dhe po i kushtohet punës së tij të dytë si vrojtues plazhi. Në këto ditë portieri i Vllaznisë ka arritur ta kryejë më së miri detyrën e tij të re, duke mos shpëtuar portën nga goli, por dy jetë njerëzish.
Mediet shkodrane raportojnë se ditën e sotme ai ka arritur të shpëtojë jetën e një pushuesje nga Kosova. Ajo ka hasur probleme në det dhe ka rrezikuar të mbytet. Eldi ka vrapuar menjëherë drejt Emine Vllasenit, 54-vjeçare, për ta shpëtuar. Ka arritur ta nxjerrë deri në breg, por pak momente më pas zonja ka kaluar në gjëndje të fikti.

Hasani e ka marrë situatën në dorë, duke e qetësuar gjendjen shëndetësore të gruas, që më pas është transportuar drejt spitalit rajonal. Një rast i tillë ka ndodhur edhe një herë tjetër, ku Hasani është treguar përsëri vendimtar me ndërhyrjen e tij.

Përforcimi i radhës, një shkodran rikthehet te Vllaznia

Sport Ekspres — Fri, 26 Jul 2019 08:49:55 +0000

Vllaznia vazhdon të përforcohet për sezonin e ri. Në seancën e sotme stërvitore të ekipit shkodran ka qenë i pranishëm dhe mesfushori Behar Ramadani, i cili kthehet në ekipin e zemrës pas gjashtë vitesh “shtegtim” në ekipe të ndryshme Kategorisë së Parë dhe Superiores.

Ramadani (m)

Së fundmi futbollisti 29-vjeçar mbylli bashkëpunimin me Luftëtarin, ekip ku luajti për katër sezone. Zyrtarizimi nga klubi nuk ka ardhur ende, por prania e Ramadanit në seancën nuk lë shumë vend për diskutim.

Ardhja e Ramadanit zëvendëson largimin e Alsid Tafilit, i cili u largua nga Vllaznia pak javë më parë duke preferuar të vijojë karrierën më Lirinë e Prizirenit në Ligën e Parë të Kosovës.

Premtimi për tifozët shkodranë, Jonuz: Tani, një Vllazni ndryshe

Sport Ekspres — Fri, 19 Jul 2019 13:54:23 +0000

Trajneri maqedonas Mirsad Jonuz është prezantuar ditën e sotme në ambientet e klubit të Vllaznisë. Në fjalët e tij të para si trajneri i ekipit shkodran, 57-vjeçari vlerësoi historinë e madhe të klubit të Vllaznisë dhe premtoi se së bashku me drejtuesit do përgatisin një ekip shumë ndryshe nga ai i viteve të fundit.

“Arsyeja përse u afrova te Vllaznia është emri i madh dhe historia e kësaj skuadre. Sapo mu dha si mundësi nuk hezitova dhe thashë menjëherë po. Kam biseduar me drejtues të klubit dhe shpresojmë të bëjmë gjëra të mira”.

“Nuk kam shumë njohuri për skuadrën aktuale, por jam munduar të marr informacione gjatë këtyre ditëve. Do vazhdoj të punoj në ditët në vazhdim dhe besoj se të hënën ose të martën do të nisim punën për të ndërtuar një Vllazni ndryshe nga vitet e fundit. Kam marrë të gjithë mbështetjen e drejtuesve të klubit dhe jam i bindur që do ia dalim”.