“Sot zyrtarisht nuk jam më pjesë e Kukësit, për të cilin kam shumë dashuri. Dua të falënderoj zotin që e hapi këtë derë dhe më bekoi, po ashtu gruan time që ishte gjithmonë në anën time, duke me dhënë mbështetje. Falënderoj familjen time dhe miqtë e mi. Nuk mund të lë pa falënderuar presidentin Safet Gjici, zyrtarët e klubit, trajnerët që kam punuar këtu, grupin e lojtarëve dhe kryesisht tifozët që më kanë trajtuar gjithmonë me shumë dashuri dhe respekt. Respekt për fansat! Në këto 2 vjet klubi kam luajtur 90 ndeshje, kam fituar 3 tituj (Superkupën, Kupën dhe titullin kampion). Kam luajtur në dy kualifikuese të Europa League-s dhe një të Champions League-s, edhe pse ka pasur shumë vështirësi ne i kemi kaluar me sukses. Shume faleminderit dhe zoti ju bekoftë të gjithëve. E ardhmja? Në duart e zotit, sepse ai e di se çfarë është më e mirë për mua”, përfundon Karioka.

29-vjeçari nga Brazili ka mbyllur kontratën me Kukësin dhe klubi verilindor nuk i ka ofruar rinovim.

Zhan Karioka u bashkua me Kukësin në vitin 2015, duke u brë protagonist, sepse në dy sezone ka luajtur 90 ndeshje në të gjitha kompeticionet, një shifër e jashtëzakonshme, pasi thuajse gjithnjë ka qenë në formacion.

Vetëm në dy ndeshjet kundër Sherifit Zhan Karioka e nisi nga stoli dhe aty u kuptua ftohja mes tij dhe klubit.

Tashmë braziliani është në treg dhe pret oferta, pse jo edhe nga Shqipëria, ndërsa Kukësi humbet një tjetër lojtar me peshë, pas Albi Allës në fund të sezonit të shkuar, por priten edhe largime të tjera me shumë rëndësi, pa harruar se edhe trajneri Ernest Gjoka nuk do të jetë më në drejtim.

Vetë Karioka ka postuar në rrjetet sociale një mesazh të shkurtër: Jam i lirë!

Ndërkaq, dje u fol për një kontakt me Ndriçim Shtubinën dhe ish-kapiteni i Vllaznisë mund të jetë alternativa e parë për Zhan Kariokën.