Xheko pranë akordit, rinovimi i Ynder “peng” i një klauzole

Sport Ekspres — Thu, 18 Oct 2018 09:23:53 +0000

Xhengiz Ynder ka marrë një ofertë për kontratë të re nga Roma. Mesfushori i avancuar, i blerë nga Bashakshehir, zhvilloi një sezon të mirë vjet dhe klubi italian ka menduar t’ia shpërblejë disi. I blerë për rreth 14 milionë euro, Ynder paguhet më pak se 1 milion euro në sezon.

Menaxheri Fali Ramadani po bisedon prej kohësh me klubin italian, por sipas asaj që raporton “Gazetta dello Sport” ka mbetur gjithçka te klauzola e largimit. Ynder kërkon që të vendoset një shifër që të mos e nxjerrë atë nga tregu.

Sikurse kuptohet, dëshira e tij është që të largohet nëse një klub i madh e do dhe është i gatshëm të paguajë për të. Së fundmi është lakuar si klub i interesuar Bajerni i Mynihut. Kontrata aktuale e Ynder me Romën përfundon në fund të qershorit të vitit 2022.

RINOVIMI ME XHEKON – Edin Xheko është një tjetër lojtar me të cilin Roma po bisedon për rinovimin e kontratës. Sulmuesi boshnjak ka oferta nga disa klube, ndërkohë që nga ana tjetër verdhekuqtë po shohin edhe për një pasues të tij.

Boshnjaku është tashmë 32-vjeç, por kjo se ka ndalur Romën t’i ofrojë një kontratë të re deri në vitin 2021 sulmuesit. Sipas “Gazetta dello Sport” në javët e ardhme pritet të mbyllet gjithçka me sukses dhe palët të zyrtarizojnë bashkëpunimin edhe për tre vitet e ardhshme.

TË DËMTUARIT – Roma humbet dy lojtarë për shkak dëmtimesh. Diego Peroti, mesfushori i verdhekuqve, ka pësuar një dëmtim që do ta lërë jashtë fushave të blerta për të paktën tre javë. Edhe Rik Karsdorp, mbrojtësi i majtë, do të duhet të pushojë për disa ditë. Mjekët i kanë rekomanduar të qëndrojë për rreth 10 ditë larg fushave të blerta.

Gjatë 3-4 javëve të ardhshme Roma do të ketë disa ndeshje, teksa do të përballet me Spal, Napolin, Fiorentinën dhe Sampdorian në kampionat. Gjithashtu do të luajë në Champions kundër CSKA-së së Moskës.

Zgjohet Roma, blen supertalentin e Fejenordit

Sport Ekspres — Tue, 27 Jun 2017 10:51:11 +0000

Rik Karsdorp është futbollisti më i ri i Romës. Klubi i Serisë A më në fund ka vendosur të veprojë për sa u përket blerjeve, sepse ishte ndalur te blerja e qendërmbrojtësit meksikan Hektor Moreno nga PSV Eindhoveni për 5.7 milionë euro.

Tani klubi verdhekuq nis të investojë sërish, pas shitjes së Salah, Manolas e Paredes, sepse ka mbyllur sot blerjen e mbrojtësit të djathtë Karsdorp.

Vetëm 22 vjeç, holandezi ka 3 vite që luan titullar te Fejenordi dhe sezonin e fundit, që ishte edhe ai i kthimit te titulli, luajti 41 ndeshje si titullar për klubin nga Roterdami, përveçse është bërë titullar edhe te kombëtarja holandeze.

Fejenordi kërkon 20 milionë euro për talentin e vet, Roma ofron 15, por me siguri do të mbyllet për një shifër të mesme, plus ndonjë bonos. Kjo ka bërë që Karsdorp të paraqitet në Romë për vizitat mjekësore dhe ndoshta do të prezantohet që sot pasdite.