Interi është vetëm 6 pikë larg dhe nesër vlejnë vetëm tre pikët. Trajneri Ançeloti dëshiron të djemtë e tij t’i bëjnë një mbyllje pozitive kampionatit. Objektiva të mëdha nuk ka në lojë, por 5 ndeshjet e fundit të kampionatit duhen luajtur mirë dhe duhen fituar.

MOMENTI – “Duam t’i japim fund momentit negativ dhe të përqendrojmë forcat tonë në objektivin e vendit të dytë. Insinje është mërzitur shumë nga fishkëllimat. Nesër nuk do të luajë, sepse ka akoma probleme me tendinin. Duhet të kemi durim, ashtu si me Alan, i cili ndjen lodhje nga mbingarkimi i tepërt. Albiol është rikuperuar, por nuk besoj se do ta nisë nga fillimi.”

SEZONI – “Ka qenë një sezon pozitiv. Kam filluar të njoh ambientin dhe jam shumë i lumtur këtu. Ka njerëz që flasin për një sezon të dështuar, por askush nga ne nuk ka thënë në fillim të sezonit se do të fitojmë titullin apo Champions Ligën. Keqardhja e vetme mbetet eliminimi nga Kupa e Italisë.”

MERKATO – “Ai që dëshiron të largohet nuk do të mbahet me forcë, por nuk ka vullnet nga ana e drejtuesve për të shitur lojtarë.”

Trajneri italian kërkon ekuilibër nga ekipi i tij, si në fazën mbrojtëse dhe në atë sulmuese. Ançeloti kërkon kurajë e guxim si dhe vlerëson kundërshtarin e trajnerin e tyre.

Një koment edhe për kampionatin. Napoli po bën mirë, por Juventusi po “fluturon”. Ançeloti tregon objektivin e ekipit të tij dhe komplimenton bardhezinjtë për ecurinë fantastike.

DUELI – “Duhet të jemi të qartë për lojën që do të zhvillojmë nesër. Duhet të dimë se çfarë bëjmë kur mbrohemi dhe duhet të jemi të qartë se çfarë kërkojmë kur sulmojmë. Duhet të tregohemi më të aftë në mbrojtje, por kjo nuk do të thotë që vetëm do të mbrojmë. Nuk është një ndeshje deçizive, gjithçka do të zgjidhet në fushën tonë. Duhet të tregohemi guximtarë dhe kurajozë kundër Arsenalit, në mënyrë që të sigurojmë njëfarë avantazhi për ndeshjen e kthimit.”

ARSENALI – “Kam respekt për Unain dhe Arsenalin. Është nder për ne që të luajmë në çerekfinale kundër ‘topçinjve’. Mund të përballemi me dy sulmues dhe një ‘playmaker’ ose dy ‘playmaker’ dhe një sulmues. Nuk është ndonjë ndryshim i madh për ne dhe jemi përgatitur për të dyja rastet. Verdi është i vetmi lojtar në dyshim, ndërsa Albiol dhe Diavara janë në gjendje të mirë.”

KAMPIONATI – “Jemi të kënaqur me atë që po bëjmë dhe kemi bërë. Juventusi është 20 pikë para, por objektivi ynë ka qenë të grumbullojmë 80-90 pikë. Besoj se do ia dalim. Nëse ata arrijnë të mbledhin 100 pikë, nuk na mbetet veçse t’i komplimentojmë. Nuk mund të gjykohet sezoni ynë duke u krahasuar me Juventusin.”

Spanjolli i “topçinjve”, i cili ka fituar tre herë rresht këtë kompeticion me Seviljen gjatë viteve 2013-2016, analizon sfidën, tregon pikat e forta të ekipit kundërshtar dhe vlerëson trajnerin e tyre. Pavarësisht kësaj, Emeri ka besim tek ekipi i tij dhe sqaron gjendjen e disa lojtarëve, të cilët janë në dyshim për ndeshjen e nesërme.

DUELI – “Do të jetë një ndeshje 50 me 50. Napoli ka një histori të madhe si ne, renditet në vendin e dytë në Serie A dhe kanë zhvilluar ndeshje shumë të mira kundër ekipeve të mëdha. Vijnë nga Championsi. Ishin në një grup shumë të vështirë më Liverpulin dhe PSG-në, por treguan se janë shumë kompetitivë. Do të jetë një ndeshje e vështirë, por kemi besim te vetja. Duhet t’i përgatisim mirë këto dy ndeshje, të tregohemi solidë, të tregojmë respekt për Napolin dhe vlerësim për veten tonë. Ne jemi përmirësuar në aspektin e ekuilibrit dhe shpresoj që të fitojmë pa pësuar gol, ndërsa ata janë shumë të organizuar taktikisht. Duhet të kemi kujdes nga Milik, Insinje dhe Kajehon.”

SITUATA – “Gjendja e Koshielnit dhe Xhakës do të vlerësohet nesër. Obamejang ka patur disa probleme, por tani është më mirë dhe mund ta nisë ndeshjen si titullar.”

ANÇELOTI – “Karlo është një nga trajnerët më të mirë. Ka eksperiencë të madhe dhe ka stërvitur në shtete të ndryshme. Napoli është një nga skuadrat më të mira për momentin, kanë futbollistë të mëdhenj dhe një trajner me eksperiencë.”

Aurelio De Laurentis është i lumtur me trajnerin e tij dhe nuk i kursen kurrë elozhet për të. Ançeloti u shpreh gjatë ditës së djeshme se dëshiron të qëndrojë edhe tetë vite te Napoli, ndërsa sot ka ardhur replika e presidentit.

Ky i fundit nuk mjaftohet me aq, por është gati t’i dhurojë pankinën derisa të tërhiqet, njësoj si rasti i Aleks Ferguson te Mançester Junajtid. Skocezi kaloi 27 vite në krye të stolit të “Djajve të Kuq”, përpara se t’i jepte fund profesionit në vitin 2013.

Në një prononcim nga Amsterdami, aty ku ndodhet në Asamblenë e Përgjithshme të ECA (Shoqata e Klubeve Europiane), kreu i Napolit flet për dëshirën e tij të madhe, duke e argumentuar se pse rasti i skocezit është i nevojshëm për një klub futbolli.

“Nëse kam marrë një trajner që e dashuron qytetin, qendrën tonë sportive dhe ka thënë që dëshiron të qëndrojë me ne edhe për tetë vite të tjera, atëherë unë e dua atë këtu për gjithë jetën. Njësoj si Fergusoni te Mançester Junajtid. Për mua trajneri duhet të jetë pika e referimit të një klubi futbolli, ai që e përfaqëson në gjithçka. Përveç menaxhimit të klubit, ekziston edhe menaxhimi sportiv, që është thelbësor për një klub futbolli”, përfundon presidenti i Napolit.

“Nuk besoj se rezultati i ndeshjes së parë na shpërqendron. E dimë që Salcburgu është një skuadër e mirë me lojtarë cilësorë. Do tregohemi të qetë në fushë, por natyrisht me dëshirën për të marrë një rezultat pozitiv”.

MUNGESA E KULIBALI DHE MAKSIMOVIÇ – “Ata janë dy lojtarë të rëndësishëm për ne, por ata që do t’i zëvendsojnë do japin maksimumin e tyre. Jemi një grup i bashkuar”.

GOLI I PARË ME NAPOLIN ? – “Do të jepja gjithçka për ta shënuar, por nuk po vjen”.

EKSPERIENCA ME ANÇELOTIN – “Për mua ishte një ndryshim i rëndësishëm pasi kisha pasur të njëjtin trajner për 6 vite rresht. Ndonjëherë është mirë që të provosh ndryshime. Mendoj se përmirësohem nga ndeshja në ndeshje”, përfundoi Hysaj.

SHIRITI I KAPITENIT – “Një napolitan që mban shiritin kapitenit të e Napolit nuk ndodh çdo ditë”, shprehet ai duke treguar edhe krenarinë që ka të qenit kapiten i “të kaltërve”. “U bëra një kapiten i ri pas largimit të Hamshikut dhe unë jam krenar për këtë. Unë dua të përfaqësoj tifozët e Napolit dhe shpresoj që ta mbaj shiritin për një kohë të gjatë”.

ANÇELOTI – ”AnÇeloti ndryshoi pozicionin tim dhe ndihem mirë, edhe pse kohët e fundit nuk kam qenë aq i mprehtë sa unë kam qenë në fillim të sezonit”.

JUVENTUSI –”Do të jetë një ndeshje shumë emocionuese kundër Juventusit. Hendeku është i madh mes nesh dhe atyre, por ne do të përpiqemi të fitojmë, sepse loja ka një shije të veçantë. Është gjithmonë mirë për të shënuar në “Allianz Stadium”. Juventusi ka një skuadër të shkëlqyer. E jona nuk është shumë prapa, por ata janë pak më përpara. Ne ishim të pafat kundër Kievos dhe Torinos”.

HAMSHIK- Insinje kujton edhe ish-kapitenin duke i thurur elozhe dhe krahasuar me Maradonën. ”Hamsik bëri histori në klub. Ai e theu rekordin e Maradonas si një mesfushor. Është një shembull për shumë breza. Jam krenar që kam luajtur me të, ai është një kampion në fushë dhe jashtë saj. Marek kurrë nuk u ankua edhe kur ishte zëvendësues në një ndeshje të madhe. Gjithmonë dha më të mirën dhe kjo është ajo që e bën atë një shembull. Ne vetëm mund t’i themi ‘faleminderit’ atij”.

“Nëse ka një gjë që më bën të çmendem, është kur lojtarët duan t’i bëjnë vetë të gjitha. Si në rastet kur një lojtar duhet ta pasojë medoemos topin dhe nuk e bën këtë gjë. E kam paguar shtrenjtë këtë bindje timen. Te Real Madrid, gjëja që nisi krisjet e para midis meje dhe Florentino Perezit ishte kur nxora nga fusha Gareth Bejlin në një ndeshje kundër Valencias (Reali humbi 2 –  1)”.

“Ai kishe një rast të shkëlqyer ku duhej ta pasonte topin te Benzema që ishte me portë bosh dhe pa mbrojtës. Nëse do t’ia jepte topin Benzema do shtynte topin dhe ne do shënonim. Bejl në vend që të bënte këtë gjuajti vit. Më pas unë e zëvendësova dhe ai moment ishte fillimi i fundit të qëndrimi tim te Reali”, tha Ançeloti.

Karlo Ançeloti ka folur në konferencën për shtyp, duke u ndalur te sfida me Spalin. Më pas vjen ndeshja me Interin, por trajneri nuk e ka mendjen aty. Ançeloti komenton situatën e Insinjes dhe Kulibali, të cilët janë të ndëshkuar dhe mjafton një karton për të humbur takimin me zikaltrit.

Seria A do të vazhdojë të luajë dhe gjatë festave për herë të parë dhe kjo është diçka shumë e bukur sipas trajnerit. Merkato nuk do të ketë në janar. Asnjë blerje dhe asnjë largim, ndërsa trajneri i famshëm e mbyll me rikthimin e tij në Itali dhe ndryshimet që po shikon.

FESTAT – “Krishtlindjet janë një moment i rëndësishëm për të gjithë ne. Do të përpiqemi të kombinojmë aspektin e punës me atë festiv. Do të stërvitemi për Krishtlindje dhe kjo është një risi e bukur për futbollin italian. Në Angli njerëzit përfitojnë nga kjo periudhë për të shkuar në stadium me familjet e tyre.”

FORMACIONI – “Nuk mendoj t’i ruaj Insinjen dhe Kulibali për ndeshjen me Interin, sepse të mbash jashtë lojtarë me kartonë do të thotë të humbasësh dy ndeshje. Kemi dhe 3 ndeshje të rëndësishme deri në fund të vitit dhe duam të marrim maksimumin. Nuk bëj llogari duke menduar për Interin. Nesër do të zbresim në fushë me formacionin më të mirë. Do të mungojë Alan, i cili ka një problem në shpinë. Ka konkurrencë në sulm, pasi Insinje, Mertens dhe Milik janë në formë. Këto dy të fundit nuk kanë asnjë problem për të luajtur bashkë, por deri tani kam dashur të shfrytëzoj në maksimum momentin e mirë të individëve.”

MERKATO – “Në janar nuk do të blejmë asnjë lojtar. Kontingjenti më kënaq, është kompetitiv dhe një afrim do të krijonte probleme për menaxhimin e grupit. Nuk do të kemi as largime, përjashto faktin që ndonjë lojtar do të gjunjëzohej para portës së qendrës stërvitore, duke kërkuar largimin. Por, e shoh grupin të fortë dhe të lumtur për momentin. Pavard dhe Tobido? Nëse them se më pëlqen Pavard, do të tregoja mungesë respekti ndaj Hysajt, Malkuit dhe Maksimoviç, nga të cilët jam shumë i kënaqur.”

RIKTHIMI – “Eksperienca që kam përjetuar jashtë Italisë ka qenë ndryshe. Këtu po shoh pjesëmarrje të njerëzve, stadiumet po mbushen, VAR-i po na ndihmon, pavarësisht se ka nevojë për përmirësim, por nuk ka më polemika të forta. Nëse ne dhe Interi do të kualifikoheshim më tej në Champions, do të flisnim për një rritje të futbollit italian, por mund të konkurrojmë në Europa League me Lacion dhe Interin.”

MOXHI – “Ai ishte pjesë e festës së Juventusit? Moxhi ka qenë pjesë e Juves për shumë vite dhe ka shumë raporte personale me njerëzit atje. Ai ka qenë komandanti i atij klubi. Fakti që mori pjesë atje nuk më duket ndonjë gjë e rëndë.”

Në një intervistë për programin “Tiki Taka”, Ançeloti flet për qytetin e Napolit, ndalet te Kristiano Ronaldo, me të cilin fitoi Champions-in e dhjetë të Realit. Lidhja e trajnerit me yllin portugez është e madhe, por ai nuk e ka dëgjuar më që pas ndeshjes me Juventusin.

Trajneri i Napolit flet dhe për Gatuzon, trajnerin e Milanit, jep mendimin e tij për teknologjinë VAR, një opinion për të birin, Daviden dhe ekipin që simpatizonte i vogël. Në fund një koment dhe për Edinson Kavanin, ëndrrën e tifozëve napolitanë dhe Europa Leaguen, aty ku Napoli do të përballet me ekipin e Zyrihut.

ROTACIONI – “E bëra dhe në ndeshjen e fundit, pasi kishte lidhje me ndeshjen e Champions-it. Kualiteti i grupit të lojtarëve është i lartë dhe ndryshimi i lojtarëve nuk ndikon në rendimentin e skuadrës. Ne duhet të përqendrohemi në atë që bëjmë ne, jo në atë që bëjnë të tjerët. Nëse mendon në atë çfarë mund të bësh, arrin të përmirësohesh. Kështu mund t’i kalosh limitet e tua dhe mund të luftosh për t’i superuar ato.”

CR7 – “E kam parë kur luajtëm me Juven, më pas nuk kemi folur. Më duket po i njëjti: ai është një lojtar shumë i vendosur dhe i motivuar, nuk besoj se ka ndryshuar nga ai që kam stërvitur unë. Kristiano mbetet një lojtar ‘top’, i cili bën diferencën.”

VAR – “VAR është një teknologji që duhet përmirësuar, por që i shërben futbollit. Ashtu si çdo risi, ka disa paqartësi në fillim, por jemi në rrugën e duhur.”

NAPOLI – “Qyteti ka pamje unike, një klimë të mrekullueshme dhe napolitanët dinë ta shijojnë jetën, edhe përmes vështirësive dhe problemeve. Kanë një pasion të madh dhe nuk i marrin gjërat shumë seriozisht, si në vendet e tjera. Napoli është një qytet i mësuar të jetojë në vështirësi, por që e bën këtë gjë në mënyrë shumë pozitive. Më pëlqen të këndoj ‘O surdato nnamurato’ në ‘San Paolo’ pas çdo fitore. De Laurentis më ka kërkuar të bëj maksimumin për ta mbajtur ekipin në nivele të larta, diçka që kishte ndodhur dhe para ardhjes time.”

KAVANI – “Mos të harrojmë faktin që Milik është një djalosh i ri, i cili vjen nga dy vjet dëmtime dhe kjo gjë nuk duhet harruar. Tani ka rigjetur vazhdimësinë dhe shpresojmë të vazhdojë në këtë mënyrë. Folëm për Milik, por mund ta bëjmë dhe për Mertens e Insinjen. Është paradoksale të flasim për Kavanin, i cili adhurohet në Napoli, kur sulmuesit tanë po shënojnë shumë gola.”

INTER – “I vogël isha një simpatizant i Interit, por ajo simpati më pas u vyshk nga vitet që kalova me Milanin. Interi është një klub i fortë, që ka dëshirë të investojë dhe të kthehet në nivele të larta. Mendoj se kjo gjë është çështje kohe.”

GATUZO – “Ai ka bërë mirë në eksperiencën me Milanin. E mori skuadrën në një moment të vështirë dhe i dha identitet. Objektivat e Milanit janë të larta, por nevojitet durim dhe merkato cilësore. Ibra? Mendoj se ka qenë më shumë një vendim i Zllatanit, sesa i Milanit.”

DAVIDE – “Të punosh me djalin tënd është e veçantë, pasi ekziston një marrëdhënie më e drejtpërdrejtë dhe e ngushtë. Gjithçka i referohet stafit teknik, që është i ri dhe kompetent. Unë i kam disa vite mbi supe dhe ndonjëherë kam nevojë për entuziazmin e Davides dhe të rinjve në përgjithësi.”

EUROPA LEAGUE – “Nuk arritëm të avanconim në portën kryesore të Europës, por duam të shkojmë sa më larg në Europa League. Në vitet e fundit ky kompeticion është fituar nga klube të mëdha si: Atletiko Madrid, Mançester Junajtid dhe Çelsi. Është një mundësi që na ndihmon të jemi konkurrues.”

“Nuk e kam di si luan Liverpuli, por e di si mund të sigurojmë kalimin më tej. Kemi avantazhin e fitores në ndeshjen e parë, pasi ai rezultat na jep besim dhe bindje për të fituar. Nuk e di a do të jemi të aftë ta përsërisim atë që bëmë në Napoli, pasi varet nga forma e kundërshtarët, por rëndësi ka qe e dimë si munden ata “Ne kemi lojën tonë. Nuk kemi pse t’i përshtatemi kundërshtarit”.

“S’duhet të harrojmë që nesër kemi një test shumë të rëndësishëm.  Është mbarimi i një pune të gjatë, na duhet të vendosim “tullë e fundit” për të kompletuar çdo gjë”.

STADIUMI DHE TIFOZËT – “Anfield” është një ndër stadiumet më të mirë në botë. Të gjithë e dimë me çfarë pasioni shoqërohen ndeshjet aty. Është gjithmonë bukur të luash takimet në stadiume të këtij statusi. Nuk do të jemi pa mbështetje, pasi do të kemi 3000 fansa tanë në stadium  dhe 40 milionë të tjerë anembanë planetit”, tha Ançeloti

31-vjeçari u tundua dhe gjatë kësaj vere nga një ofertë faraonike nga Kina, por në fund vendosi zemra dhe insistimi i Ançelotit, që ai të qëndronte te Napoli. Por, në verën e para dy viteve, Hamshik ishte shumë afër largimit nga Napoli. Dortmundi insistoi për ta ofruar në ekip dhe palët ishin shumë afër, por pa arritur një marrëveshje.

Kapiteni flet dhe për trajnerin e ri, Karlo Ançeloti. Një trajner i madh, fitues dhe një person i mrekullueshëm. Lidhja me lojtarët e tij është pika më e fortë e Karletos dhe nuk ekziston asnjë futbollist, i cili mund të flasë diçka negative për të. Hamshik flet me admirim për trajnerin e tij dhe zbulon faktin që e surprizon më shumë te Ançeloti.

DORTMUNDI – “Isha shumë afër Dortmundit dhe negociova me klubin gjerman, është e vërtetë. Por, negociatat nuk ishin kaq të thjeshta. Më thanë se Dortmundi duhet të shiste disa lojtarë përpara se të më merrnin mua. Tratativat u zvarritën deri në muajin gusht. Në atë kohë kisha nisur fazën përgatitore me Napolin dhe nuk desha të largohesha.”

KARLETO – “Ançeloti është një trajner i madh. Ai e di se si funksionon një skuadër, di si të komunikojë me lojtarët profesionistë dhe, për më tepër, është një person të cilin thjeshtë e adhuron. Ai ka fituar shumë si trajner dhe kjo mjafton për të kuptuar vlerën e tij. Të surprizon me faktin që nuk stresohet dhe tensionohet kurrë, përkundrazi, është shumë i ftohtë.”

Karlo Ançeloti ka folur në konferencën për shtyp përpara ndeshjes me ekipin serb, duke kërkuar përqendrim dhe fitore. Trajneri i Napolit vlerëson kundërshtarin, ndërsa nuk nguron të komentojë dhe situatën te Bajerni i Mynihut dhe trajnerin Kovaç, i cili është afër shkarkimit nga detyra. Karleto përjetoi një situatë të tillë vitin e kaluar dhe kroatin nuk e kupton askush më mirë se ai.

KUALIFIKIMI – “Qëndrimi ynë në fushë duhet të jetë gjithmonë i njëjti, intensitet dhe aplikim. Pas ndeshjes me Kievon diskutuam për gjërat që na munguan dhe nevojitet një qasje e mirë në ndeshje. Kundër Zvezdës është një ndeshje e rëndësishme, por jo deçizive. Nuk duhet ta mbajmë mendjen te ndeshja PSG-Liverpul, por duhet të bëjmë detyrën tonë. T’i lëmë llogaritë për më vonë. Ndodhemi në një pozicion të mirë pas 4 ndeshjeve të para në grup, por është momenti për të përfunduar punën e nisur. Kemi surprizuar deri më tani, nëse kalojmë do të jemi dhe më shumë surprizë. Nëse nuk ia dalim në këtë pikë, do të tregoheshim idiotë.”

CËRVENA – “Ata janë nënvlerësuar si skuadër. Në transfertat e fundit kanë humbur thellë, por fitorja kundër Liverpulit u hapi shanset e kualifikimit. Pres një skuadër të organizuar, gati për të shfrytëzuar kundërsulmet e tyre. Duhet të sulmojmë mirë për të fituar ndeshjen, por dhe të mbrohemi mirë, sepse nuk do të luhet vetëm në një portë.”

TIFOZËT – “Prezenca dhe mbështetja e tifozëve tanë është gjithmonë e rëndësishme. E tillë do të jetë dhe kundë Zvezdës dhe kjo gjë rrit keqardhjen për barazimin e së dielës kundër Kievos. Shpresojmë t’i zbavitim tifozët tanë. Situata e Bajernit? Kam dëgjuar se Kovaç është pranë shkarkimit. Unë jam gjithmonë në krahun e trajnerëve dhe i uroj Kovaç-it të bëjë më të mirën e mundshme. Po përjeton të njëjtat vështirësi që hasa dhe unë. Për mua nuk ishte e thjeshtë, i uroj më të mirën…”

Tashmë është e thjeshtë të flasësh, por “regjisori” italian e shpjegon qarte, se pse argjentinasi duhet të godiste fort atë top. Më pas një koment për Karlo Ançelotin. Napoli i tij po bën shumë mirë dhe Pirlo i sheh në garë për titull, ndërsa tregon një nga pikat më të forta të Ançelotit si trajner.

“Kur gjuan penallti ke gjithmonë ndjenja të çuditshme, mos të harrojmë që Gonzalo e ndjente këtë ndeshje dhe donte të shënonte. Ka nga ata, të cilët vendosin se si t’i gjuajnë penalltitë përpara fillimit të ndeshjes. Topi peshonte shumë, duhet ta godiste fort, pa e menduar se ku do të gjuante. Ançeloti? Napoli është për titull dhe po e tregon dhe në Champions. Ançeloti është shumë i aftë për të bërë rotacion. Sarri përdoret 13 lojtarë, ndërsa Karlo i përdor të gjithë dhe në Xhenova arriti të propozojë një lojë të ndryshme”, përfundon Andrea Pirlo për “Sky Sport”.

Trajneri zgjodhi Napolin, një befasi pozitive për shumë tifozë, dhe dora e tij dallohet lehtësisht. Ekipi renditet i dyti ne kampionat, bashkë me Interin, gjashtë pikë poshtë një Juventusi shumë të fortë dhe i pari në një grup “ferri” në Champions, bashkë me Liverpulin dhe PSG.

Ançeloti komenton për “DAZN”, raportet me lojtarët dhe presidentin Aurelio De Laurentis, si dhe shkakun kryesor të rikthimit në vendin e tij. Në fund dhe një kompliment për ish-trajnerin Sarri, i cili ka hedhur bazat e këtij Napoli spektakolar.

LOJTARËT – “Me Mertens nuk ka qenë e thjeshtë, pasi nuk ka luajtur nga fillimi, por janë gjëra normale. Hamshik? Isha në dijeni të ofertës që kishte, kështu që i shpjegova se ishte një lojtar i rëndësishëm për mua dhe se do të më bëhej qejfi nëse qëndronte. Ia bëra të qartë se do t’i ndryshoja rol dhe ndoshta kjo ishte ajo që e bëri të qëndronte, sepse dëshironte të provonte diçka të re.”

RIKTHIMI NË ITALI – “Mundësia për t’u rikthyer të flas italisht ishte një ndër gjërat, që më bindi më shumë të pranoj ofertën e Napolit. Në aspektin teknik, të komunikosh në anglisht nuk shkakton asnjë problem, por në aspektin emocional dhe psikologjik të flasësh gjuhën tënde është një tjetër gjë. Në Napolin e sotëm ndërkombëtar, italishtja është gjuha zyrtare që flitet.”

SARRI – “Jo vetëm që terreni ishte punuar mirë, por kishte edhe një bar të shkëlqyer: Puna e Sarrit ka qenë e rëndësisë së jashtëzakonshme.”

PRESIDENTI – “Unë dhe De Laurentis komunikonim prej vitesh. Folëm kur tentova pa sukses të merrja Kavanin te PSG, ndërsa këtë verë i kaluam pushimet së bashku. Ai është lloji i presidentit, i cili është bërë pasionant me kalimin e kohës: tani ndjek gjithçka, informohet për gjithçka, por di të ndajë detyrat. Aurelio është një person i sinqertë, shumë i sinqertë dhe shumë i këndshëm.”

ANTI-JUVENTUS – “Ka disa skuadra që aspirojnë t’i ofrohen Juventusit, Inter ka bërë një seri pozitive rezultatesh dhe është ofruar, ashtu si dhe ne. Kjo gjë rrit konkurrencën e kampionatit. Frikë për të qenë anti-Juventus? Nuk bëhet fjalë për frikë, por për përgjegjësi dhe duam të bëjmë maksimumin për të mposhtur një skuadër shumë të fortë. Nëse ia arrijmë të bëjmë më mirë se ata, do të fitojmë kampionatin.”

EMPOLI – “Skuadra ka shumë besim dhe vijmë në këtë ndeshje në gjendje të shkëlqyer. Do të bëjmë një ndeshje të madhe. Të gjithë ndeshjet janë të komplikuara dhe mund të ndëshkohemi nëse nuk përqendrohemi maksimalisht, por djemtë më japin besim dhe siguri.”

ROTACIONI – “Nuk do e ruaj Insinjen për PSG, nëse do të ketë rotacion do e bëj për të futur lojtarë të freskët për këtë ndeshje. Ndeshja me Empolin është më e rëndësishmja dhe nuk mendoj për atë kundër PSG. Do të shihni një Napoli, që luan më shumë intensitet se ndeshjet e kaluara.”

MILIK – “Ai është një sulmues nga i cili priten gola. Po përjeton një periudhë maturimi dhe ka disa mangësi në gjykimin e përgjithshëm. Punoi shumë kundër Romës dhe unë nuk iu kërkoj sulmuesve gola, por të lëvizin në harmoni me ekipin. Nëse nuk shënon, nuk është një problem për mua. Të gjithë duhet të japin më shumë, por jam i kënaqur me Milik dhe Zielinskin.”

FILLIMI I SEZONIT – “Një farë bilanci do e bëjmë pas përfundimit të fazës së parë. Kemi patur një kalendar të komplikuar deri më tani, por nuk është e thënë, sepse ekipe të vogla kanë marrë pikë, si rasti i Spalit në Romë, Parma në Milano kundër Interit. Të gjitha skuadrat kanë karakteristika e duhura për të vënë në vështirësi çdo ekip.”

GJENDJA – “Nuk më pëlqen kurrë të them Napoli im, por nuk e mohoj dot që jam i kënaqur me nivelin e lojës të djemve. Duhet të jemi të përqendruar dhe të vëmendshëm, por skuadra më jep emocione. Shumë gola të pësuar? Mund të përmirësohemi, jemi penalizuar nga 5 golat e pësuar kundër Sampdorias dhe Milanit, por mbrojtja ka punuar mirë.”

MERTENS – “Sulmuesit janë më të lehtët për t’u zëvendësuar. Nëse po fiton, mund të heqësh një sulmues për të futur një më difensiv, nëse po humbet, e ndërron për ta zëvendësuar me një tjetër më të freskët. Nuk vlen sasia e minutave, por cilësia, siç Mertens e bën shpesh. Nuk është e thënë që nuk do të luajë nga fillimi, është në formë, po përdoret pikërisht për këtë gjë, pastaj nëse e nis në formacion, ose gjatë lojës, ndodh për të mbajtur këtë formë sa më gjatë të jetë e mundur.”

DËMTIMET – “Ounas dhe Rog janë gati dhe janë grumbulluar. Luperto do të jetë gati për PSG, Verdi për Xhenoand dhe Merët është pranë rikthimit. Jounes po punon dhe është pak mbrapa në krahasim me Gulam, por është pjesë e skuadrës. Mund të jetë gati në fundin e muajit.”

INDIVIDËT – “Kulibali mbrojtësi më i mirë që kam stërvitur? Vështirë të zgjedhësh treshen e podit. Janë Tiago Silva, Nesta, Ramos, Terri, Stam, Kanavaro, Turam… vazhdojmë? Ndoshta, në këtë moment Kulibali është një nga mbrojtësit më të mirë në botë.”

TIFOZËT – “Kemi luajtur në shtëpi kundër Romës, pastaj Empoli dhe PSG. Janë 3 ndeshje dhe jo të gjithë mund t’i përballojnë gjithë këto ndeshje. Nëse një tifoz zgjedh PSG dhe jo Empolin, kjo është një gjë natyrale. Megjithatë, është e qartë që do të përpiqemi të përmirësohemi dhe t’u japim më shumë entuziazëm tifozëve.”

DËSHIRAT – “Dua të drejtoj një skuadër, që më jep emocione. Kjo gjë po ndodh dhe nuk mund të kërkoj më shumë. Klubi më mbështet, ambienti është i bukur dhe shpresoj që të vazhdojmë kështu. Si arrin një trajner të bëhet me 3 yje, i vetmi në Itali? Ndoshta ka patur fat…(buzëqesh).”

MERKATO – “Ibra dhe Kavani? Nuk është momenti për të folur për merkato. Është ende herët, ndërsa me Kavanin do të përballemi pas katër ditësh. Do të ishte mungesë respekti të flisnim për të, për respekt të atyre që ndodhën këtu dhe po bëjnë shumë mirë.”

Trajneri i Napolit ndjen kënaqësi për rritjen e PSG, por të mërkurën do të kërkojë fitoren. Napoli i tij po rritet dhe kundër Liverpulit e meritoi fitoren. Sulmi i francezëve është i tmerrshëm, por nuk ishte më pak dhe ai i ekipit të Klopit, që nuk u lejua të bënte një gjuajtje në portë nga mbrojtësit e Napolit. Nesër është ndeshje tjetër, ndërsa Ançeloti ka folur për “France Football”, ku komenton ekipin e tij, stilin e tij të punës dhe kalimin e Kristiano Ronaldos në Serie A.

NAPOLI – “Napoli i sotëm është ndryshe. Nuk kemi një Maradona në ekip, por kemi ndërtuar realisht një ekip të nivelit të lartë, me shumë lojtarë të rinj në përbërje. Ka vite që Napoli luan një futboll të bukur, kështu që cilësia nuk na mungon. Unë do përpiqem të sjell eksperiencën time në këtë ekip, t’i ndihmoj djemtë të rrisin personalitetin e tyre dhe kurajën në momentet kur nuk luajmë mirë.”

ANÇELOTIZMI – “Nuk ka një stil të qartë të Ançelotit, sepse unë e përgatis ndeshjen në bazë të karakteristikave të lojtarëve të mi. Disa trajnerë e nisin ndeshjen me një ide të përcaktuar dhe përpiqen t’i vënë lojtarët në funksion të skemave të tyre. Unë shoh gjendjen e lojtarëve të mi dhe përshtas stilin tim ndaj tyre.”

PSG – “Nuk mendoj se ka patur një qëllim për të futur kulturën italiane në këtë ekip. Mbi të gjitha, ishte dëshira për të sjellë një kulturë të nivelit të lartë, profesionalizëm dhe cilësi.  Është një gjë e këndshme të shohësh rritjen e klubit. PSG është një nga ekipet më të mira në Europë dhe mund të fitojë Champions-in, kjo është e sigurt.”

CR7 – “Ardhja e Kristiano Ronaldos në Serie A është një sinjal i shkëlqyer për imazhin e futbollit italian. Për një kohë të gjatë ka qenë kampionati i yjeve botërorë: Maradona, Platini, Ziko, Zidan, Ronaldo, Shevçenko, Kaka, Ibrahimoviç… Ardhja e portugezit ndihmon në prestigjin e futbollit italian. Po flasim për një fenomen dhe një profesionist ekzemplar, i cili ka vetëm një faj të vetëm: faktin që shkoi te Juventusi (qesh).”

Karlo Ançeloti ka mbetur i kënaqur me rezultatin dhe paraqitjen e skuadrës, ndërsa lëshon dhe një batutë për Kevin Malkuit. 27-vjeçari francez luan në rolin e Elseid Hysajt, në krahun e djathtë të mbrojtjes dhe po bën paraqitje pozitive.

Ndaj Udinezes, Ançeloti vendosi t’i aktivizonte të dy lojtarët. Hysaj në krahun e majtë, me më shumë detyra defensive, ndërsa francezi në krahun e djathtë, me më shumë detyra ofensive.

“Ishte një fitore e vuajtur, por u rikthyem të menaxhojmë mirë ndeshjen. Po tregohemi solidë në mbrojtje, ndërsa sulmuesit po punojnë mirë. E nisëm me Hysajn pak më mbrapa dhe shtymë shumë përpara me Malkuit. Francezi po rritet, ka një forcë të madhe fizike, por duhet të përmirësohet në fazën difensive. Është normale, përpara tij ka profesorë, ndërsa ai është akoma në fazën që po mëson”, përfundon Ançeloti, duke komplimentuar indirekt lojtarët e tjerë të repartit difensiv, përfshirë dhe shkodranin e kombëtares tonë.

Ançeloti ka folur gjatë prezantimit të librit “Demonët” të Alesandro Alçiatos, ku tregon sekretet e sukseseve të tij, ndërsa i rikthehet dhe njëherë netëve magjike me Milanin në Champions. Në stolin e kuqezinjve zhvilloi tre finale të Champions-it brenda pesë sezonesh. Të parën e fitoi kundër Juventusit, të dytën… e lemë fare, ndërsa të tretën e fitoi sërish dhe u hakmor kundër Liverpulit, ekip që i dhuroi tifozëve milanistë një nga mbrëmjet më të errëta në finalen e vitit 2005.

STRESI – “Demonët ekzistojnë në futboll dhe në jetë, por jo këtu në Napoli. Po ndihem si zot, ky qytet është një parajsë e vërtetë. Saki ishte një novator, por nuk zhvilloi një karrierë të gjatë për shkak të stresit. Unë po e menaxhoj mirë stresin, por nëse nuk do të arrij ta bëj më, do të tërhiqem. Saki ishte një trajner, i cili kërkonte shumë nga lojtarët, por mbi të gjitha nga vetja. Stresi i prek të gjithë, por duhet të jemi në gjendje ta menaxhojmë. Kush e menaxhon mirë e transformon në energji. Për momentin ndihem shumë mirë, më pëlqen puna ime dhe do largohem ditën kur stresi të bëhet i pa menaxhueshëm.”

SEKRETI I SUKSESIT – “Kam shumë dëshirë për të stërvitur, bëj atë çfarë më pëlqen dhe kam një pasion të vazhdueshëm. Në një grup është shumë e rëndësishme të përfshish të gjithë stafin në punën që bëhet. Kjo gjë përmirëson të gjithë raportet humane dhe ato të punës.”

CHAMPIONS – “Finalen e humbur në Stamboll përballë Liverpulit nuk e konsideroj si një demon. Është episodi i një rruge të përshkruar me të mirat e të këqijat e veta, por nëse më duhet të zgjedh, preferoj netët e Champions-it të viteve 2007 dhe 2003. Thuhet shpeshherë se në futboll nuk duhet të festosh fitoret, por të mendosh për ndeshjen e ardhshme, por, në fakt, duhen festuar dhe kujtuar fitoret.”

INZAGI-SHEVA – “Ata të dy kanë luajtur shumë ndeshje së bashku. Dy sulmues të fortë, por të ndryshëm nga ana e karakterit. Sheva fliste pak, për shkak të problemeve të gjuhës. I shikonte gjërat në vend që t’i dëgjonte nga unë.”

“Kishim kontakte telefonike prej vitesh. Herë pas here Karlo informohej për lojtarët tanë dhe unë për lojtarët e tij. Më kishte befasuar ekuilibri i tij, por dhe edukimi që kishte, sepse kur e ndjente se nuk kishte vend për negociata, nuk insistonte.”

“Më duket se ky emërim ndoshta ishte shkruar në universin e futbollit, sikur ta kishte vendosur fati. U deshën pesë minuta, e përsëris, pesë minuta për të gjetur akordin. Kjo ishte negociata më e shpejtë në 15 vitet e mia në futboll. Më pas erdhi një avokat, shumë i mirë, dhe na u deshën dhe pesë minuta të tjera për të përcaktuar çdo detaj. Ditën tjetër Karlo erdhi në Iskia, më telefonoi i entuziazmuar dhe më tha: ‘Aurelio, mund të qëndroj këtu për gjashtë vite’.”

“Me atë përjetojmë një raport human dhe diskutojmë për interesa të përbashkët. Nëse i flas për futboll nuk ofendohet. Para ndeshjes me Liverpulin i telefonova në orën shtatë të mëngjesit dhe i shpreha mendimet e mia. Me mirësjellje dhe autoritet m’u përgjigj: ‘President qëndro i qetë, do ta fitojmë ndeshjen’”, përfundon kreu i Napolit.

FITORJA – “Ishte një mbrëmje me emocione të forta. Bëmë shumë mirë gjatë gjithë ndeshjes, nuk e humbëm kurrë kontrollin, ishim shumë të kujdesshëm dhe shumë të aftë në fazën mbrojtëse. Treguam ekuilibër dhe krijuam shumë raste për gol. Shënuam në momentin e duhur. Nëse do të shënonte Mertens në minutën e 81-të, do të vuanim më shumë, kështu që më mirë që shënuam në minutën e fundit.”

TAKTIKA – “Mbrojtëm me skemën 4-4-2. Ajo që ndryshuam ishte Maksimoviç për të shmangur presingun e sulmuesve të Liverpulit. Kjo na lejoi të menaxhonim fillimin e ndeshjes dhe pozicioni më i avancuar i Mario Ruit iu krijoi shumë probleme. Kjo ishte ndeshja që pres gjithmonë nga lojtarët e mi. Kjo skuadër ndonjëherë nuk e shpreh gjithë potencialin e saj, por kjo fitore do të na ndihmojë të jemi më të lirshëm psikologjikisht. Interpretimi i lojtarëve të mi ishte perfekt dhe kjo fitore na mban në garë për të kaluar grupin.”

I lumtur për fitoren është dhe presidentin Aurelio De Laurentis, i cili ka zgjedhur të komentojë në rrjetet sociale, ku ka shkruar: “Fitore e madhe kundër një skuadre të madhe. Ançeloti i denjë për famën e tij.”

DE LAURENTIS – “Jeta është më e bukur dhe më argëtuese me Karlo Ançelotin. Pashë Mertens të rikthehet të krijojë lojë. Me Sarrin luanim njësoj, në një zonë më të ngushtë të fushës, ndërsa tani ka variacion. Kur zgjodha Ançelotin, e dija se kisha marrë një trajner me eksperiencë që më bën të ndjehem i qetë dhe në këtë fillim sezoni, qetësia nuk më ka munguar. Shoh një stil tjetër loje, 360% të ndryshëm. Të gjithë e dinë sa të dobishëm janë, por askush nuk ndihet i pazëvendësueshëm dhe zemërohet nëse nuk luan. Mund ta pohoj që jemi më të fortë se vitin e kaluar”.

KARLO ANÇELOTI – “Ishte një fitore e bukur në një fushë të vështirë, që do të na ndihmojë të rrisim autovlerësimin. Duhet të qëndrojmë me këmbë në tokë dhe të rritemi e përmirësohemi. Vendosa të kaloja Insinjen më në qendër, për t’i limituar detyrat mbrojtëse dhe që të përqendrohej në sulm. Mertens kreu një lëvizje të madhe, por nuk arriti të shënonte. Verdi është një lojtar me vlera dhe e kemi blerë për t’i rritur performancën ekipit. Po përshtatet mirë dhe po korr frytet e punës së tij.  Luajmë me Parmën pas tre ditësh kundër një kundërshtari që po bën mirë, por duhet ta kalojmë dhe këtë pengesë. Duhet të mendojmë të përgatisim me qetësi këtë ndeshje”, përfundon Karlo Ançeloti.”

“U treguam të ngadaltë në pasime dhe në marrjet e topit, shto këtu dhe disa gabime që s’na u ndanë gjatë të gjithë lojës. Humbëm dy pikë të rëndësishme, në një grup shumë të vështirë, por kemi dhe pesë ndeshje të tjera. S’duhet ta bëjmë dramë këtë humbje. Momentalisht renditemi të dytët, nuk është nevojë për të qenë negativë”.

“Kur na mbeten vetëm 15 minuta u bë e pamundur për të luajtur futboll të vërtetë. E kam parë disa herë Crvena Zvezdën teksa e bën këtë. Ata janë profesionistë në harxhimin e kohës e simulimet dhe në disa momente gjyqtari ra në grackën e tyre”, përfundoi Ançeloti.

Siç citon “Gazzetta dello Sport”, trajneri i Napolit ka ngritur tonet në një moment gjatë sfidës me Fiorentinën. Gjithmonë në stilin e tij me shaka, por diçka e tillë dha efekt dhe Insinje arriti të shënonte, duke i dhuruar Napolit fitoren.

“A jeni akoma në plazh?”, ka qenë britma e Ançelotit drejtuar lojtarëve të tij në një moment përgjumje gjatë ndeshjes së fundjavës. Diçka e tillë ka sjellë ilaritet, por ka motivuar Hysajn me shokë, të cilët kanë shtuar ritmin, duke shënuar dhe marrë tre pikët.

Fiorentina – “Grupi është i kompletuar. Dikush si Milik dhe Mertens janë pak të lodhur, por do i rikuperojmë deri nesër. Ata luajtën nga 90 minuta me Poloninë dhe Belgjikën. Insinje është mirë, nuk luajti ndeshjen e dytë me Italinë dhe është rikthyer i freskët dhe i motivuar. Në fillim vjen Fiorentina dhe pastaj Cërvena Zvezda. Ekipi i Fiorentinës ka luajtur shumë mirë në dy ndeshjet e para dhe kanë lojtarë të mirë dhe të rrezikshëm.

I respektojmë, por duam të fitojmë për të rritur vetëvlerësimin, që ka rënë pak pas humbjes në Xhenova. Nuk mendoj që djemtë do të mendojnë për ndeshjen e vjetshme. Kemi provuar disa gjëra dhe besoj se do arrijmë t’i realizojmë në ndeshje.”

Mbrojtja – “Nuk mendoj që kemi faza mbrojtëse është e cunguar, sepse kundër skuadrave të mëdha nuk kemi lejuar shumë hapësira. Do të kthehemi të jemi solidë në mbrojtje. Kam lexuar kritika të ashpra, por do të shfrytëzojmë të gjithë elementët e kontingjentit tonë dhe do të bëjmë rrotacion.

Në tre ndeshjet e para nuk kemi patur intensitetin e duhur në pjesët e para. Megjithatë, gabime të vogla si të Zielinskit dhe Hysajt në Xhenova, po na kushtojnë dhe duhet të jemi më të vëmendshëm me detajet.”

Shiriti i Astorit – “Është minimalja që Davide të kujtohet nga shokët e tij nëpërmjet shiritit të kapitenit. Futbolli ka probleme më të mëdha dhe është humbur shumë kohë duke diskutuar me këto gjëra.”

Kombëtarja – “Mançini ka një detyrë shumë të vështirë. Në këtë moment nuk po shprehim cilësi të shkëlqyera dhe shumë lojtarë të rinj kanë pak eksperiencë ndërkombëtare.”

Ançelotizmi – “Nuk dua të shpreh atë që ndjej në këto momente, sepse jam shumë i lumtur dhe De Laurentis do të mendonte se më paguan shumë. Nëse do të ketë 20 mijë tifozë me Fiorentinën, do të bëjmë të pamundurën për t’i kënaqur, në mënyrë që t’i tregojnë të tjerëve që panë një Napoli të bukur.

Sarri? Skuadrat e Sarrit dhe Guardiolës kanë patur gjithmonë një filozofi loje të mirëpërcaktuar dhe me identitet, ndërsa filozofia ime nuk lidhet me një ide fikse. Nuk dua që kjo skuadër të harrojë atë çfarë ka bërë, mbi të gjitha, kompaktësinë që u ka krijuar Sarri.

Ndoshta, mund të fillojmë të luajtëm më tepër vertikalisht se në të kaluarën.” për të rritur autovlerësimin, që u ul pak nga humbja me Sampdorian.”

“Çdo trajner ka idetë e tij, por duhet mbajtur gjithmonë në konsideratë puna e bërë më parë dhe niveli i njohurive të lojtarëve. Unë kërkoj t’i sjell idetë e mia pak nga pak, pa hedhur poshtë punën e mirë që është bërë në të kaluarën. Gjëja më e rëndësishme është marrja në konsideratë e karakteristikave të lojtarëve dhe kjo është baza e krijimit të sistemit taktik dhe jo e kundërta. Kjo ka qenë një nga aspektet primarë me të cilën kam nisur punën time te Napoli. Po përpiqemi të shtojmë disa truke si: të luajmë më shumë vertikalisht dhe më të hapur. Nuk e di sesa kohë do të na duhet, por shpresoj që t’ia arrijmë sa më shpejt.

Unë jam një person i qetë dhe i përmbajtur, por kjo nuk do të thotë që nuk e ndjej presionin. Çdokush e manifeston atë në bazë të karakterit të vet. Presioni sipas meje të mban gjallë, të përqendruar, të vëmëndshëm ndaj çdo detaji dhe gjëja më e rëndësishme është që të mos shndërrohet në stres.

Bajerni? Eksperienca me Bajernin ishte pak e çuditshme. Gjërat nuk po shkonin keq dhe i fituam të gjitha ndeshjet e shtatorit. Mendoj që ata kishin më shumë një problem filozofik, sepse unë dëshiroja t’i ndryshoja gjërat, ndërsa ata ishin kundër ndryshimit”, përfundon trajneri i Napolit.

“Ançeloti është një person i shkëlqyer, i cili ka hyrë gabimisht në botën e futbollit. Ai do të kishte bërë gjëra të jashtëzakonshme dhe në sektorë të tjerë të jetës, sepse është një njeri i qetë, nuk e njeh hakmarrjen dhe shpreh ekuilibër dhe ekuilibri është një virtyt i rrallë”, shprehet De Laurentis për “L’Equipe”.

Ai rikthehet të flasë dhe për ish-teknikun Sarri. Ai afroi një futboll të bukur, por nuk vlen, sepse nuk fitoi asgjë.

“Nga sezoni i kaluar mbetet shija e kënaqësisë që luajtëm një futboll të bukur, por edhe hidhërimi që nuk fituam. I dhuruam Sarrit gjithçka i nevojitej, por në tri vite nuk fituam asgjë” përfundon presidenti i Napolit.

“Napoli mendoi për mua dhe unë kisha dëshirë të rikthehesha në Itali. Pjesa financiare nuk ka qenë një problem apo temë diskutimi. Më tërhiqte Anglia, por kur erdhi oferta e Napolit, mendova që kishte ardhur momenti për t’u rikthyer. Nuk kam stërvitur asnjë nga lojtarët që janë këtu, jam kurioz t’i njoh më mirë dhe ata janë kuriozë për të parë se si unë i stërvis lojtarët. Faza defensive është shumë e fortë dhe nuk ka nevojë që t’iu shpjegoj ndonjë gjë.

Sa i përket sulmit, dua të bëj disa ndryshime dhe ndoshta duhet të luajmë pak më shumë vertikalisht”, përfundon Karlo Ançeloti, i cili të shtunën në mbrëmje debuton në “San Paolo” dhe çfarë përballje! Kundërshtari është Milani, një dashuri e vjetër e Ançelotit.

“Po bëjmë një punë të mirë dhe bilanci është pozitiv. Këtu kam gjetur një organizim të mirë. Gjithçka funksionon në perfeksion dhe të gjithë janë të sjellshëm dhe dashamirës. Ka shumë pasion dhe entuziazëm. Me pak fjalë, kam gjetur ambientin ideal për të punuar.”

“Grupi është i shëndetshëm me lojtarë me kualitet dhe njohuri. Kam në dispozicion një grup lojtarësh me cilësi, konkurues, të rinj dhe me cilësi të shkëlqyera fizike. Kjo gjë më jep shumë besim për sezonin qe do të nisim.”

Ançeloti ndalet dhe te raporti me presidentin De Laurentis dhe te sulmuesi Kavani. “Nuk kam debatuar kurrë me presidentin. Ka pritshmëri të mëdha kundrejt figurës time, kjo është normale, por mund t’ju them që kam gjetur një ambient fantastik. Të gjithë janë persona të ndërgjegjshëm dhe punojnë shumë. Deri tani po argëtohem dhe kur unë argëtohem, bëhem i rrezikshëm… Kavani? Janë vetëm fjalë merkato. Kam lojtarë dhe një ekip fantastik dhe të tjerët nuk më interesojnë”.