KEK-u

Skënderbeu s’i ndahet talenteve, piketon një në Kosovë

Sport Ekspres — Tue, 25 Jun 2019 08:19:33 +0000

Skënderbeu vazhdon të vëzhgojë tregun e futbollistëve në Kosovë, teksa kërkon të gjejë talente për të ardhmen. Një emër i ri ka dalë në skenë dhe lidhet me një kalim te korçarët gjatë kësaj merkatoje. Bëhet fjalë për një mbrojtës 18-vjeçar.

Leonat Vitija quhet i riu dhe sezonit e fundit ka qenë pjesë e KEK-ut në IPKO Superliga e Kosovës. Skënderbeu e ka futur në “qark” dhe me shumë mundësi mbrojtësi do të zgjedhë të luajë në Superiore sezonin e ardhshëm.

Insporti.com raporton se nuk është vetëm Skënderbeu klubi që po e tenton futbollistin Vitija. Kampionët e Feronikelit gjithashtu kanë shfaqur interes për të, ashtu sikurse edhe Prishtina e drejtuar nga Mirel Josa.

Vitija ka qenë pjesë e Kosovës U19 dhe ka luajtur rregullisht, ndërkohë që së fundmi ka provuar të debutojë edhe për Kosovën U21. Treguesit janë të qartë dhe kemi të bëjmë me një lojtar me të ardhme, që Skënderbeu synon ta afrojë dhe më pas ta shesë jashtë vendit.

KEK-u për ‘Guinness’, edhe më dobët se Laçi famëkeq

Sport Ekspres — Mon, 20 May 2019 08:03:05 +0000

Feronikeli u shpall kampion në Kosovë, ndërkohë që KEK-u ishte skuadra e parë që matematikisht kishte rënë nga kategoria. Diçka e tillë për ta ka ndodhur me një rekord negativ. Në 33 ndeshje të kampionatit, kjo skuadër nuk mori më shumë se një pikë, falë një barazimi 2-2 me KF Ballkanin.

Ky ishte një sezon totalisht për t’u harruar për skuadrën e KEK-ut, që shënoi vetëm 24 gola dhe pësoi plot 104. Një edicion futbollistik edhe më i keq se ai i Laçit në sezonin 2004-05, me kurbinasit që e mbyllën kampionatin me 2 pikë. Laçi atë sezon mori vetëm 2 barazime në 36 ndeshje. Një pikë, kurbinasit e morën në fillim të kampionatit kundër Lushnjës.

Ndërsa pikën e dytë e siguruan në javën e fundit, në atë barazim 5-5 kundër Partizanit. Sulmuesi i Partizanit, Dorian Bylykbashi, shënonte 5 gola në atë takim, duke marrë në fund edhe “Këpucën e Artë” në Superiore.

Laci 2004-05 (m) / KEK-u 2018-19 (d)

IPKO Superliga: Gjilani ende gjallë, Ferizaj shkatërron KEK-un

Sport Ekspres — Thu, 16 May 2019 15:59:31 +0000

Janë luajtur sot dy ndeshje të vlefshme për javën e 32-të në kampionatin kosovar të futbollit, IPKO Superliga. Ferizaj luajti në transfertë përballë KEK-ut, që renditet në vend të fundit me vetëm 1 pikë. Kjo sfidë u mbyll me fitoren e miqve 2-5. Golat nga Çerkini, Krasniqi, Mehmeti, Dautaj dhe Lumaj i dhanë fitoren Ferizajt që siguroi dhe qëndrimin matematikisht në IPKO Superliga. Ndërsa për KEK-un shënuan Eminhaziri dhe Vitija.

Në takimin tjetër, Gjilani ka marrë një fitore me shumë vlera përballë Lirisë, duke triumfuar 4-0 dhe duke ruajtur shpresat për mbijetesë. Hajdari, Nika dhe dopieta e Razak i dhanë fitoren gjilanasve, që ngjiten në kuotën e 38 pikëve, një më pak se Trepça e vendit të nëntë. Vendi i shtatë dhe i tetë, Drenica dhe Ballkani, janë në kuotën e 40 pikëve dhe lufta për mbijetesë është ashëprsuar shumë në IPKO Superliga.

IPKO Superliga, java e 32-të

Gjilani – Liria 4-0
Hajdari 11’, Razak 20’ 69’, Nika 61’

KEK-u – Ferizaj 2-5
Eminhaziri 25’, Vitija 65’ / Çerkini 20’, Krasniqi 50’, Mehmeti 68’, Dautaj 70’, Luma 89′

Flamurtari lë “zonën e ftohtë”, përmbys KEK-un

Sport Ekspres — Mon, 29 Apr 2019 15:55:59 +0000

Flamurtari ka bërë detyrën kundër KEK-ut të vendit të fundit, por nuk ka qenë aq e lehtë sa pritej. Gjithçka u mbyll me fitoren 2-1 të skuadrës nga Prishtina, triumf që erdhi me përmbysje. Kur ishin luajtur thuajse rreth gjysmë ore lojë, Veliu shënoi për miqtë e rënë nga IPKO Superliga e Kosovës.

Gjithsesi Flamurtari ka reaguar dhe ia ka dalë të barazojë pa u mbyllur ende pjesa e parë. Kelmendi ishte ai që shënoi golin e baraspeshës dhe në fraksionin e dytë të lojës kuqezinjtë u hodhën në sulm për të realizuar golin e fitores.

Berbatovci ishte ai që ia doli të shënonte dhe i dha tre pikë shumë të rëndësishme Flamurtarit, që për momentin ka dalë nga zona e ftohtë. Objektivi është sigurimi i mbijetesës direkt dhe jo përmes ndeshjeve të fazës “play-out”.

IPKO SUPERLIGA E KOSOVËS – Java 29
E hënë, më 29 prill 2019, ora 15:30

Flamurtari-KEK-u 2-1
Shënues: Kelmendi 42’, Berbatovci 82’ / Veliu 27’

Feronikeli rikthehet në krye, “paqe” në Gjilan

Sport Ekspres — Sun, 21 Apr 2019 14:37:12 +0000

Feronikeli ka mposhtur KEK-un e vendit të fundit në transfertë me rezultatin 0-4 dhe ka marrë përsëri komandën e IPKO Superligës së Kosovës. Zhan Karioka zhbllokoi shifrat në minutën e 27-të, ndërsa Kastriot Rexha dyfishoi pas tre minutash.

Sulmuesi shtatlartë shënoi edhe dy herë të tjera nga pika e penalltisë, duke vulosur fitoren dhe duke u ngjitur në kuotën e 17 golave në krye të renditjes së golashënuesve.

Renditja e IPKO Superligës

Ky trepikësh e ngjit ekipin nga Drenasi në vendin e parë me 65 pikë, po aq sa ka edhe Prishtina dhe dy më shumë se Llapi i vendit të tretë.

Ndeshja tjetër e zhvilluar në Gjilan është mbyllur në barazim 1-1. Drita dhe Trepça ’89 kanë ndarë nga një pikë, që i vlejti më shumë ekipit nga Mitrovica. Miqtë kaluan të parët në avantazh me anë të francezit Traore, ndërsa Xhevdet Shabani barazoi për Dritën 13 minuta përpara fundit të ndeshjes.

Drita – Trepça ’89 1-1
Shënues: Shabani 77’ / Traore 27’

KEK-u – Feronikeli 0-4
Shënues: Karioka 27’, Rexha 30’, 45’ (pen), 80’ (pen)

Kampionat i çmendur në Kosovë: Bie Feronikeli, Prishtina e Llapi në sulm!

Sport Ekspres — Sat, 13 Apr 2019 15:35:12 +0000

Çfarë gare në IPKO Superliga e Kosovës, ku diferenca mes tre ekipeve të kreut është vetëm dy pikë. Feronikeli kryesues është mposhtur nga Ferizaj, ndërsa Prishtina dhe Llapi kanë marrë pikët e plota në shtëpi. Skuadra nga Drenasi e zhbllokoi ndeshjen që në pjesën e parë me Prekazin, por në fund ishte Krasniqi që shfrytëzoi një gabim të portierit Smakiqi dhe barazoi shifrat. I njëjti lojtar në shtesë realizoi edhe golin e dytë dhe i dha skuadrës së tij tre pikë shprese për mbijetesën. Tanimë Feronikeli e Prishtina ndajnë kreun me pikë të barabarta.

Bardhekaltrit bënë detyrën në shtëpi ndaj KEK-ut të vendit të fundit. Pritej ndonjë fitore me goleadë, por nuk ka ndodhur kështu. Prishtina i është falur një goli të shënuar nga Boshnjaku dhe ka marrë pikët e plota. Ato ishin me më shumë rëndësi.

Llapi, pas fitores me Gjilanin, e sheh veten në garë për titullin kampin. Diferenca prej dy pikësh me Feronikelin e Prishtinën ia jep këtë mundësi. Sa i takon ndeshjes, skuadra e drejtuar nga Tahir Batatina arriti të kalonte në avantazh me Mentor Zhdrellën. Pjesën e parë Llapi e mbylli në avantazh, ndërkohë që me nisjen e 45 minutave të dyta ishte Endrien Magani që shënoi dhe vendosi baraspeshën. Gjithsesi vendasit nuk u dorëzuan dhe me anë të Behar Maliqit shënuan golin e fitores.

IPKO SUPERLIGA – Java 27
E shtunë, më 13 prill, ora 15:30

Feronikeli-Ferizaj 1-2
Shënues: Prekazi 41’ / Krasniqi 78’, 93′
Llapi-Gjilani 2-1
Shënues: Zhdrella 21’, Maliqi 76’ / Magani 52’
Prishtina-KEK-u 1-0
Shënues: Boshnjaku 36’

IPKO Superliga | Llapi i falet një autogoli, Uka qetëson Drenicën

Sport Ekspres — Sat, 06 Apr 2019 14:56:37 +0000

Llapi nuk e pati aq të thjeshtë sa mendohej kundër KEK-ut. Ekipi nga Podujeva vuajti në transfertë përballë ekipit të vendit të fundit. Ndeshja u vendos nga një autogol i Vitisë në minutën e 72’.

Kjo fitore e ngjit Llapin në vendin e dytë me 57 pikë. Feronikeli kryesues ndodhet dy pikë më shumë dhe do të luajë të hënën në Prizren përballë Lirisë, sikurse Prishtina (56 pikë) udhëton në të njëjtën ditë në Ferizaj.

Drenica siguroi një fitore qetësie në shtëpi përballë Trepça ’89. Dygolëshi i Kreshnik Ukës, golashënuesit më të mirë të ekipit, vendosi ndeshjen. Ky ishte rezultati i gjashtë pozitiv për vendasit, ndërsa ekipi nga Mitrovica vazhdon të jetë afër zonës së rrezikut.

IPKO SUPERLIGA E KOSOVËS – Java 26

E shtunë, më 6 prill 2019, ora 15:00

Drenica-Trepça ’89 2-0
Shënues: Uka 10’, 55’

KEK-u-Llapi 0-1
Shënues: Vitija (aut) 73′

Mezanit i prishin festën, Drenica festival golash KEK-ut

Sport Ekspres — Sat, 30 Mar 2019 14:57:07 +0000

Gjilani nuk shkoi më shumë se një barazim 1-1 në shtëpi përballë Trepça ’89. Gentian Mezani e nisi me një pikë aventurën në krye të “Skifterave”. Vendasit gjeten shumë shpejt golin. Wilber Perez gjeti rrjetën në minutën e tretë pas një asisti të Maganit, ndërsa ekipi nga Mitrovica barazoi me anë të Hasan Hysenit në minutën e dytë të pjesës së dytë.

Ndeshja nuk pati më gola dhe nga kjo pikë përfiton më shumë Trepça që është ngjitur në kuotën e 29 pikëve, ndërsa Gjilani renditet në vendin e gjashtë me 33 pikë.

Drenica nuk hasi aspak probleme për të mposhtur me goleadë KEK-un e vendit të fundit. Miqtë nuk fitonin në kampionat që nga 23 shkurti, kur mposhtën Ferizajn në shtëpi me rezultatin 3-1.

Elshani dhe Uka shënuan dy gola të shpejtë për Drenicën, ndërsa Eminhaziri shkurtoi rezultatin në fundin e pjesës së parë. Miqtë shënuan edhe dy herë të tjera në fillimin e pjesës së dytë, ndërsa vulosën “manitin” në minutat e fundit. Kjo fitore e ngjit Drenicën në vendin e pestë me 33 pikë, ndërsa KEK-u mbetet në vend të fundit me vetëm një pikë.

IPKO SUPERLIGA E KOSOVËS – Java 24

Gjilani 1–1 Trepça ‘89
Shënues: Perez 3’ / Hyseni 47’

KEK-u 1-5 Drenica
Shënues: Eminhaziri 37’/ Elshani 4’, Uka 13’, Mëziu 54’, Grajqevci 57’

VIDEO | Feronikeli i papërmbajtshëm, Gjilani ia del në shtesa

Sport Ekspres — Sun, 17 Mar 2019 14:57:46 +0000

Feronikeli ka vuajtur vetëm gjysmë ore përballë Trepça ’89. Kryesuesit kanë shpartalluar ekipin nga Mitrovica me rezultatin 5-0, duke siguruar tre pikë të tjera drejt titullit kampion. Bujar Pllana zhbllokoi shifrat në minutën e 29-të dhe pjesa e parë u mbyll me avantazhin e vendasve.

Ekipi nga Drenasi ishte i papërmbajtshëm në pjesën e dytë, duke shënuar edhe katër gola të tjera. Djemtë e Ramadanit janë ngjitur në kuotën e 55 pikëve dhe Llapi i vendit të dytë është 7 pikë më pak.

KEK-u ishte pranë marrjes së pikës së dytë në kampionat, por Gjilani shënoi dy gola në minutat shtesë. Asani dhe Perez rikthyen vendasit te fitorja, që mungonte që nga 12 janari (1-0 përballë Ferizajt). Ky trepikësh e ngjit Gjilanin në vendin e pestë me 32 pikë, ndërsa miqtë mbeten në vendin e fundit me 1 pikë.

IPKO SUPERLIGA E KOSOVËS – JAVA 23

E diel, më 17 mars 2019, ora 14:00

Gjilani-KEK-u 2-0
Shënues: Asani 90+3′, Perez 90+5′

Feronikeli-Trepça ’89 5-0
Shënues: Pllana 29’, Hoti 47’, Karioka 51’, Silva 60’, Rexha 84′

Feronikeli “shtyp” Gjilanin, Prishtina likuidon KEK-un

Sport Ekspres — Sun, 10 Mar 2019 14:25:18 +0000

Feronikeli marshon, pasi është rikthyer te fitorja dhe këtë herë ka mposhtur Gjilanin me rezultatin 3-0. Një fitore me vlera për skuadrën nga Drenasi, që ruan kryesimin e kampionatit me pesë pikë më shumë se Llapi dhe Prishtina. Këta të fundit bënë detyrën sot në transfertë kundër KEK-ut të vendit të fundit, teksa fituan me rezultatin 1-2.

Sa i takon përballjes së Feronikelit, ishte Kastriot Rexha ai i cili arriti të shënonte dy herë më fraksionin e parë të lojës. Yll Hoxha shërbeu dy herë për shtatlartin dhe ai nuk gaboi. Në minutat e fundit kishte kohë edhe për një gol të Mevlan Zekës.

Prishtinë gjithashtu nuk gaboi dhe e zgjidhi ndeshjen shumë shpejt. Miftaraj që në minutën e shtatë kaloi në avantazh bardhekaltrit, ndërsa 20 minuta më pas ishte Armend Dallku autor i golit të dytë përmes një 11-metërshi. Qerimi në fillim të pjesës së dytë veçse e ngushtoi diferencën, pasi Prishtina e ruajti epërsinë dhe mori pikët e plota.

Liria kërkon të mbijetojë në Ipko Superliga, por nuk arriti të fitonte kundër Drenicës në Prizren. Bardhezinjtë shënuan të parët përmes Karahodës, por avantazhi zgjati vetëm shtatë minuta. Pasoma prishi planet e bardhezinjve, që morën vetëm një pikë. Në orën 17:00 u përball edhe Flamurtari me Ballkanin, në një sfidë që përfundoi 0-0.

IKPO SUPERLIGA E KOSOVËS – JAVA 22

E diel, më 10 mars 2019

KEK-Prishtina 1-2
Shënues: Qerimi 53’ / Miftaraj 7’, Dallku 27’ (pen.)
Feronikeli-Gjilani 3-0
Shënues: Rexha 24’, 38’, Zeka 85’
Liria-Drenica 1-1
Shënues: Karahoda 24’ / Pasoma 31’
Flamurtari-Ballkani 0-0

E shtunë, më 9 mars 2019
Drita-Ferizaj 1-0
Llapi-Trepça ’89 3-1

Llapi presion kryesuesve, likuidon me “tris” KEK-un

Sport Ekspres — Fri, 15 Feb 2019 14:25:38 +0000

Llapi e ka nisur me fitore vitin, teksa ka fituar në transfertë me KEK-un. Skuadra nga Podujeva triumfoi me rezultatin 0-3 dhe kështu i dërgon një mesazh Prishtinës kryesuese dhe Feronikelit të vendit të dytë. Diferenca është ngushtuar në dy pikë.

Sa i takon ndeshjes, është dashur një penallti e kthyer në gol nga Mentor Zhdrella për t’u zhbllokuar gjithçka. Në fundin e pjesës së parë Llapi shënoi edhe golin e qetësisë dhe ishte Namani ai që e dërgoi topin në rrjetë.

Me këtë rezultat skuadra e drejtuar nga Xhengiz Rexhepi shkoi e qetë në dhomat e zhveshjes. KEK-u nga minuta e 39-të ishte me një lojtar më pak, çka nuk e rrezikonte fitoren e miqve. Në fund të takimit Llapi realizoi edhe golin e tretë me Arbnor Ramadanin. Një fitore e detyruar për skuadrën nga Podujeva, që pret rezultatet e rivalëve, të cilët luajnë të hënën.

IPKO SUPERLIGA E KOSOVËS – JAVA 18

KEK-u 0-3 Llapi
Shënues: Zhdrella 37’ (pen), Namani 45’, Ramadani 89’

E shtunë, më 16 shkurt, ora 13:00
Drita-Gjilani
Ferizaj-Trepça ‘89
Ballkani-Drenica

E hënë, më 18 shkurt, ora 13:00
Flamurtari-Prishtina
Liria-Feronikeli

Morina merr për dore Prishtinën, Vilfor Hysa Gjilanin

Sport Ekspres — Sun, 11 Nov 2018 14:25:22 +0000

Prishtina është në rrugë të mbarë, pasi sot ka mposhtur me rezultatin 2-0 skuadrën e Ballkanit. Ekipi i drejtuar nga Mirel Josa ka shënuar dy her ënë pjesën e dytë të takimit dhe ai që hapi ndeshjen ishte Mario Morina.

Sulmuesi tiranas po kalon një formë shumë të mirë dhe këtë e tregoi edhe sot, kur me një goditje nga distanca e kaloi Prishtinën në avantazh. Goli i pestë në gjashtë ndeshjet e fundit për Morinën. Fitoren e hipotekoi Korenica, i cili realizoi edhe golin e dytë.

Gjilani i është falur Vilfor Hysës në takimin me Drenicën. Sulmuesi shtatshkurtër realizoi pak minuta nga fundi i takimit. Skuadra e kuqe ngjitet në këtë mënyrë në vendin e katërt në klasifikim. Tre pikë me shumë vlera për Gjilanin.

Trepça ’89 ka bërë detyrën ndaj KEK-ut, duke fituar me rezultatin 4-1. Miqtë befasuan me një gol të shpejtë të Gashit, por Mersini e vendosi shumë shpejt baraspeshën. Në pjesën e dytë ishte Rusi që gjeti dy herë rrugën e rrjetës për skuadrën nga Mitrovica. Në fund Manaj plotësoi “pokerin” për Trepça ‘89.

IPKO SUPERLIGA – JAVA 15

Gjilani-Drenica 1-0
Shënues: Hysa 84’
Prishtina-Ballkani 2-0
Shënues: Morina 65’, Korenica 69’
Trepça ’89-KEK-u 4-1
Shënues: Mersini 13’, Rusi 49’, 51’, Manaj 88’ / Gashi 8’

Feronikeli marshon me Rexhën, Llapi befasohet në shtëpi

Sport Ekspres — Wed, 31 Oct 2018 14:31:53 +0000

Feronikeli marshon dhe pret hapat falas të rivalëve. Skuadra nga Drenasi kaloi me sukses Drenicën, që e mposhti me rezultatin e ngushtë 2-1. Zhan Karioka, ish-mesfushori i Kukësit, ishte ai që shënoi golin e parë për skuadrën e drejtuar nga Zekerija Ramadani.

Gjithsesi Drenica nuk u dorëzua edhe me anë të Mëziut arriti të barazonte pak nga fundi i pjesës së parë. Me rezultatin 1-1 skuadrat iu drejtuan dhomave të zhveshjes. Feronikeli e kishte të qartë që duhet të fitonte dhe ia doli falë golit të shënuar nga Kastriot Rexha. Pikërisht për të zgjidhur “telashet” ia morën Dritës në verë goleadorin shtatlartë.

Llapi është befasuar në shtëpi nga Ballkani dhe ka humbur terren me Feronikelin kryesues. Një gol i shënuar nga Gashi i ka dhënë tre pikët skuadrës vendase dhe për skuadrën nga Podujeva ka marrë një goditje të rëndë.

Gjilani ka bërë detyrën ndaj KEK-ut të vendit të fundit, teksa ka fituar me rezultatin e pastër 2-0. Perez në pjesën e parë zhbllokoi ndeshjen, ndërkohë që Vilfor Hysa ishte ai që pak minuta para fundit të takimit i mbyll llogaritë e këtij takimi me golin e shënuar.

IPKO SUPERLIGA – JAVA 13

Gjilani-KEK-u 2-0
Shënues: Perez 33’, Hysa 86’

Feronikeli-Drenica 2-1
Shënues: Karioka 33’, Rexha 78’ / Mëziu 43’

Llapi-Ballkani 0-1
Shënues: Gashi 71’

Drita e Duros vazhdon ngjitjen, Flamurtarin rigjen fitoren

Sport Ekspres — Fri, 26 Oct 2018 14:03:08 +0000

Kampionët në fuqi të Dritës kanë fituar ndeshjen e katërt radhazi dhe vijojnë të ngjiten në tabelën e klasifikimit. Sot gjilanasit kanë bërë detyrën në transfertë kundër KEK-ut të vendit të fundit, duke fituar 1-2. Ka qenë sulmuesi Betim Haxhimusa ai që ka vendosur fatet e ndeshjes, duke shënuar në fillim dhe në fund të takimit.

Rikthehet te fitorja edhe Flamurtari, që ka mposhtur skuadrën e Ferizajt në transfertë. Vendasit shënuan të parët me anë të Berbatovcit dhe pjesa e parë u mbyll 1-0. Krasniqi për kuqezinjtë barazoi shifrat në të 55’, ndërkohë që Zylfiu e çoi rezultatin në 1-2 për skuadrën nga Prishtina.

Tre minuta nga fundi Krasniqi shënoi edhe golin e tretë, ndërkohë që më pas Mazrekaj goli i Mazrekajt pati vetëm vlera statistikore. Gjithçka u mbyll me rezultatin 2-3 për miqtë. Ballkani ka marrë tre pikë me vlera në shtëpi me Lirinë e Prizrenit. Manevski ishte autor i golit të vetëm të këtij takimi, që u mbyll 1-0.

IPKO SUPERLIGA – Java 12

Ferizaj – Flamurtari 2-3
Shënues: Berbatovci 28’, Mazrekaj 89’ / Krasniqi 55’, 87’, Zylfiu 68’
KEK-u – Drita 1-2
Shënues: Haxhimusa 7’, 94’
Ballkani – Liria 1-0
Shënues: Manevksi 80’

IPKO Superliga | Feronikeli dhe Llapi nuk ndalen dhe sigurojnë fitoret e radhës

Sport Ekspres — Sat, 29 Sep 2018 15:31:45 +0000

Feronikeli dhe Llapi, dy kryesuesit e IPKO Superligës së Kosovës, kanë arritur fitoret e radhës dhe vazhdojnë të kryesojnë renditjen. Djemtë e Ramadanit mposhtën Lirinë e Prizrenit me rezultatin 4-2. Astrit Fazliu me anë të një penalltie të fituar nga Magani dhe Lapidar Lladrovci shënuan në pjesën e parë, duke i dhuruar avantazhin e dyfishtë kryesuesve të IPKO Superligës, ndërsa Qëndrim Gashi shkurtoi diferencën në fundin e pjesës së parë me anë të një penalltie.

Pjesa e dytë dhuroi dhe tre gola të tjerë. Mevlan Zeka dhe Mendurim Hoti shënuan dy gola të tjerë për Feronikelin, ndërsa Gentian Binishi shënoi një gol shumë të bukur 11-të minuta nga fundi, duke ngushtuar diferencën e rezultatit.

Feronikeli vazhdon formën e mirë, duke arritur fitoren e katërt radhazi në kampionat dhe mban vendin e parë në renditje me 17 pikë, ndërsa bardhezinjtë e Lirisë mbeten në vendin e nëntë në kuotën e gjashtë pikëve.

Tre pikë ka arritur të sigurojë dhe ekipi i Llapit, që ka mposhtur KEK-un me rezultatin 2-0. Festim Alidema kaloi vendasit në avantazh në minutën e 14-të, ndërsa kapiteni Hamdi Namani shënoi golin e dytë në minutën e 70-të, duke vulosur fitoren dhe dhuruar ekipit të Sokolit tre pikët e radhës. Llapi mban vendin e dytë në renditje dhe ndodhet vetëm një pikë poshtë Feronikelit.

IPKO Superliga – Java 7

Feronikeli-Liria 4-2
Shënues: (Fazliu 8’ (pen.), Lladrovci 30’, Zeka 57’, Hoti 67’ / Gashi 43’ (pen), Binishi 79′)

Llapi-KEK 2-0
Shënues: (Alidemaj 14’, Namani 69’)